L A U G A

Tusi Faitau: Galuega 2:14a, 22-32

Matua – ff.14a, 22-24:  “Ona tulai lea o Peteru, atoa ma le toatinoagafulu ma le toatasi, ua fai atu ma le leo tele ia te i latou …. (f.22) Sema e, o outou Isaraelu e, faalogo mai ia i nei upu; o Iesu o le Nasareta, o le tagata ua faasinoina e le Atua ia te outou i mea mamana, ma vavega, ma faailoga ua faia e le Atua i o outou luma e ia, pei ona outou iloa foi; (23) o ia ua tuuina mai e le pule tonu ma le fuafuaga a le Atua anamua, ma outou faamau i le laau ma fasioti i lima o tagata faaletau-pulea. 

1. O ia ua faatuina mai e le Atua, ua na tatala i puapuaga o le oti, aua na le mafai ona 
2. taofiina ai o ia.”

O upu e faamamafaina:  “…O Iesu o le Nasareta, o le tagata ua faasinoina e le Atua ia te outou …;  o ia ua tuuina mai e le pule tonu ma le fuafuaga a le Atua anamua, ma outou faamau i le laau ma fasioti i lima o tagata faaletaupulea. … O ia ua faatuina mai e le Atua, ua na tatala i puapuaga o le oti, aua na le mafai ona taofiina ai o ia.”

Manatu Autu: “O le tala lelei mai le Atua e ola ai.”         [kerugma/gospel]

Upu Tomua:  O le molimau i le Uluai Aso Eseta, ua faalagolago tele i tala na tusia e le ‘au faievagelia—Mataio, Mareko, Luka, Ioane.  Peitai, e i ai foi tala faamauina tatou te maua i le tusi o Galuega o ulua’i so’o o Iesu, a e maise le ‘au aposetolo e pei o Paulo.

Ua uma le Toe-Tu (Eseta), a e ua amata ona tupu ma olaola le mafutaga tuufaatasi o e ua talitonu ma mulimuli ia IESU—o le na faasatauroina, tanumia, ma ua toe tu mai nai le oti.

O le tusi o Galuega a le ‘Au Aposetolo, ua taua ai le faasalalauina o le “talitonuga o Iesu le Keriso, o le Mesia ma le Faaola.”  Ma, o le faamaoniga o nei mea uma, e taulamua ai lava le faamatalaga e uiga i le Ulua’i Aso Eseta, o le aso o le Toe-Tu mai le tuugamau.  Fai mai upu tusia, “O Iesu lava lena, ua toe faatuina e le Atua; o molimau i matou uma i lena mea.” (f.32).  O le molimau e leai se masalosalo, a ua mautinoa e i latou sa vaavaai i ai.

O upu ua tusia, o se vaega o le Lauga a Peteru i le Aso Penetekoso, o le aso na afio ifo ai le Agaga Paia e fai ma fesoasoani i tagata o le Ekalesia a Iesu Keriso.  Ma o le amataga foi lea o le “galuega folafola” (laugaina o le finagalo o le Atua) i le Nuu Paia ma le lalolagi atoa.

O se tasi lenei o mafua’aga e tatau ai ona faamuamua le ta’utinoga, a e le’i amataina se Lauga:  “O le lauga i le suafa o le Atua le Tama, le Alo, ma le Agaga Paia.”  O le finagalo folafola lea o le Atua, e ala i le laugaina o upu mai le Tusi Paia e faatatau i le finagalo o le Atua.

O le “finagalo la o le Atua”, ua le o se mataupu itiiti pe faatauvaa:  aua o le “finagalo” o le Atua ua tusia atoa ai le Feagaiga Tuai, a e maise lava i le tusi o Esoto.  O le “finagalo” foi lea o le Atua ua faaauau mai pea i le Feagaiga Fou, ua faatutotonu ai le “galuega o le faaolataga na saunia e Iesu Keriso”: I lona soifua auauna, soifua na faatigaina ma mafatia, na faasatauroina, na maliu ma ua tanumia i le tuugamau, a e faai’u i le Eseta o le Toe-Tu.

Ona afio a’e ai lea i le lagi, e fai ma Fautua i le Atua le Tama, ina ia faamagaloina a tatou agasala faifai pea i lea aso ma lea aso.

O le “tala i le faaolataga”, o le autu lea ma le faavae o le “tala lelei” ia Iesu Keriso, lea o loo tatou auauna ai nei, ma tautua ai pea i Lana Ekalesia Kerisiano i le lalolagi.

Ia manuia le Aso Sa o le Eseta!  O le aso o le manumalo o Keriso i le oti ma le tuugamau, ina ia ola ‘oe ma a’u—i le manuia e faavavau, faavavau lava.

Amene.

—————————————————————————————————————————————————————-

LEONE/Afiafi 03-23-08    

Easter Sunday

—————————————————————————————————————————————————————

1. 03/23/08:  Leone (lotu afiafi)

(Mosser  p.114) – Easter

Revized for the Website—11/20/10

-3-

L A U G A

Tusi Faitau: 1 Korinito 15:19-26

Matua -  f.26 – “O le toe fili e faaumatia, o le oti lea.” (f.20) “A o lenei, ua toe faatuina mai Keriso i e ua oti, ua avea ma faapolopolo o e ua momoe.”

Manatu Autu: “O le manumalo i tala atu o le tuugamau.”

Upu Tomua: Ua tusia e Paulo, “Ua toe faatuina mai Keriso i e ua oti.”  O se faamatalaga e ese lona taua i le Tusi Paia atoa (15:20).  E foliga e faigofie, peitai, o lona faatinoga ua aliali mai ai—e matua tele lava le mau taofi.

Tele ituaiga lotu i le lalolagi, ua tofu ia talitonuga ma mea e faa’autu i ai a latou a‘oa‘oga: O le lotu Puta e tapuai i faatagata; o isi e tapuai i le la; a o nisi foi e tapuai i se tagata-ola e mata-saua ma fefefe ai tagata.

Ae tasi le lotu e faa’autu ana a’oa’oga i lona Ta’ita’i na maliu a ua toe-tu mai—sa oti, a ua toe soifua:  “E le’i toe maliu lava e oo i le faavavau.”  O se mea e ofo ai, o lotu pito tetele i le lalolagi: lotu Kerisiano, lotu Moameta, lotu Iutaia—e faavae mai uma lava i le aai o Ierusalema.

I le aso o le Eseta, e matua faatumulia Ierusalema i tagata lotu Kerisiano, ma le lotu Moameta.  O se vaaiga pito iloga i tagata maimoa:  E fiafia le Kerisiano ona o le Eseta, e faailoga ai le Alii Toe Tu; a o tagata Moameta, o le faamanatuina o lo latou Ta’ita’i na maliu, o loo tanumia pea e o’o mai i le aso nei.

Tatou te manatua le Ulua’i Aso Eseta—o le taeao na usu po ai Maria le Makatala, ma isi fafine i le tuugamau na foa i le papa o Iosefa le Aremataia, ae taunuu atu ua leai se IESU.  E peiseai o se tuugamau na o le tolu aso e faaaoga ai, ma toe faafoi ia Iosefa e ona le fanua.

O le amataga o le lalolagi na faatoilaloina ai le tagata, ua tusia i le Kenese, o le poloaiga e i ai le aso e tuuina mai ai le manumalo i le tagata mai ona fili. E le o se manumalo faafitafita tau; ae o le faatoilaloina o le oti i le le-toe oti lava; e faatoilaloina foi le tanumia, i le toe-tu mai.  Ae le gata i lea, o Le sa faatauvaa i manatu o le lalolagi, e faaeaina i le Nofoalii ma le Atua le Tama—o le manumalo e le mafaia i se isi malosi faale-lalolagi, vagana le finagalo o le Atua le Tama. O le manumalo na mitamita ai Paulo, e pei ona tusia ma molimau ai—o le uiga o le manumalo e maua i le Tupu ua toe-tu mai; o lena ua maua ai lo tatou faamoemoe taua lumanai—o le ola faavavau pe a salamo ma faatuatua.

MANATU #1:  O lo tatou faamoemoe i le toe-tu o Keriso—e i tala atu o le tuugamau.

“Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.” [15:19].    

Na iloa e Paulo lona tulaga a o lei avea ma tagata Kerisiano. Na iloa foi e Paulo o fiafiaga ma le manuia faale-tino, o mea e gata i le olaga nei: aua o le tuugamau, o le muta’aga o mea e vaaia faale-tino.  Peitai, o mafaufauga faale- Kerisiano, e le o le tino e gata ai: E le gata i le olaga nei…ae o le faamoemoe e i tala atu o le oti ma le tuugamau.

Na soifua Iesu i le soifuaga moni faa-tagata-ola; o le iuga o le tagataola—o le oti.  Ae o le Toe-Tu mai o IESU, ua iloa ai o le manumalo e faatino i tala atu o le oti.

E leai se lotu na te a’oa’oina lea talitonuga, vagana le Kerisiano. O le pogai lea ua le taua ai i le Ekalesia Faapotopotoga Kerisiano Samoa ni tagata ta’uta’ua ua maliliu: E pei o Iosefa Samita; Ms. White i le Lotu Aso Fitu; po’o Paaula i le lotu Baha’i, etc.

E mitamita le Kerisiano, e pei o ‘oe ma a’u: O le aso Eseta, na o le Toe-Tu e taua—e leai se isi mea i ona tala atu.  Faauta i le lalolagi taufaasese, ua tauau ina faamatala le Eseta i fuamoa, ma le anoano o isi mea faaopoopo ua faatupu e le lalolagi faatosina ma le tu’inanau vale.  O le Toe-Tu o Iesu mai le tuugamau, o le faamoemoe pito sili ona taua i le tagata Kerisiano loto talitonu i le Ulua’i aso Eseta—le taeao na o atu ai tina i le tuugamau ma iloa ai ua tu’ufua.

MANATU #2:  O le faamoemoe i lo tatou toe tutu mai ia Keriso—e i tala atu o le tuugamau.

“Ua toe faatuina mai Keriso nai e ua oti … (21) aua ua oo mai le oti ona o le tagata, ua oo mai foi le toe tutu o e ua oti ona o le tagata. (22) Aua faapei ona oti uma ia Atamu, e faapea foi ona faaolaina uma ia Keriso. (23) A e peitai e taitoatasi ma lona lava tofi; o le uluai fua o Keriso ia, mulimuli ane o e ua fai mona i lona toe afio mai.”  [15:20a-23]

Na muamua agasala Atamu ma Eva i le faato’aga i Etena; o le faato’ilaloina lena o le tagata.  Sa tele tausaga na to’ilalo ai pea.  Ina ua mavae le lua-afe ma ona tupu tausaga, ona saunia lea e le Atua le ala e faaeaina ai le tagata to’ilalo:  O le afio mai o le Faaola i le lalolagi, ma ola ai i le lalolagi—sa inosia ma tuulafoa’iina e tagata o le lalolagi; na o’o ina fasiotia ma tuu i le tuugamau.  O le Aso Eseta muamua lava, na usu atu ai Maria le Makatala ma isi fafine i le tuugamau, ua latou vaavaai: ua leai se tino maliu o IESU o i ai.

O le faailoga lena o le manumalo, aua e le o le “oti o le iuga o mea uma, ae o le oti o le mutaaga o mea tuai, ae toe faafou i le olaga fou.”  O lona uiga, o le tuugamau e le o le gata’aga, ae o le amataga o le ola-fou.  Seiloga e oo i le oti, ona faatoa maua lea o le faamoemoe sili o le ‘au Kerisiano—i tala atu o le oti e maua ai.

MANATU #3:  O lo tatou faamoemoe i le pule Toe Tu a Keriso—e maua i tala atu o le tuugamau.

“Ona oo ai lea i le gataaga, e tuuina atu ai e ia le malo i le Atua, o le Tama lea, pe a uma ona faaumatia e ia o alii sili uma, ma faipule uma, ma e malolosi. (25) Aua e tatau ona pule o ia, seia tuuina e ia ona fili uma lava i lalo o ona vae. (26) O le toe fili e faaumatia, o le oti lea.”  [15:24-26]

Ua aumaia e Paulo lenei ata o le manumalo, aua ua faatoilaloina uma e fai fili i le malo o le Atua: e faaumatia alii sili uma, faipule uma, ma e malolosi.

Fai mai Paulo, “…e taitoatasi ma lona tofi …” o e mulimuli ia te IA ma faia lona finagalo e maua e i latou le manuia.  O lona uiga, o tala atu o le tuugamau e faatasi ai ma le Alii Toe Tu, aua ua le toe i ai se malosi o le oti e faagata ai le tagata.  Ae o le Toe-Tu, o le faailoga o le manumalo.

MANATU #4:  E lua mea taua e maua i le Eseta Toe-Tu.

O mea e tatau ona tatou iloa ma malamalama ai:

(1)  Afai e moni o i tatou o Kerisiano, o lona uiga tatou te le-popole i le “oti faaale-agaga.”

(2)  Afai tatou le talitonu i le Eseta Toe-Tu, o lona uiga, ua tatou iloa le manuia e maua i le ola faavavau.

Pe ai se a?  Aua foi, e tatau ona tatou muamua ui mai i le “Aso Maliu”; ia tatou muamua iloa le taua o le “Aso Maliu”.  O lona uiga, ia tatou tiga faatasi ma Keriso puapuagatia; ia tatou ui mai ma faalogo i upu faatauemu ma le itagia o le lalolagi; ae mulimuli ane, tatou te toe tutu mai faatasi ma Keriso.  Faapei ona molimau le aposetolo o Paulo:

“Aua ua oo mai le oti ona o le tagata, ua oo mai foi le toe tutu o e ua oti ona o le tagata. …..Faapei ona oti uma ia Atamu, e faapea foi ona faaolaina uma ia Keriso……Ua toe faatuina mai Keriso i e ua oti, ua avea ma faapolopolo o e ua momoe.”  

Pe tatou te ola, pe tatou te feoti, o fanau lava i tatou a le Atua, e ala i le manumalo o Iesu Keriso ua toe-tu.

AMENE.

————————————————————————————————————————————————————–

Rev. Emau S. Petaia, F.S.

Leone – 03/23/08

Aso Sa Eseta

—————————————————————————————————————————————————————-

1. 03/23/08:  LEONE/Taeao  (Eseta).

2. 04/16/95:  Fort Lewis (Eseta).

Revized for Website — 11/20/10

L A U G A

Tusi Faitau: 1 Korinito 15:19-26

Matua -  f.26 – “O le toe fili e faaumatia, o le oti lea.”

                 f.20 – “A o lenei, ua toe faatuina mai Keriso i e ua oti, ua avea ma faapolopolo o e ua momoe.”

Manatu Autu: “O le manumalo i tala atu o le tuugamau.”

Upu Tomua: Ua tusia e Paulo, “Ua toe faatuina mai Keriso i e ua oti.”  O se faamatalaga e ese lona taua i le Tusi Paia atoa.  E foliga e faigofie, peitai, o lona faatinoga ua aliali mai ai—e matua tele le mau taofi ma talitonuga.

Tele ituaiga lotu i le lalolagi, ua tofu ia talitonuga ma mea e faa’autu i ai a latou a‘oa‘oga: O le lotu Puta e tapuai i faatagata; o isi e tapuai i le la; a o nisi foi e tapuai i se tagata-ola e mata-saua ma fefefe ai tagata.

Ae tasi le lotu e faa’autu ana a’oa’oga i lona Ta’ita’i na maliu a ua toe-tu mai—sa oti, a ua toe soifua:  “E le’i toe maliu lava e oo i le faavavau.”  O se mea e ofo ai, o lotu pito tetele i le lalolagi: lotu Kerisiano, lotu Moameta, lotu Iutaia—e faavae mai uma lava i le aai o Ierusalema.

I le aso o le Eseta, e matua faatumulia Ierusalema i tagata lotu Kerisiano, ma le lotu Moameta.  O se vaaiga pito iloga i tagata maimoa:  E fiafia le Kerisiano ona o le Eseta, e faailoga ai le Alii Toe Tu; a o tagata Moameta, o le faamanatuina o lo latou Ta’ita’i na maliu, o loo tanumia pea e o’o mai i le aso nei.

Tatou te manatua le Ulua’i Aso Eseta—o le taeao na usu po ai Maria le Makatala, ma isi fafine i le tuugamau na foa i le papa o Iosefa le Aremataia, ae taunuu atu ua leai se IESU.  E peiseai o se tuugamau na o le tolu aso e faaaoga ai, ma toe faafoi ia Iosefa e ona le fanua.

O le amataga o le lalolagi na faatoilaloina ai le tagata, ua tusia i le Kenese, o le poloaiga e i ai le aso e tuuina mai ai le manumalo i le tagata mai ona fili. E le o se manumalo faafitafita tau; ae o le faatoilaloina o le oti i le le-toe oti lava; e faatoilaloina foi le tanumia, i le toe-tu mai.  Ae le gata i lea, o Le sa faatauvaa i manatu o le lalolagi, e faaeaina i le Nofoalii ma le Atua le Tama—o le manumalo e le mafaia i se isi malosi faale-lalolagi, vagana le finagalo o le Atua le Tama. O le manumalo na mitamita ai Paulo, e pei ona tusia ma molimau ai—o le uiga o le manumalo e maua i le Tupu ua toe-tu mai; o lena ua maua ai lo tatou faamoemoe taua lumanai—o le ola faavavau pe a salamo ma faatuatua.

MANATU #1:  O lo tatou faamoemoe i le toe-tu o Keriso—e i tala atu o le tuugamau.

“Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.” [15:19].    

Na iloa e Paulo lona tulaga a o lei avea ma tagata Kerisiano. Na iloa foi e Paulo o fiafiaga ma le manuia faale-tino, o mea e gata i le olaga nei: aua o le tuugamau, o le muta’aga o mea e vaaia faale-tino.  Peitai, o mafaufauga faale- Kerisiano, e le o le tino e gata ai: E le gata i le olaga nei…ae o le faamoemoe e i tala atu o le oti ma le tuugamau.

Na soifua Iesu i le soifuaga moni faa-tagata-ola; o le iuga o le tagataola—o le oti.  Ae o le Toe-Tu mai o IESU, ua iloa ai o le manumalo e faatino i tala atu o le oti.

E leai se lotu na te a’oa’oina lea talitonuga, vagana le Kerisiano. O le pogai lea ua le taua ai i le Ekalesia Faapotopotoga Kerisiano Samoa ni tagata ta’uta’ua ua maliliu: E pei o Iosefa Samita; Ms. White i le Lotu Aso Fitu; po’o Paaula i le lotu Baha’i, etc.

E mitamita le Kerisiano, e pei o ‘oe ma a’u: O le aso Eseta, na o le Toe-Tu e taua—e leai se isi mea i ona tala atu.  Faauta i le lalolagi taufaasese, ua tauau ina faamatala le Eseta i fuamoa, ma le anoano o isi mea faaopoopo ua faatupu e le lalolagi faatosina ma le tu’inanau vale.  O le Toe-Tu o Iesu mai le tuugamau, o le faamoemoe pito sili ona taua i le tagata Kerisiano loto talitonu i le Ulua’i aso Eseta—le taeao na o atu ai tina i le tuugamau ma iloa ai ua tu’ufua.

MANATU #2:  O le faamoemoe i lo tatou toe tutu mai ia Keriso—e i tala atu o le tuugamau.

“Ua toe faatuina mai Keriso nai e ua oti … (21) aua ua oo mai le oti ona o le tagata, ua oo mai foi le toe tutu o e ua oti ona o le tagata. (22) Aua faapei ona oti uma ia Atamu, e faapea foi ona faaolaina uma ia Keriso. (23) A e peitai e taitoatasi ma lona lava tofi; o le uluai fua o Keriso ia, mulimuli ane o e ua fai mona i lona toe afio mai.”  [15:20a-23]

Na muamua agasala Atamu ma Eva i le faato’aga i Etena; o le faato’ilaloina lena o le tagata.  Sa tele tausaga na to’ilalo ai pea.  Ina ua mavae le lua-afe ma ona tupu tausaga, ona saunia lea e le Atua le ala e faaeaina ai le tagata to’ilalo:  O le afio mai o le Faaola i le lalolagi, ma ola ai i le lalolagi—sa inosia ma tuulafoa’iina e tagata o le lalolagi; na o’o ina fasiotia ma tuu i le tuugamau.  O le Aso Eseta muamua lava, na usu atu ai Maria le Makatala ma isi fafine i le tuugamau, ua latou vaavaai: ua leai se tino maliu o IESU o i ai.

O le faailoga lena o le manumalo, aua e le o le “oti o le iuga o mea uma, ae o le oti o le mutaaga o mea tuai, ae toe faafou i le olaga fou.”  O lona uiga, o le tuugamau e le o le gata’aga, ae o le amataga o le ola-fou.  Seiloga e oo i le oti, ona faatoa maua lea o le faamoemoe sili o le ‘au Kerisiano—i tala atu o le oti e maua ai.

MANATU #3:  O lo tatou faamoemoe i le pule Toe Tu a Keriso—e maua i tala atu o le tuugamau.

“Ona oo ai lea i le gataaga, e tuuina atu ai e ia le malo i le Atua, o le Tama lea, pe a uma ona faaumatia e ia o alii sili uma, ma faipule uma, ma e malolosi. (25) Aua e tatau ona pule o ia, seia tuuina e ia ona fili uma lava i lalo o ona vae. (26) O le toe fili e faaumatia, o le oti lea.”  [15:24-26]

Ua aumaia e Paulo lenei ata o le manumalo, aua ua faatoilaloina uma e fai fili i le malo o le Atua: e faaumatia alii sili uma, faipule uma, ma e malolosi.

Fai mai Paulo, “…e taitoatasi ma lona tofi …” o e mulimuli ia te IA ma faia lona finagalo e maua e i latou le manuia.  O lona uiga, o tala atu o le tuugamau e faatasi ai ma le Alii Toe Tu, aua ua le toe i ai se malosi o le oti e faagata ai le tagata.  Ae o le Toe-Tu, o le faailoga o le manumalo.

MANATU #4:  E lua mea taua e maua i le Eseta Toe-Tu.

O mea e tatau ona tatou iloa ma malamalama ai:

(1)  Afai e moni o i tatou o Kerisiano, o lona uiga tatou te le-popole i le “oti faaale-agaga.”

(2)  Afai tatou le talitonu i le Eseta Toe-Tu, o lona uiga, ua tatou le iloa le manuia e maua i le ola faavavau.

Pe ai se a?  Aua foi, e tatau ona tatou muamua ui mai i le “Aso Maliu”; ia tatou muamua iloa le taua o le “Aso Maliu”.  O lona uiga, ia tatou tiga faatasi ma Keriso puapuagatia; ia tatou ui mai ma faalogo i upu faatauemu ma le itagia o le lalolagi; ae mulimuli ane, tatou te toe tutu mai faatasi ma Keriso.  Faapei ona molimau le aposetolo o Paulo:

“Aua ua oo mai le oti ona o le tagata, ua oo mai foi le toe tutu o e ua oti ona o le tagata.  Faapei ona oti uma ia Atamu, e faapea foi ona faaolaina uma ia Keriso.  Ua toe faatuina mai Keriso i e ua oti, ua avea ma faapolopolo o e ua momoe.”  

Pe tatou te ola, pe tatou te feoti, o fanau lava i tatou a le Atua, e ala i le manumalo o Iesu Keriso ua toe-tu.

AMENE.

———————————————————————————————————————————————————-

Rev. Emau S. Petaia, F.S.

Leone – 03/23/08

Aso Sa Eseta

———————————————————————————————————————————————————

1. 03/23/08:  LEONE/Taeao  (Eseta).

2. 04/16/95:  Fort Lewis (Eseta).

Revized for Website — 11/20/10

L A U G A

Tusi Faitau: Ioane 20:19-31

Matua – ff.30-31:  “O isi faailoga e tele na faia e Iesu i luma o ona soo, e lei tusia i lenei tusi. A ua tusia ia mea, ina ia talitonu ai outou, o Iesu o le Keriso lava ia, o le Alo o le Atua; ina ia maua ai foi le ola i lona suafa e outou o e talitonu.”

Manatu Autu::  “Ina talitonu pea ia.”

Upu Tomua: So’o se lauga po’o se tusi e tusia, e tofu lava ma le faamoemoe taua e taula’i i ai.  Ma, o lea faamoemoe o se mana’oga e naunau i ai ina ia faataunuuina.

Ua tuana’i le aso o le Toe-Tu o le Alii, a o ona so’o ua nonofo pea ma mafaufau i mea sa tutupu—o mea e matua ofoofogia.  O faamatalaga a le ‘au faievagelia, Mataio, Mareko, Luka, ma Ioane—o i latou ia na faalagolago i ai le faavaeina o le Lotu Kerisiano i le amataga o le Lotu; aua o i latou foi ia sa molimau tino i mea sa tutupu i lo latou Alii.

Ua molimau Ioane:  “A ua tusia ia mea, ina ia talitonu ai outou, o Iesu o le Keriso…o le Alo o le Atua; ina ia maua… le ola i lona suafa e outou o e talitonu.” O le faamoemoe taua o Ioane, ia faitau ma talitonu tagata, o Iesu lava o le Alo o le Atua, sa maliu ua toe-tu mai le tuugamau—Ia outou talitonu i ai i lena molimau.

Ua iloa e Ioane, e tele nisi mea e le mafai ona tusia.  A o lenei foi tala, o se tautinoga ua tusia mo le lalolagi faatuatua, e aofia ai foi ma i tatou.  Ua le o faapea mai Ioane, “ona pau ai lea o mea e ao ina outou iloa e uiga i le Alo o le Atua.”  Ua tusia lenei “molimau” i le agaga, ia tosina atili mai ai loto o e faitau, “ina ia talitonu ai…o Iesu o le Keriso…o le Alo o le Atua…e maua ai le ola i lona suafa…o e talitonu.”

E ofoofogia le tala i le toe-tu, aua ua na aumaia le faaolataga, e ala i le faamagaloina o agasala a le lalolagi.  Ae peitai, e le mafai ona tatou saoloto e o atu loa ‘aumai lenei ola fou ia Keriso.  Aua ua tatou ola i le lalolagi e fefiloi mea lelei ma mea leaga; o lo tatou ola taumafai ia maua le faamoemoe taua i le lumana’i, e pei ona molimau Ioane, ua le o faigofie ona maua. Ae o le tele o mea faigata o loo faalavelave i le ala, e mafua lava ona o le tagata: o le tu’inanau, o le mana’o tele, o le losilosi vale, ma isi lava mea faapena ua fai ma pa pupuni e ave’esea ai le loto talitonu o le tagata.

A o le fesili:  “O le a sa tatou mea e fai i ai?  Pe tuu ai pea ‘ea le tagata ina ia leaga? e pei ona leaga mai i le amataga?  O le “ola faa-Kerisiano”, poo le sini o le Lotu Kerisiano: “Ia talitonu mai pea.”

MANATU #1:  Talitonu i le Tusi Paia (Roma 15:4).

“O mea uma foi na tusia anamua, na tusia ia e a’oa’o mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.”

E le ola le tagata talitonu i sona lava poto, e ola ina ua mulimuli tonu i a’oa’oga a Iesu.  E le maua lena poto-fou ini mataupu faale-lalolagi; e le maua i le tele o tupe; e le maua i se tulaga poo se faailoga maualuga; faatoa maua ina ua mulimuli i a’oa’oga a Iesu ma faamaoni i ai.

Na amataga le Lotu Kerisiano i le loto talitonu.  O le talitonu o so’o o Iesu ma e na mulimuli ia te ia, na fai lea ma pogai o lo latou taofi mau i foliga o Iesu: o ana galuega na fai; o ana a’oa’oga; atoa ma mea sa femaliua’i ai i lea itu ma lea itu o le Aai Paia—o ata maumaututu ia o le faatuatuaga ia Iesu, o le Alo o le Atua.

Ua mavae aso ma tausaga; ua maliliu foi le toatele na faatasi ma Iesu, a e tauave pea mea na masani ai.  O auga tupulaga na sosoo ane, ua latou faalagolago i tala-tuu ma isi tusi na tusia e so’o ma le ‘au aposetolo.  Ua oo ina latou faavasega ma tuufaatasi faamatalaga taua, ina ia saga faamalosia ai pea le loto talitonu, o Iesu lava o le Alo o le Atua.

O nei tala faamaumau e le Uluai Ekalesia, ua fai ma faavae o lo tatou ola talitonu, o Iesu Keriso lava le Alo o le Atua.  O le pogai lea o le molimau a Paulo:  “O Tusi Paia uma lava e mai le agaga o le Atua ia; e aoga e a’oa’o ai, e a’oa’i ai, e faapoto ai foi le mafaufau.”  E le o se polofesa faale-poto-salalau na tusia, e pei o tusi lauiloa i nei ona po.  O le finagalo poto o le Atua, lea o loo a’oa’o mai mo i tatou, ina ia tatou talitonu ma maua le ola fou ia Keriso.

E i ai le poto o le lalolagi na te taumafai e ave’ese le loto talitonu ia Iesu.  E le fiafia le poto-salalau e faitau i le Tusi Paia. Ae toatele tagata-lolotu, ua sili ona taua le faitau nusipepa ma tala i tifaga.  O nisi ua na o le Aso Sa i le lotu e iloa ai le Tusi Paia.  A o nisi foi, ua o mai lava e tapua’i i le Atua, e aunoa ma se Tusi Paia.

IOE, o faailoga na, ua amata ona faatoilaloina lo tatou loto talitonu i le Alii o Iesu, o le Alo o le Atua.  Ua i ai pa pupuni malolosi ma maualuluga ua na taofiofi le tagata talitonu ia Iesu Keriso.  Afai e aunoa le tagata tapua’i i le Atua ma le Tusi Paia, o lona uiga ua le moni ona manatu ia Iesu Keriso, o le Alo o le Atua, e pei ona molimau le faievagelia o Ioane.

MANATU #2:  Faitau, su’esu’e, talitonu ma le le masalosalo.

O le tasi o pa pupuni malosi ma le maualuga na te ave’esea le loto talitonu: o le loto masalosalo.  E faamaonia lena ata i le so’o o Toma, o le so’o ua leva ona faafeagai ma Iesu, a e na faaleagaina lava o ia i ona mafaufauga ma ona manatu.

O faaosoosoga o le lalolagi, e le na o mea e vaavaai i ai mata; e sili foi ona faigata ma auala gofie mai i mafaufauga o le loto. E tupu le talitonu ina ua mafuta faatasi ma isi; a e o le nofo toatasi ma le mafuta  i se tasi, e oo ai ina osofa’ia le tagata i ona lava manatunatuga leaga ma mafaufauga sese.  E tupu ia mea, ona o le loto masalosalo ma le faalotolotolua.  E le na o Toma le so’o loto masalosalo; o le masalosalo o Peteru na mafua ai ona faafiti—na te le iloa poo ai Iesu.

E taatele lenei pa pupuni i o tatou tagata fia mafuta faatasi ma Iesu: E loto toa pe a vaavaai mai le toatele; ae a tuua loa taitoatasi, ona oo mai lea o faaosoososoga ma tofotofoga e vaivai ai.

Na amata le Lotu Kerisiano, o le faapotopotoga o e ua talitonu ia Iesu Keriso o le Alo o le Atua le Tama.  O le faamoemoe taua o lenei faapotopotoga, ia tumau pea le loto talitonu ia Iesu Keriso—e faatino i le nofo fetausia’i, faifai mea faatasi, ma tumau faatasi i le nonofo fealofani.  O le loto talitonu lava lea e mafua ai le tapuai faatasi, su’esu’e ma sailiili faatasi, ma e manatunatu ai foi ma galulue faatasi i mea e manuia ai le Ekalesia Kerisiano.

O le faavae tumau lea e tasi o le Lotu Kerisiano, e ala ai lo tatou faatasitasi pea, ma atina’e faatasi le galuega mo Iesu Keriso, o le Alo o le Atua le Tama.

MANATU #3:  O le Agaga Paia.

O le toe malosi faamoemoeina lenei o le tagata talitonu: “Ua ia fetalai atu lea mea, ona manava atu lea o ia ia te i latou ma faapea atu, “Ia outou talia le Agaga Paia…” (f.22).

Ua tatou faitau ma iloa, o le Aso Penetekoso, o le aso lea na afio ifo ai le Agaga Paia i le Uluai Ekalesia Kerisiano.  Peitai, e mulimuli ona o’o i lea aso, a ua leva ona i ai le fesoasoani o le Agaga Paia i e na talitonu ia Iesu Keriso.  O le malosi lenei e lei tuuina mai i nisi lava tagata, vagana i latou ua talitonu ma tumau i le faatuatua ia Iesu Keriso.

O le malosi uiga ese lenei na mafai ai e le ‘au Kerisiano i le tele o tausaga ma tausaga, ona faia vavega ma mea ofoofogia.  O le fesoasoani na te faamalolosia i tatou i lo tatou faapea ane, “Ina talitonu pea ia.” … Aua o Iesu lava o le Alo o le Atua, o ia na aumaia le ola fou ina ia tatou ola ai, e ala i lona soifua auauna, mafatia ma puapuagatia, na oo lava ina maliu i le satauro.  Peitai, na toe soifua Iesu Keriso mai le oti ma le tuugamau, ua avea ma Fautua i le Atua le Tama, ina ia tatou maua le manuia ma le ola faavavau, faavavau lava.

AMENE.

———————————————————————————————————————

Rev. Emau S. Petaia, F.S.

Leone/taeao:

1^st. Sunday after Easter 2008.

———————————————————————————————————————————

1. 03/30/08:    Leone/taeao – 1^st. Sunday after Easter

2. 04/10/94:    Fort Lewis;

3. 04/10/88:    Seattle II – 1^st. Sunday after Easter

Revized for the Website:  11/22/10

Malumalu O Siona Le Mauga Paia (EFKAS)
Aso Sa – Aperila 04, 2010 – Itula 5:00-6:15 am.

“Tapua’i i le Malamalama o le Eseta”
[Easter Sunrise Service]

FAASOLOGA
[Ta’ita’i: Rev. Emau S. Petaia, F.S.]
LOGO MUAMUA: 4:45 am. …….[Pogisa le Malumalu]……..Ulufale i le Malumalu SIONA
[Faamumu moliga’o]
LOGO AMATA – 5:00 am. ………..[Logo (3) Amata] ………………………………….. AMATA.
VALAAU E TAPUA’I I LE ATUA …………………………………………TA’ITA’I:
[Call To Worship] Rev. Emau Petaia, F.S.
“I le suafa o le Atua le Tama, le Atua le Atalii, ma le Atua le Agaga Sa”
[Faapotopotoga] ……………………………………..AMENE.
Tina/TAMA’ITA’I:
Tula’i ia, ina malamalama ia, aua ua oo mai lou malamalama; ua alu a’e foi le
pupula o le Alii i ou luga.
Tane/o ALII:
Aua faauta mai, e ufitia le lalolagi i le pouliuli, e ufitia foi nuu i le pogisa; a e afio
a’e le Alii i ou luga, ma le pupula o le Alii e aliali mai lea i ou luga.
FAATASI:
E o mai nuu ese i lou malamalama, o tupu foi e o mai i latou i le pupula o lou alu a’e.
[Ta’ita’i] — Tatalo Amata ………………………………………………………………..Amene.
[Titina Moliga’o]

Congregational Christian Church of American Samoa in Leone,
[Ekalesia Faapotopotoga Kerisiano o Amerika Samoa i Leone.]
Malumalu o Siona le Mauga Paia;
“Tapua’i i le Malamalama o le Eseta 2010.” (Easter Sunrise Worship);
Aso Sa o le Eseta, Aperila 04, 2010; Itula 5:00-6:15 am.
Tala:  “UA TOETU IESU.”
Featuring (pesepesega):  “Siona Church Choir - Easter Music.”
ALL ARE INVITED.