L A U G A

Tusi Faitau: Feagaiga Tuai: Kenese 32:22-32; Feagaiga Fou: Luka 22:39-46.

Matua:     Kenese f.26B ….. “Ou te le tuuina atu lava ‘oe seia e faamanuia mai ia te a’u.

Luka f.44a ……… “Ua puapuaga o ia, ua atili ai lana tatalo.”

Manatu Autu:    “O le taunuuga o le faamoemoe faa-Kerisiano.”

Faatomuaga:       O le upu ‘tauivi, tauiviga; finau, finauga; tau, taua; tauva, ma le tauvaga’: E tasi lo latou faamoemoe—ia maua le manumalo; ia faaeaina i le numera tasi; ia maua le fu’a o le faailoga, ma faapaleina i le pale matagofie ua saunia mo le ua manumalo.

O le tala na faitauina i le Kenese, o le faamanuiaga lea na maua e Iakopo mai le Atua.  E lua vaega taua o i lea faamanuiaga: (i) O le aganuu ma tu faa-Isaraelu, e avatu le faamanuiaga i le ua aopito matua o le fanau. (E foliga faapea foi aganuu faa-Samoa.)  O Esau ma Iakopo, ua na o le to’alua i laua; e matua Esau, ae ui’i Iakopo.  O lona uiga, e tatau ona maua le faamanuiaga o le ulumatua e Esau. (ii) O le tala na faitauina, ua na o le faamanuiaga i faaupuga. A o lona faataunuuina moni, lea o le a tatou mafaufau i ai; a e sa le’i faia foi lenei faamanuiaga i se ‘auala faigofie.

E faapea foi i le tala ua tusia e Luka: O le tauiviga i faigata ma puapuaga na feagai ma le Alii o Iesu.  Na mua’i folafolaina le finagalo o le Atua—o le a fanau mai le tama, e i lona ua le malo.  Na faatoa faataunuu i le Feagaiga Fou: I le afio mai o le Alo Pele e toatasi o le Atua le Tama i le lalolagi. Sa le’i faigofie lenei faatinoga, aua na faafeagai ma faigata ma puapuaga.

O nei tauiviga uma e faia e le tagata i le lalolagi, e le faale-tino ae faale-Agaga.  Ae ui ina faale-Agaga, a ua  auala mai i mea e vaai i ai mata, faalogo i ai taliga, aua o ala pito faigofie ia e malamalama lelei ai tagata o le lalolagi.

Manatu #1:  Ia tauivi ma teu pea i le loto, o a mea e tutupu mai i luma atu.

So’o se tagata taumafai mo le manumalo, e tatau ona i ai i le mafaufau ma lona loto se “ata” po’o foliga o le mea ua tausinio i ai.  Ae o lea foi sini o le faamoemoe, o loo i ai se mea e fiafia ai le loto o le ua finau.

E tupu le le fiafia o se ‘au taaalo, pe a fai ‘ae le malo i taaloga.  A o se ata latalata mai i le mafua’aga: Ai ona ua le lelei ona a’oa’oina—e le’i lava sauniuniga.  A to’ilalo le itutaua, e le taumate e to’atele nisi o i latou ua ‘uma ai lo latou soifua; a e o e ua totoe, e ta’ita’iina i latou e fai ma pologa po’o ni pagota.  E tuua’iina le ‘au tau to’ilalo, ona e le’i lava a latou sauniuniga.

O le le lava o a’upega, o le faatamala o le ta’ita’i po’o tagata tau—o nisi na o mafu’aga taatele, e ala ai ona faatoilaloina se ‘au tau sauniuni mo le taua.

Manatu $2:  A faalogo i upu o faamanuiaga, mafaufau i ou tiute ma matafaioi.

A lagona i taliga faamatalaga, ona fuafua lea e le loto ma le mafaufau tulaga e mafai ona faia e le tagata.  O le faatinoina ma lona faataunuuina, e tofu lava le tagata ma lagona eseese—e faalagolago lena i mea na soifua mai ma le tagata: i lona aiga, i lona atunuu, faapea i le li’o o le mea ua nofo tumau ai; ae maise o e ua latou faifai mea faatasi.

O le iuga la, po’o le taunuuga o le faamoemoe sili ona taua i le tagata soifua, e le ose tulaga e faia i se aso e tasi, po’o se tausaga e tasi; ae o le soifuaga atoa ma ona talatu.  Faauta i le faamanuiaga na maua e Iakopo, e ‘ese lava mafaufauga faale-tagata, ‘ese fuafua mamao a le Atua soifua.

O le faamanuiaga na ‘auala mai i tauiviga e i ai faigata ma puapuaga; o le faamanuiaga sa ‘auala mai i manatu faaletonu o le tagata ma togafitiga e fausia i manatu faalotolotolua ma le le mautu; a o lona taunuuga e faatoa iloa tonu ai e le tagata auauna, e le ose mea e faia ina ia faaleaga i le tagaga, ae ia manuia le lumana’i mamao, mamao lava o le tagata talitonu.

O le faamanuiaga e ‘auala mai i le tagata e toatasi (Iakopo) na o’o ina faamanuiaina ai i latou uma na tutupu ma ola mai ia te ia.  Na ta’ua lenei fanauga, o le Fanauga a Isaraelu, o le Nuu o le Atua; na tausia e le Atua i la latou faigmalaga mamao, se’ia o’o ina taunuu i le Nuu Folafolaina, e tafe ai le meli ma le suasusu—o foliga na o le tagata ua faamanuiaina e le Atua.

Manatu #3:  Ai se a ua le maua ai le pale o le manumalo?

O le fesili e tali i ai o tatou tagata ta’ito’atasi; aua e ese’ese ala ma mafua’aga ua solimuli ai le to’atele, ma faato’ilaloina i le matapoto o Satani.  Ae o nisi nei o vaivaiga taatele o loo maua pea i le soifuaga faaletagata: O le fiu gofie; o le le atoatoa o le loto talitonu; o le ‘augata ma le faapalapala, atoa ma le faatuutuu e soso’o ai lava ma le nofonofo.

Ua ou ‘aumaia nei tauiviga e lua: (i) tauiviga a Iakopo ma le agelu, lea na suia ai lona igoa—ua le toe ta’ua o Iakopo, a e o Isaraelu (o ia o le tupuaga o le Nuu o le Atua); (ii) ma le tauviga a le Alii o Iesu i ona faigata a o sauniuni pea mo le faataunuuina o le valoaga na folafolaina mai i le amataga.

Sa le’i faigofie i le Alii le faataunuuina o le faamanuiaga ua tuuina ia te IA.  Na toetoe ina faavaivai.  Peitai, o lana toe onosa’i lava na ia faapea ane ai, “ae ui lava i lea, aua le faia lo’u loto a o lou finagalo.”  O le finagalo ia faataunuu le faatinoga o le Togiola—e ala i lona maliu ma lona toe soifua mai le tuugamau ma le oti.  Na toe soifua IESU, ma afio i le lagi e mafuta faatasi ma le Tama, ina ia fautua mo a tatou agasala, a e tatou sao atu ai i le manuia e faavavau faavavau lava.

Uso e i la Keriso, tatou tauivi pea ina ia tatou manumalo.  Tauivi ma tatalo, finau ma faalagolago i le Atua.  Taofi mau i a’upega o le taua—onosa’i, faapalepale, mata alofa, aua le faaitaita gofie, faamaoni ma ia manatua lou Alii o Iesu, o lou ta’ita’i sili lea.

Ona o Keriso lo tatou Faaola. …….. AMENE.

——————————————————————————————————

06-08-08 rev. Leone – 4th after Pentecosgt;

09-27-98 Leone;

06-25-95 rev. Ft. Lewis

06-25-89 rev. Sii

04-27-86 Sii

——————————————————————————————————-

Revized for Website   06/30/2012