“Taunuuga o le faamoemoe o le Kerisiano.”

| Sermon | Faaeaina, Faamalosi44, Faamoemoe, Finau, Kenese 32:26, Kerisiano, Lauga, Luka 22: Taunuuga, Lumana'i, Manumalo, Tauivi, Tauva

L A U G A

Tusi Faitau: Feagaiga Tuai — Kenese 32:22-32; Feagaiga Fou — Luka 22:39-46

Matua – Kenese 32:26b: “Ou te le tuuina atu lava oe seia e faamanuia mai ia te a’u.

Luka 22:44a: “Ua puapuaga o ia, ua atili ai lana tatalo.

Manatu Autu: “Taunuuga o le faamoemoe taua o le Kerisiano.”

Faatomuaga: O le upu tauivi, tauiviga; finau, finauga; tau, taua; tauva, ma le tauvaga: E tasi lo latou faamoemoe taua—ia maua le manumalo; ia faaeaina i le numera muamua; ia maua le fu’a o le faailoga, ma faapaleina i le pale matagofie ua saunia mo le ua manumalo.

Ua tusia i le Kenese le tala i le faamanuiaga na maua e Iakopo mai le Atua. E lua ni vaega taua o i lea faamanuiaga: (1) O le aganuu ma tu faa-Isaraelu, e ‘ave le faamanuiaga i le ulumatua o le fanau. (E foliga faapea foi aganuu faa-Samoa). O Esau ma Iakopo, e toalua lava i laua; e matua Esau, ae ui’i Iakopo; e tatau ona maua le faamanuiaga e Esau. (2) O le tala na faitauina, ua na o le faamanuiaga i faaupuga. A o lona faataunuuina moni, lea o le a tatou mafaufau i ai; sa lei faigofie le faatinoga o lenei faamanuiaga.

E faapea foi le tala ua tusia e Luka: O se tauiviga faigata na faafeagai ma le Alii o Iesu. Na muamua folafolaina le finagalo o le Atua—o le a fanau mai le tama, e i lona ua le malo. Ae na faataunuu lea folafolaga i le Feagaiga Fou: Ina ua afio mai le Alo Pele e toatasi o le Atua le Tama i le lalolagi; sa lei faigofie, aua na faafeagai ma faigata ma puapuaga.

O nei tauiviga e faia e le tagata i le lalolagi—e le faaletino, ae faale-Agaga. Ae ui ina faale-Agaga, ua avea le vaai o mata, faalogo o taliga—o se ‘auala pito faigofie lea e faamalamalama lelei ai i tagata o le lalolagi le finagalo o le Atua mo le tagata.

MANATU #1: Tauivi ma teu i le loto, pe tua ini a le lumanai.

Soo se tagata taumafai mo le manumalo, e tatau ona iloa i le mafaufau se “ata” po’o foliga o le mea ua tausinio i ai; a e po’o le a foi le sini o le faamoemoe—pe i ai se mea e fiafia ai le loto o le ua finau. O le a le maua se fiafia pe afai ae le manumalo. E tutupu foi ni lagona e tuufesili ai, ma sailiili i le pogai: Ai ona ua le lelei ona a’oa’oina—ua le’i lava ni sauniuniga. Afai e toilalo le ‘autau, e le taumate e to’atele nisi ua uma ai lo latou soifua; ae o e ua totoe, ua avea e fai ma pologa po’o ni pagota. E tuua’iina le ‘autau toilalo, aua e le’i lava a latou sauniuniga.

Ua toilalo le itu-taua ona ua le lava a’upega; e le taumate ua faatamala le ta’ita’i po’o tagata tau. O nisi na o mafua’aga ta’atele, e ala ai ona faatoilaloina se ‘autau ua sauniuni mo le taua.

MANATU #2: Faalogo i upu o le faamanuiaga, mafaufau i ou tiute ma matafaioi.

Afai e lagona i taliga le tala ua aumai, ona fuafua lea i le mafaufau le tulaga e mafai ona faia e le tagata. O le faatinoina ma lona faataunuuina, e tofu lava le tagata ma lagona eseese—e faalagolago i mea na soifua mai ma le tagata: i lona aiga, i lona atunuu, faapea i le li’o o le mea ua nofo tumau ai; ae maise o e ua latou faifai mea faatasi.

O le iuga po’o le taunuuga o le faamoemoe sili ona taua i le tagata soifua, e le o se tulaga e faia i se aso e tasi, po’o se tausaga e tasi; ae o le soifuaga atoa ma ona tala atu. Faauta i le faamanuiaga na maua e Iakopo, e ese lava mafaufauga faale-tagata, ese fuafuaga mamao faale-Atua ma lona finagalo.

O le faamanuiaga na auala mai i le tauiviga e i ai faigata ma puapuaga; o le faamanuiaga sa auala mai i manatu faaletonu o le tagata, ma togafitiga e fuafuaina i manatu faalotolotolua ma le-mautu. A o lona taunuuga, na faatoa iloa ai e le tagata auauna, e le ose mea e faia ina ia faaleaga i le tagata, ae ia manuia le lumanai mamao, mamao lava o le tagata talitonu ma faatuatua.

O le faamanuiaga e auala mai i le tagata e toatasi (Iakopo), na oo ina faamanuiaina ai i latou uma na tutupu ma ola mai ia te ia. Na faaigoaina lenei fanauga, o le Fanauga a Isaraelu, o le nuu o le Atua; na tausia e le Atua i la latou faigamalaga mamao, seia o’o ina taunuu i le Nuu folafolaina e tafe ai le meli ma le suasusu—o foliga na o le tagata ua faamanuiaina e le Atua.

MANATU #3: Aisea e le maua ai le pale o le manumalo?

O se fesili e ono tele i ai ni tali, aua e eseese ala ma mafua’aga ua solomuli ai le to’atele, ma faato’ilaloina ai isi i le matapoto o Satani. Ae o nisi nei o vaivaiga taatele o loo maua pea i le soifuaga faale-tagata: O le fiu gofie; o le masalosalo vale, ma le faalotolotolua o manatu; o le augata ma le faapalapala, atoa ma le faatu’utu’u e soso’o ai lava ma le nofonofo.

Ua ou ‘aumaia nei tauiviga e lua e fai ma “ata“ o le soifua auauna ma tautua i le Atua, e ala i le Ekalesia Kerisiano: (a) tauiviga a Iakopo ma le agelu na suia ai lona igoa—ua le o Iakopo, a e o Isaraelu (o ia o le tupuaga o le Nuu o le Atua); (b) tauiviga a IESU i ona faigata ma puapuaga na o’o ai i le faataunuuina o le valoaga sa folafolaina mai i le amataga. Sa lei faigofie i le Alii le faataunuuina o le faamanuiaga ua tuuina mai e lona Tama ia te IA. Na toetoe ina a faavaivai. Peitai, o lana toe onosai lava na ia faapea ane ai, “ae ui lava i lea, aua le faia lo’u loto a o lou finagalo.”

O le taunuuga o le faamoemoe, sa amata i faigata ma puapuaga: Na afio mai Iesu Keriso le Alo Pele e toatasi o le Atua le Tama, ina ia toe avatu le tagata ua to’ilalo i le matapoto o Satani. R ui ina faigata, ae sa le faafiti le Alii o Iesu, na o’o lava ina maliu ai ina ua ta’usalaina, peitai, e leai sana agasala. Na tanumia o IA i le tuugamau, a e na toe soifua mai ina ua mavae aso e tolu. Ua afio IESU i le lagi e nofo i le itu taumatau o lona Matai; ua avea ai o IA e fai ma Fautua i le Tama, ina ia faamagaloina agasala a le lalolagi uma.

E moni lava, ia tatou tauivi ina ia tatou manumalo. Tauivi ma tatalo, finau ma faalagolago i le Atua. Taofi mau i a’upega o le taua—onosai, faapalepale, mata alofa; aua le faaitaita gofie, faamaoni ma ia manatua lou Alii o Iesu, o lo tatou Taitai sili, tatou te manumalo ai ia Satani ma ana ‘au.

Tupulaga e, o tama ma teine, ia tautuana ma outou. Faafetai ua maua sa outou malologa i lenei taimi o le tausaga. O tupulaga, o le faamoemoe lumana’i o aiga, nuu, malo ma atunuu, e o’o lava i le Ekalesia. E tele pea faamanuiaga mo outou i le lumanai, a e ia outou mataala ma ‘alo’aloese i togafiti ma mailei a le alii o le lalolagi, e faaseseina ai outou.

Ia manatua le faavae mautu o le Kerisiano faamaoni: O le mata’u ma ava i le Alii, o le amataga lava lea o le poto. Ona o Keriso Iesu lo tatou Alii.

AMENE.

———————————————————————————————————————

Rev. Emau S. Petaia, F.S.

Leone – 06/08/08

4^th. Sunday after Pentecost.

———————————————————————————————————————

1. 06/08/08: Leone/taeao – 4^th. Sunday after Pentecost

2. 09/27/98: Leone;

3. 06/25/95: Fort Lewis;

4. 06/25/89: Seattle-II;

5. 04/27/86: Seattle-II.

———————————————————————————————————————–

Revized for Website: 11/24/10

“Tau aua le faavaivai–ua e manumalo.”

| Sermon | Faaolaina, Finau, Ioane 17:9, Lauga, Lototele, Manumalo, Puapuaga, Tatalo, Togiola

L A U G A

Tusi Faifau: Ioane 17:1-11

Oto’oto: (f.1) “Ua fetalai atu ia mea e Iesu, ona tepa a’e lea o ona fofoga i le lagi, ua faapea atu, “Lo’u Tama e, ua oo mai le aso. Tuu mai ia le mamalu i lou Atalii, na ia tuu atu foi e lou Atalii le mamalu ia te oe…(f.3) O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea. …(f.9) Ou te tatalo mo i latou; ou te le tatalo mo le lalolagi, a o i latou na e foaiina mai ia te au, aua o ou tagata lava i latou.”

Matua: (f.9) “Ou te tatalo ma i latou; ou te le tatalo mo le lalolagi, a o i latou na e foaiina mai ia te a’u, aua o ou tagata lava i latou.”

Manatu Autu: “Tau aua le faavaivai—ua e manumalo.

Upu Tomua: O le a sou lagona pe afai e te faalogo, ua faapea mai se tasi ia te oe: E te iloa, o loo tatalo le Ekalesia mo ‘oe. Atonu e te ‘ata’ata, ma leai sou manatu mamafa i lea faamatalaga! Ae afai e te faalogo atu, a o loo feagai nei ‘oe ma se tulaga faigata i lou ola, ona ou talitonu lea, e matua pa’i mai i lou loto ma lou tino le filemu ma le mafanafana.

O loo faagasolo pea i Amerika Samoa, sauniga-tatalo mo “Toa-o-Samoa” i le tafa-o-taua. E le o se fuafuaga mama lenei faamoemoe o le atunuu, a e maise lava i aiga, nuu, e oo lava i Ekalesia o loo lotolotoi ana tama-fanau i totonu o le lalolagi vevesi. Tatou te matua mana’omia lava, ma naunau o tatou loto ina ia saogalemu ma toe foi mai ma le manuia! A o ai la e mautinoa, e mafaia lena mea?

Fai mai Ioane, a o mafuta le Alii ma ona Soo, na fetalai IESU: “Ou te tatalo mo i latou; … i latou na e foaiina mai ia te a’u, aua o ou tagata lava i latou….” (f.9) Ioe, e moni o So’o na iai i lena taimi, a o le “tino” o le Ekalesia Kerisiano, o ‘oe lena ma a’u foi lenei. O loo tatalo IESU, e aofia ai ‘oe ma i tatou uma ua aofia nei, e tapua’i i le Agaga ma le faamaoni.

Se’i o tatou mafaufau atili i lenei mataupu, aua o le Aso Sa lenei, e faailogaina ai le Afio a’e o IESU i le lagi, ae tu’ua ona Soo i le lalolagi ma lana poloaiga: “Ia outou o, ia fai nuu uma lava mo’u So’o.”

MANATU #1: O loo tatalo pea IESU a o tatou lotolotoi ai i le lalolagi tumu i faigata ma puapuaga—o le mea lea ua tatou manumalo ai.

O IESU, o loo faia le galuega o le fautua mo a tatou agasala i aso uma. Ma, e tatau foi ona tatou manatua, e lei mamao le Eseta. Fai mai ua toe-tu manumalo Iesu mai le tuugamau ma le oti! O le manumalo lea ua tatou manumalo ai! Ae o le a le uiga moni o le upu “manumalo” mo ‘oe ma a’u, ma i tatou uma?

Silasila foi, o le finagalo o le Atua, ia soifua manuia le tagata i le lalolagi na ia saunia: O lona uiga, ia tatou ola ai ma lotolotoi ai i totonu o le lalolagi e iai faigata ma puapuaga—o le taua o loo fai pea ma Satani—o le fili. O le agaga lena o loo faavae ai upu o la tatou Tusi Pese 166: “O Mai ia Soma e, ia finafinau, Le taua lelei le taua ua tau; Lo tatou Atua e ’au ma tatou, E ona le mana e manumalo. (2) Le taua lenei na tau ai Iesu, Ua le mafai ai Satani e tu, Aua lona ulu na tuipala ai, I ona po lava na faiaina ai. …etc.”

IOE, e te tau a ua e manumalo! Malo ia Iesu! O i latou o loo tau, ia tau ma le loto toa, tau ma le loto malosi—ua manumalo ona o Iesu Keriso.

E talitonu le toatele o foma’i popoto, o le tasi lenei o vailaau aoga mo le tagata-ma’i, o lona loto ma lona mafaufau e mafai ai ona ola pea. Peitai, e toatele isi tagata-lolotu o loo “tau” ma le faalotolotolua, tau ma le loto masalosalo i le “manumalo” ua uma ona saunia e Keriso Iesu. Faafofoga foi: “…Ou te tatalo mo i latou; … i latou na e foaiina mai ia te a’u, aua o ou tagata lava i latou….”

Amuia oe Samoa! Amuia oe le tagata o le Ekalesia Kerisiano! Afai lava e te tau ma lou loto talitonu, e le fo’i fua le avea o oe ma ‘autau faamoemoeina o le talalelei ia Iesu Keriso. E faapei ona faamoemoe “Toa-o-Samoa” i la ta tatalo faifai pea: E faapea foi ona tatou maua le loto tele, o loo tatalo pea IESU aua le faamagaloina o a tatou agasala.

MANATU #2: (f.11) “Ou te le i ai pea i le lalolagi, a o i latou, e i le lalolagi lava i latou; ou te alu atu foi ia te oe. Le Tama paia e, ia e tausi ia i latou i lou suafa o e na e foai mai ia te a’u, ina ia tasi o i latou, faapei o i taua.”

O le tasi lenei o lu’itau malosi mo le ‘autau a Keriso i le lalolagi, ona e fevaevaea’i i latou ia te i latou lava. E tele taimi e fe’ese’ese ai ‘aulotu ma ekalesia. Mai le uluai Ekalesia Kerisiano i le lalolagi, e fe’ese’esea’i lava ma faatutu mai isi tagata e sui a’i le suafa o Iesu Keriso. Ua fia ni talaiga e ’ese igoa ia o loo latou aumaia? E le tioa a tatalo lo tatou Alii: Le Tama paia e, ia e tausi ia i latou i lou suafa o e na e foai mai ia te a’u, ina ia tasi o i latou, faapei o i taua.”

IOE, e i ai lava fe’ese’eseaiga e auala mai ai mea-sili, ma faaalia ai le finagalo alofa o le Atua mo le tagata faatuatua moni.

O lou ulufale mai ma ‘auai i sauniga lotu i totonu o le Malumalu i Aso Sa fai pea, o le tasi lea o avanoa e faaa’upegaina ai ’oe ma i tatou ta’ito’atasi, i “mea-tau” faale-Agaga, tatou te tau ai le taua ma le “alii o le lalolagi”, o le Tiapolo lea.

“Tau ‘aua le faavaivai—ua e manumalo, e ala ia Iesu Keriso.” O IA na upuvaleina, na faamasinoina, na i’u i le oti i luga o le satauro, na tanumia i le manava o le eleele, a e na toe-tu mai ina ua mavae aso e tolu: O le togiola lea na IA saunia mo le lalolagi agasala, ina ia faaolaina. O le pogai lea na tatalo faatauanau ai Iesu, ma ole atu i lona Tama, mo i latou uma ua talitonu ma faatuatua.

Ua afio IESU i le lagi e faia le galuega o le fautua mo a tatou agasala ia faamagaloina. O lona finagalo, ia mafuta faatasi i latou ua talitonu ma faatuatua i le Togiola ua uma ona saunia: Na ia poloa’i mai: “Ia outou faia lenei mea ma Faamanatuga ia te a’u i aso uma tou te aai ai, ma feinu ai, se ia ou toe afio mai.” I le suafa o le Keriso Iesu. AMENE.

—————————————————————————————————————————————————-

Rev. Emau S. Petaia, F.S.

Pavaiai, Felaugaaiga Matagaluega i Sisifo.

05/04/08

—————————————————————————————————————————————————-

1. 05/04/08: Pavaia’i/taeao – 05/04/08

Ascension Sunday

Revized for Website: 11/23/10

“O le manumalo i tala atu o le tuugamau.”

| Sermon | Eseta, Korinito, Manumalo, Tuugamau

L A U G A

Tusi Faitau: 1 Korinito 15:19-26

Matua - f.26 – “O le toe fili e faaumatia, o le oti lea.” (f.20) “A o lenei, ua toe faatuina mai Keriso i e ua oti, ua avea ma faapolopolo o e ua momoe.”

Manatu Autu: “O le manumalo i tala atu o le tuugamau.”

Upu Tomua: Ua tusia e Paulo, “Ua toe faatuina mai Keriso i e ua oti.” O se faamatalaga e ese lona taua i le Tusi Paia atoa (15:20). E foliga e faigofie, peitai, o lona faatinoga ua aliali mai ai—e matua tele lava le mau taofi.

Tele ituaiga lotu i le lalolagi, ua tofu ia talitonuga ma mea e faa’autu i ai a latou a‘oa‘oga: O le lotu Puta e tapuai i faatagata; o isi e tapuai i le la; a o nisi foi e tapuai i se tagata-ola e mata-saua ma fefefe ai tagata.

Ae tasi le lotu e faa’autu ana a’oa’oga i lona Ta’ita’i na maliu a ua toe-tu mai—sa oti, a ua toe soifua: “E le’i toe maliu lava e oo i le faavavau.” O se mea e ofo ai, o lotu pito tetele i le lalolagi: lotu Kerisiano, lotu Moameta, lotu Iutaia—e faavae mai uma lava i le aai o Ierusalema.

I le aso o le Eseta, e matua faatumulia Ierusalema i tagata lotu Kerisiano, ma le lotu Moameta. O se vaaiga pito iloga i tagata maimoa: E fiafia le Kerisiano ona o le Eseta, e faailoga ai le Alii Toe Tu; a o tagata Moameta, o le faamanatuina o lo latou Ta’ita’i na maliu, o loo tanumia pea e o’o mai i le aso nei.

Tatou te manatua le Ulua’i Aso Eseta—o le taeao na usu po ai Maria le Makatala, ma isi fafine i le tuugamau na foa i le papa o Iosefa le Aremataia, ae taunuu atu ua leai se IESU. E peiseai o se tuugamau na o le tolu aso e faaaoga ai, ma toe faafoi ia Iosefa e ona le fanua.

O le amataga o le lalolagi na faatoilaloina ai le tagata, ua tusia i le Kenese, o le poloaiga e i ai le aso e tuuina mai ai le manumalo i le tagata mai ona fili. E le o se manumalo faafitafita tau; ae o le faatoilaloina o le oti i le le-toe oti lava; e faatoilaloina foi le tanumia, i le toe-tu mai. Ae le gata i lea, o Le sa faatauvaa i manatu o le lalolagi, e faaeaina i le Nofoalii ma le Atua le Tama—o le manumalo e le mafaia i se isi malosi faale-lalolagi, vagana le finagalo o le Atua le Tama. O le manumalo na mitamita ai Paulo, e pei ona tusia ma molimau ai—o le uiga o le manumalo e maua i le Tupu ua toe-tu mai; o lena ua maua ai lo tatou faamoemoe taua lumanai—o le ola faavavau pe a salamo ma faatuatua.

MANATU #1: O lo tatou faamoemoe i le toe-tu o Keriso—e i tala atu o le tuugamau.

“Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.” [15:19].

Na iloa e Paulo lona tulaga a o lei avea ma tagata Kerisiano. Na iloa foi e Paulo o fiafiaga ma le manuia faale-tino, o mea e gata i le olaga nei: aua o le tuugamau, o le muta’aga o mea e vaaia faale-tino. Peitai, o mafaufauga faale- Kerisiano, e le o le tino e gata ai: E le gata i le olaga nei…ae o le faamoemoe e i tala atu o le oti ma le tuugamau.

Na soifua Iesu i le soifuaga moni faa-tagata-ola; o le iuga o le tagataola—o le oti. Ae o le Toe-Tu mai o IESU, ua iloa ai o le manumalo e faatino i tala atu o le oti.

E leai se lotu na te a’oa’oina lea talitonuga, vagana le Kerisiano. O le pogai lea ua le taua ai i le Ekalesia Faapotopotoga Kerisiano Samoa ni tagata ta’uta’ua ua maliliu: E pei o Iosefa Samita; Ms. White i le Lotu Aso Fitu; po’o Paaula i le lotu Baha’i, etc.

E mitamita le Kerisiano, e pei o ‘oe ma a’u: O le aso Eseta, na o le Toe-Tu e taua—e leai se isi mea i ona tala atu. Faauta i le lalolagi taufaasese, ua tauau ina faamatala le Eseta i fuamoa, ma le anoano o isi mea faaopoopo ua faatupu e le lalolagi faatosina ma le tu’inanau vale. O le Toe-Tu o Iesu mai le tuugamau, o le faamoemoe pito sili ona taua i le tagata Kerisiano loto talitonu i le Ulua’i aso Eseta—le taeao na o atu ai tina i le tuugamau ma iloa ai ua tu’ufua.

MANATU #2: O le faamoemoe i lo tatou toe tutu mai ia Keriso—e i tala atu o le tuugamau.

“Ua toe faatuina mai Keriso nai e ua oti … (21) aua ua oo mai le oti ona o le tagata, ua oo mai foi le toe tutu o e ua oti ona o le tagata. (22) Aua faapei ona oti uma ia Atamu, e faapea foi ona faaolaina uma ia Keriso. (23) A e peitai e taitoatasi ma lona lava tofi; o le uluai fua o Keriso ia, mulimuli ane o e ua fai mona i lona toe afio mai.” [15:20a-23]

Na muamua agasala Atamu ma Eva i le faato’aga i Etena; o le faato’ilaloina lena o le tagata. Sa tele tausaga na to’ilalo ai pea. Ina ua mavae le lua-afe ma ona tupu tausaga, ona saunia lea e le Atua le ala e faaeaina ai le tagata to’ilalo: O le afio mai o le Faaola i le lalolagi, ma ola ai i le lalolagi—sa inosia ma tuulafoa’iina e tagata o le lalolagi; na o’o ina fasiotia ma tuu i le tuugamau. O le Aso Eseta muamua lava, na usu atu ai Maria le Makatala ma isi fafine i le tuugamau, ua latou vaavaai: ua leai se tino maliu o IESU o i ai.

O le faailoga lena o le manumalo, aua e le o le “oti o le iuga o mea uma, ae o le oti o le mutaaga o mea tuai, ae toe faafou i le olaga fou.” O lona uiga, o le tuugamau e le o le gata’aga, ae o le amataga o le ola-fou. Seiloga e oo i le oti, ona faatoa maua lea o le faamoemoe sili o le ‘au Kerisiano—i tala atu o le oti e maua ai.

MANATU #3: O lo tatou faamoemoe i le pule Toe Tu a Keriso—e maua i tala atu o le tuugamau.

“Ona oo ai lea i le gataaga, e tuuina atu ai e ia le malo i le Atua, o le Tama lea, pe a uma ona faaumatia e ia o alii sili uma, ma faipule uma, ma e malolosi. (25) Aua e tatau ona pule o ia, seia tuuina e ia ona fili uma lava i lalo o ona vae. (26) O le toe fili e faaumatia, o le oti lea.” [15:24-26]

Ua aumaia e Paulo lenei ata o le manumalo, aua ua faatoilaloina uma e fai fili i le malo o le Atua: e faaumatia alii sili uma, faipule uma, ma e malolosi.

Fai mai Paulo, “…e taitoatasi ma lona tofi …” o e mulimuli ia te IA ma faia lona finagalo e maua e i latou le manuia. O lona uiga, o tala atu o le tuugamau e faatasi ai ma le Alii Toe Tu, aua ua le toe i ai se malosi o le oti e faagata ai le tagata. Ae o le Toe-Tu, o le faailoga o le manumalo.

MANATU #4: E lua mea taua e maua i le Eseta Toe-Tu.

O mea e tatau ona tatou iloa ma malamalama ai:

(1) Afai e moni o i tatou o Kerisiano, o lona uiga tatou te le-popole i le “oti faaale-agaga.”

(2) Afai tatou le talitonu i le Eseta Toe-Tu, o lona uiga, ua tatou iloa le manuia e maua i le ola faavavau.

Pe ai se a? Aua foi, e tatau ona tatou muamua ui mai i le “Aso Maliu”; ia tatou muamua iloa le taua o le “Aso Maliu”. O lona uiga, ia tatou tiga faatasi ma Keriso puapuagatia; ia tatou ui mai ma faalogo i upu faatauemu ma le itagia o le lalolagi; ae mulimuli ane, tatou te toe tutu mai faatasi ma Keriso. Faapei ona molimau le aposetolo o Paulo:

“Aua ua oo mai le oti ona o le tagata, ua oo mai foi le toe tutu o e ua oti ona o le tagata. …..Faapei ona oti uma ia Atamu, e faapea foi ona faaolaina uma ia Keriso……Ua toe faatuina mai Keriso i e ua oti, ua avea ma faapolopolo o e ua momoe.”

Pe tatou te ola, pe tatou te feoti, o fanau lava i tatou a le Atua, e ala i le manumalo o Iesu Keriso ua toe-tu.

AMENE.

————————————————————————————————————————————————————–

Rev. Emau S. Petaia, F.S.

Leone – 03/23/08

Aso Sa Eseta

—————————————————————————————————————————————————————-

1. 03/23/08: LEONE/Taeao (Eseta).

2. 04/16/95: Fort Lewis (Eseta).

Revized for Website — 11/20/10

“O le manumalo i tala atu o le tuugamau.”

| Sermon, Special | Eseta, Korinito, Manumalo, Tuugamau

L A U G A

Tusi Faitau: 1 Korinito 15:19-26

Matua - f.26 – “O le toe fili e faaumatia, o le oti lea.”

f.20 – “A o lenei, ua toe faatuina mai Keriso i e ua oti, ua avea ma faapolopolo o e ua momoe.”

Manatu Autu: “O le manumalo i tala atu o le tuugamau.”

Upu Tomua: Ua tusia e Paulo, “Ua toe faatuina mai Keriso i e ua oti.” O se faamatalaga e ese lona taua i le Tusi Paia atoa. E foliga e faigofie, peitai, o lona faatinoga ua aliali mai ai—e matua tele le mau taofi ma talitonuga.