L A U G A:
Tusi Faitau: 1 Peteru 1:13-25
Matua – ff.14-15: “Ia pei o fanau gaua’i, aua nei amio outou e tusa ma o outou tu’inanau tuai, a o valea outou; a e pei ona paia o ia na valaauina outou, ia faapea foi outou ona paia i a outou amio uma.”
Mantu Autu: “Ia faapaiaina outou mo le Alii.”
Faatomuaga: E tofu atunuu o le lalolagi ma a latou tu ma aganuu. I le malo o le Iunaite Setete o Amerika, ua i ai vaega ua vaevaeina ai le soifuaga o tagata, e faapei o lenei: E i ai tagata milionea, e i ai le vaega feoloolo, a e i ai foi le vaega e matua matitiva lava. E iloa gofie ia tulaga aua o tausaga ta’itasi, e faila ai lafoga o tupe-maua (income tax returns) a tagata o le atunuu. E i ai isi atunuu e faailogaina o latou aiga tau-tupu, e faapei o Peretania; a e le faapena le malo o Amerika. I le olaga faa-Samoa, ua ta’ua isi vaega o tagata, o tamalii; a e faaigoa foi isi o tufanua. O ia ituaiga o vaevaega, o mea lava e faia faale-tagata.
E ‘ese la filifiliga faale-tagata, e ese foi le faale-Atua. Na filifilia Isaraelu e fai ma nuu o le Atua; na filifilia Atamu ma Eva e leoleo ma va’ai le faatoaga i Etena. Peitai, ua le usiusitai ma ua fai o laua lava loto, o le pogai lea na faasalaina ai aua ua agasala. Na filifilia Aperaamo e fai ma faatama o le nuu o le Atua o Isaraelu; na usiusita’i o ia aua na ia te ia le loto talitonu ma le faatuatua i le Atua. Na oo ia te ia se faamanuiaga uiga ese, ua o’o mai lava i o tatou tupulaga—ua avea Aperaamo e fai ma “tama” o le ‘au faatuatua uma i le lalolagi. O ia vaevaega, e le faia faale-tagata, a e o le finagalo lava o le Atua soifua.
Fai mai le Manatu Autu: “Ia faapaiaina outou mo le Alii.” O lona uiga, ua o’o mai lava i o tatou tupulaga, e i ai pea filifiliga ua faia mo le Atua, e ala i tofi ma tiute ua valaauina ai i tatou ta’ito’atasi, tatou te galulue ma auauna ai mo le Atua.
Ma, afai ua faapaiaina i tatou ona o le Ekalesia Kerisiano ma le tala lelei ia Iesu Keriso, e tatau ona tatou fiafia ma faafetai, Aua o ai i tatou ua finagalo ai le Atua mo ‘oe ma a’u, e ala i ana Fe’au? O le pogai lava lea na tusi atu ai le aposetolo o Peteru i le ekalesia a Iesu Keriso, e ala i le ‘aioiga ina ia liliu ‘ese i uiga tuai e leaga, a e faatino uiga fou e lelei ma manuia ai: “Ia pei o fanau gaua’i, aua nei amio outou e tusa ma o outou tu’inanau tuai, a o valea outou; a e pei ona paia o ia na valaauina outou, ia faapea foi outou ona paia i a outou amio uma.” O lona uiga, ua faatonu mai o tatou tagata-lolotu, ia aua, aua lava nei faaseseina i tatou i tu’inanau ma faaosoosoga leaga o le lalolagi; a ia faapaiaina i tatou e fai mea lelei ma le amiotonu a le Atua, ona tatou maua lea o le manuia ma olioli e faavavau ia Iesu Keriso lo tatou Alii.
Ia manatua lenei mea, o filifiliga faale-Atua e tele lava ina faaosoosoina i tatou e le Tiapolo ina ia tatou faapea ifo “e leaga”, peitai, o mea ia tatou te maua ai le lelei ma le matagofie i le faai’uga o le filifiliga. E le tioa agasala ma ta’uvalea le leoleo faatoaga i Etena, aua ua muamua faalogo atu i le folafolaga, “o le a avea oulua e pei ni atua” pe a outou tago i ai. E le tioa foi le tupu o Nepukanesa na ‘aina e ilo, aua ua faamuamua le faamaualuga. E lelei le leaga muamua, a e faai’u i le olioli; nai lo le mimita muamua, a e faai’u i le faanoanoa ma le masiasi.
Ua tatou ulufale mai ma o tatou lava manatu eseese faale-tagata: (a) O isi ua faapea ane, ua ou sau i le lotu e vivii ma fafo’i le faafetai i le Atua; (e) o isi, ua ou sau e faataunuu uiga masani o le o i lotu i Aso Sa taitasi; (i) ae o isi lava tagata-lolotu, ua faapea ifo, ua ou ulufale mai ma le lagona o le loto salamo, ona o o’u uiga ma amioga sa ou faia e le tusa ai ma le finagalo o le Atua i aso ua mavae o lenei vaiasosa.
O lenei, ae ui lava e i ai pea i o tatou loto ta’ito’atasi ia uiga eseese faale-tagata, ua avea lava lenei Malumalu e fai ma nofoaga tatou te tuufaatasi ai i le loto ma le agaga, ina ia tatou tapua’i atu i le Atua i le usiusita’i ma le faamaoni lava.
O le vavae’eseina o le tagata mai le leaga, po’o le olaga tuai na leaga ai, o se tasi lea o mata’upu tutotonu i manatu ma mafaufauga o le na tusia lenei tusi ua faaigoaina, o “Peteru”. E faapea se talitonuga: E leai se tagata lelei ua faapaiaina mo Keriso Iesu e toe avea ma tagata leaga; ae o le tagata-leaga foi ma le agasala ua faapaiaina mo Iesu, o le a avea lava o ia ma tagata lelei e viia ai le Alii. Ma, o iina o loo faa’autu i ai le talitonuga faale-EFKAS, e faapea: “O le faailoga o le avea o le tagata e fai ma tagata ua faa-Ekalesiaina, o le vave’eseina lea o ia mai le leaga, ina ua loto salamo ma faatuatua i lona Alii o Iesu Keriso; o ia lava na afio mai i le lalolagi e saunia le togiola mo le lalolagi agasala; na maliu a e na toe soifua mai. Ua afio i le lagi e fai ma Puluvaga i le Atua, ina ia faamagaloina le tagata agasala.
Le aofia e, o le a ‘ea le uiga moni o lenei tapuaiga? Ou te talitonu, ua ala ona tatou potopoto mai, ina ia avea lenei tapuaiga ma faailoga o le tuuina atu o tatou loto ma agaga, e ala i le soifua auauna ma le ola galulue mo Iesu Keriso; o le mea lea e faapaiaina ai i tatou mo le Atua i galuega lelei uma lava.
Afai sa faalotolototua ou manatu ma lau faalogo i aso ma taimi ua mavae, ia toe fuata’i nei lou loto, ina ia moni lau “faapaiaina mo le Alii.” Ia tautuana, aua nei amata i le mimita, aua foi nei amata i le faamaualuga, a e ia pei lava o fanau ua gaua’i, ma fulitua i le leaga. Aua nei outou manatu ua lelei nei, aua e i’u ai i le leaga, pei o la le aposetolo o Paulo: “A ia outou manatu e le’i atoatoa nei, a e momo’e punoua’i i le lumanai ona o tofi ma tiute ua valaauina ai i tatou uma, mo Iesu Keriso ma lana Ekalesia Kerisiano.” O le aso nei, ma taeao, e o’o lava i le faavavau, faavavau lava. ………… AMENE.
