L A U G A

Tusi Faitau: Feagaiga Tuai:  Isaia 43:1–12;  Feagaiga Fou:  Roma 8:12–17

Matua – Isaia 43:6,7—- “Ou te fai atu i le itu i matu, Tuu mai ia; ma le itu i toga, Aua le taofia; au mai ia o’u atalii ai mea mamao, ma o‘u afafine ai le tuluiga o le lalolagi; (7) o i latou uma ua igoa i lo‘u igoa, na ou faia ia viia ai a‘u; na a‘u gaosia ma ‘ou faia lava i latou. (Roma 8:17b) …pe afai tatou te tiga faatasi ma ia, ina ia faamanuia foi i tatou faatasi ma ia.”

Manatu Autu: “Ia tatou foliga ia te Ia.”

Faatomuaga:   Ua tofu i tatou ma lona aiga e tupu mai ai—o le vaaiga faaletino lea.  A e afai tatou te manatunatu faale-Agaga, ona tatou faapea ane lea: ‘O i tatou o fanau a le Atua i le Ekalesia Kerisiano’.

E seasea o’o i ai se manatu faale-lalolagi, vagana ua ulufale le tagata i le Malumalu, ma tapuai i le Atua i le faamaoni, ona lagona ai lea o le musumusuga lilo a le Agaga Paia.  A mata’u ma ava i le Atua, ona tosina lea o le loto e tapua’i ma vivii i le suafa mamalu o le Atua soifua.  O le faamaoniga lea, o i tatou lava o le fanau a le Atua le Tama, le Alo, ma le Atalii—o e ua mafuta faatasi i le Ekalesia Kerisiano.

E iloa le fanau a le Atua, e le gata i le ta’u, ae ona o mea latou te faia, aua na poloa’i IESU: “O atu ia outou i le lalolagi uma, ina tala’i atu ai le tala lelei i tagata uma lava. (16) O le faatuatua ma papatisoina, e faaolaina ia; a o le le faatuatua, e faasalaina ia.”  (Mareko 16:16,17).

Ua molimau le Kenese, e le’i tuulafoaiina le Ulua’i tagata e le Atua.  Na poloai le Atua ia Atamu ma Eva, ia pule i laua i mea uma o loo i le faatoaga, ae ia tautuana lava—ia la usiusita’i.  A e paga lea, ua le usiusita’i!  Ua oo ina a’afia ai “foliga paia o le Atua na fai a’i le tagata.”  Ae le’i tuulafoaiina e le Atua le tagata, ua na saili mai pea i se tasi e usiusitai ma faamaoni, e ‘auala mai ai lona finagalo.  Ua o’o ina filifilia le auauna o Aperaamo; a o e na tutupu mai ia Aperaamo, o Isaraelu ua fai ma “nuu o le Atua.”  Ae leai se mafaufau poo se agaga o le nuu, vagana i latou o loo nonofo ai i le nuu.

Ua tupu olaola le lalolagi, ua faitauina aso ma tausaga.  Ae fai mai upu o le valoaga, “o le a fanau mai lou Faaola, o le Mesia, i le faaatoaga o tausaga.”  Na faatino i le fanau mai o Iesu; ua le faapito tasi na o Isaraelu.  E faamaonia lea i le fetufaaiga a Iesu ma le fafine Samaria i luga o le vaieli:  Fai mai le fafine, “o Ierusalema o le mea lea e tatau ona tapuai ai le tagata i le Atua.”  Ae fetalai Iesu:  “Funa e, talitonu mai ia te a’u, e oo mai ona aso, tou te tapuai i le Tama e le gata i lenei mauga, poo Ierusalema … ua oo nei foi i ai, o e tapuai faamaoni latou te tapuai i le Tama i le agaga ma le faamaoni; aua o loo saili le Tama i e tapuai faapena ia te ia.”

O i tatou o le “fanau a le Atua, o e ua tapuai ia te IA.”

MANATU #1:  “O le alofa faa-tama i le fanau.”

Ua manino le “ata” ua aumaia e Isaia e uiga i le va feagai o le Atua ma Isaraelu, o le ata lava “o le alofa o le Atua i lana fanau.”  Na tausia Isaraelu e le Atua a o itiiti lava, na ta’ita’i ma faasino Isaraelu i le ala tonu.  Peitai, na le usiusitai ma le faalogo, ae na alofa pea le Atua.  E tele mea ofoofogia na saunia e le Atua e lavea’i ai Isaraelu, aua o foliga ia o le alofa o le Atua.

Ua mavae atu le Feagaiga Tuai, a e o loo faaalia pea le “alofa faa-Tama” i le tuputupu a’e o le Ekalesia Kerisiano—o lea foi ua tatou manuia ai, aua o i tatou lava o le fanau a le Atua i le Ekalesia.  Ua tatou manuia, aua o loo faaopoopo pea o tatou aso ma tausaga.  E tutupu pea faigata ma puapuaga, peitai, e sili ona tele mea tatou te fiafia ai nai mea e faanoanoa ai.  O le alofa faa-tama o le Atua, lea ua tatou lelei ai.

Ae aua nei galo, e tofotofoina lava le fanau a le Atua, pe tumau le faatuatua. Aua nei o tatou faameo pe a faafeagai ma puapuaga; aua le faavaivai pe solomuli pe a feagai ma faigata.  Fai mai le aposetolo o Paulo:  “Aua e ola le faatuatua ona o galuega.”

MANATU #2:  “O foliga o matua i fanau.”

Ua tusia i le Kenese, “Na faia e le Atua le tagata ia foliga ia te Ia.”  Ua le o foliga i le tino, a e o foliga o le faatinoga o mea lelei.  O lona uiga, ua avea i tatou o “fanau moni a le Atua,” pe a tatou faia mea lelei e viia ai le Atua.

Ae o le fesili:  Po’o e faatinoina ea foliga faatama o le Atua i lou soifua auauna i lou Atua?, e pei ona tuuina mai ai le saolotoga i le tagata?  Po’o e faia ea mea lelei mo se viiga o le Atua soifua?  Atonu, e toatele e vaivai ma le’i matutua i le tala lelei ia Iesu Keriso, ina ua latou le faia mea lelei ma faatino foliga faatama o le Atua.  A tatou faia mea lelei mo le Atua, ona tatou foliga ai lea i le Tama; ae afai tatou te le faia mea lelei mo le Alii, ona tatou foliga ai lea ia satani:  O foliga o le faifai mea leaga; o foliga o le faatupu vevesi; o foliga o le faatupu maseiga; o foliga o le fia pule o le tagata i lona lava ola, ae ma’imau ai mea-alofa a le Atua, ae maise le tautiga o matua na tausia ai i le tele o aso ma tausaga.  E leai se matua poto e le fia atagia foliga lelei i fanau.  Ae ona o le maaa o loto o le fanau, ua mafua ai foliga leaga i ni isi o fanau.

MANATU #3:  “Faamaoni ma usita’i e tauave foliga o matua.”

E tele tala i le Tusi Paia e maua ai faata’ita’iga lelei ma le taua i matua ma fanau.  Sa le’i faamaoni le Uluai tagata i le feagai ma lona Atua; a ua filifilia le auauna o Noa e faataunuu le poloaiga a le Atua.  Ua na o ia ma lana fanau ma mea-ola uma na i totonu o le vaa sa faaolaina i le Lolo; a o e na le faamaoni ma le usiusitai, na faaumatia i latou.  O le faamaoni o Aperaamo na ta’u amiotonuina ai.

E toatele fanau faamaoni ma usiusitai i le Atua, o le ala lea ua faapea mai ai upu o le Matua, “…au mai ia o’u atalii ai mea mamao, ma o’u afafine ai le tuluiga o le lalolagi; o i latou uma ua igoa i lo’u igoa, na ou faia ia viia ai a’u; na ou faia lava i latou.” 

O foliga o le faamaoni ma le usiusitai, onosai ma le faapalepale, o lena na auina mai ai le Alo Pele e toatasi o le Tama, na afio mai IESU ia maua se faata’ita’iga lelei mo le lalolagi; aua o foliga o le faamaoni ma le usiusitai: e le ‘alo pe faafiti i mea faigata; o foliga o le faamaoni e mafua ai ona tauivi e fai le amiotonu.

Ua ta’utino mai e Paulo le iuga o le fanau usiusitai ma faamaoni:  “Pe afai tatou te tiga faatasi ma ia (o Iesu lea), ina ia faamanuia foi tatou faatasi ma ia.”  O le manuia lena na siitia a’e ai Iesu ma mafuta faatasi ma le Tama i le Nofoalii silisili ese; o le faamanuiaga lea tatou te mafuta faatasi ai ma IA i le ola faavavau, pe afai tatou te tumau ia te Ia.

Uso e ia Keriso Iesu, o le agaga ma le faamoemeo, ia avea i tatou o fanau faamaoni ia Keriso, e ala i lana Ekalesia.  Aua nei o tatou faapea, “Se’i vagana ia ua o’o i lena tausaga, ona faafouina lea o a’u mo le Alii.”

Aua nei o tatou faapea.  Ia iloa ma mautinoa, o le o’o mai o le valaau i le tagata, e leai se tasi na te iloa.  O faalavelave ma mea tutupu faafuasei i le olaga, e le faavasegaina pe matua pe itiiti.

A o le alofa faa-tama, e le uma, e le gata, aua o Keriso Iesu lava, o Ia o le Atua alofa, e faavavau, faavavau lava.

AMENE.

———————————————————————————————————————

Rev. Emau S. Petaia, F.S.

Leone – 08/10/08 Taeao.

———————————————————————————————————————

1. 08/10/08:  Leone/taeao – 13^th. Sunday after Pentecost

2. 04/21/02:  Leone;

3. 05/15/94:  Fort Lewis;

4. 05/15/88:  Seattle-II.

—————————

Revized for Website:  11/24/10