Upu Tomua:
O le faaauauina lenei o su’esu’ega faale-Tusi Paia i le Fono Tele III 1982 EFKAS i Kanana Fou. Ma, o lona lima lenei o aso, ma o le Pepa mulimuli foi lea o lenei Fono Tele, o le susuga i le faifeau o Apela Moananu, F.S. na saunia le Pepa, ua faaulutala, o le “Ekalesia ma A’oa’oga a Keriso i aso nei.”
O LE PEPA FAALE-TUSI PAIA:
Ua tatou o’o mai nei i le toe aso o la tatou su’esu’ega faale-Tusi Paia, ma ua ou talitonu, ua i ai se aoga ma se malamalamaga o lenei Fono Tele a le Ekalesia EFKAS ma lana galuega totino, e pei ona taumafai atu ai lenei vaega i lenei vaiaso. O la tatou toe mata’upu mo lenei aso, o “A’oa’oga a Keriso mo le taimi nei.” Ua vaevaeina lenei mataupu i ni vaega se lua:
(1) O fatuaiga moni a le Ekalesia e faatusatusa i fuafuaga o lo’o faia.
(2) O le Galuega faa-Misionare.
1. Fatuaiga moni a le Ekalesia (Mataio 23:23), Oi talofa ia te outou tusiupu ma faresaio, tagata faafiaamiotonu! Ua outou avatu mea e sefulu a’i o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni; e tatau pe ana faia nei mea, a e aua foi le tuu na mea. (6:33), A ia outou muai saili lona malo ma lana amiotonu; ona faaopoopoina atu lea o ia mea uma ia te outou.
Ua aliali mai i nei ona po se tulaga faale-manuia i le va o ni tagata se toalua po’o le toatele (pule ma tagata faigaluega) i Ofisa ma Kamupani, o nuu ma le malo. O le faamalamalamaga, e tusa lava poo le a se tulaga matuia poo se sese ua faia e se tagata faigaluega i totonu o se Ofisa, poo le tuai soo i galuega, e leai se mea e afaina ai o ia i lana galuega, pe afai ua uma ona ia tafaleina le alii pule i nisi auala sese e i ai le foai atu ia te oe ni tupe, mea’ai, ma nisi mea taua a le atunuu e i ai siapo ma toga. Po’o le a lava la le tele o le sese ma le matuia, o se mea ua fai e ono faamuta ai lana galuega i lea ofisa, e le mafai ona faate’aina ona ua lelei ona ia afifiina le pule i mea faamalie-loto.
Ua le gata foi i ofisa ma le malo, ae ua faapea foi i nuu ma alaalafaga. Po’o ai lava se taulealea po’o se isi foi o matai ua solia se tulafono po’o se finagalo o alii ma faipule o le alaalafaga, e le faasalaina lava pe afai ua uma ona ia faamalieina i latou o loo uuina le pulega o le nuu, e ala i mea ua foai atu i ai, e faapei o tupe, mea’ai ma nisi lava mea aoga.
O le mea e ofo ai le loto, ua oo lava i le galuega a le Atua, ua faaaoga ai lava ala eseese faapena i le va o le Faifeau ma le Ekalesia. Po’o le a lava le mea sese o le uso Ekalesia, ua le mafai lava ona faia i ai o se i’uga, e faapei o le aveese o lona tofi, ona o lea uso e lima malosi i le galuega e ala i lana foa’i, ma le tulaga faale-atunuu ma isi ituaiga fesoasoani; ua fai lena ma ala ua faigata ai i le Faifeau ma le Ekalesia ona aveese lona tofi.
O se ata faapea o lo’o faamalamalamaina e Iesu i ana a’oa’oga, e pei ona maua i la tatou tusi faitau (Mataio 23:23). Ua fai ma masani a le ‘au tusiupu ma faresaio, i lo latou va tu’utu’u- nonofo ma le Atua, le faia ma le ofoina atu o mea e fai ai la latou sefulua’i. ua latou faamamafaina ole ofoina atu o mea sili ma mea manogi i le Atua, ae ua latou le savavali ma faia le finagalo o le Atua. O lo latou manatu, o le ofoina atu o mea manogi ma mea sili mo le Atua, o le faia lea e i latou o le finagalo o le Atua, e le gata i lea, ae o le ta’uamiotonuina ai foi lea o i latou i luma o le Atua. Ae peitai, o le mea e silisili ona taua, lea ua latou le faia.
E le o mea e sefulua’i e ta’uamiotonuina ai oe i luma o le Atua, ae o le faia o le finagalo o le Atua ma lana amiotonu, Faauta, o le faalogo e sili lea i le taulaga, ma le usiusitai e sili lea i le ga’o o le mamoe po’a. (cf. 1 Samuelu 15:22).
I le ma lenei, ua poloa’iina i tatou ina ia tatou mua’i saili le malo o le Atua ma lana amiotonu (Mataio 6:33). O le manatu o loo faamamafaina i lenei tusi si’i, o lo tatou taumafai lea e fai le finagalo o le Atua, aua o le finagalo o le Atua e moni ma tonu. afai tatou te usiusitai i le finagalo o le Atua, ua tatou maua lona malo ma lana amiotonu.
2. Galuega faa-Misionare: .
Ua oo mai le afioga a le Alii ia Iona le atalii o Amitai, ua faapea mai, Ina tulai ia, ina alu i Nineva le aai tele, ma alaga atu i ai; aua ua o’o mai a latou agasala i o’u luma. (Iona 1:1-2); cf. Mataio 28:16-20). O lo’o manino mai i le Feagaiga Tuai le valaauina faapitoa a le Atua o Aperaamo, o le tupuga lea o Isaraelu (Kenese 12:1-3). Ua fetalai atu le Atua, Ona o oe Aperaamo o le a manuia ai aiga uma o le lalolagi. O lea foi le faamoemoe na filifilia ai e le Atua Isaraelu, ina ia fai ma lamepa e susulu atu i le lalolagi atoa, e fai ma vaa o le Tala Lelei e folau atu ma momoli atu le Upu Moni i so’o se tulimanu o le lalolagi (cf. Isaia 49:6).
Sa valaau faapitoa e le Atua o Iona, le atalii o Amitai, ona o lenei lava faamoemoe ina ia faaolaina tagata o le aai o Nineva. O le uiga o le igoa Iona, o le “lupe”, a o le igoa Amitai, o le “Upu Moni”. O le ‘lupe’ e faatatau ia Isaraelu, a o le ‘Upu Moni’, e faatatau lea i le Atua. Afai la o le a faaaogaina le faatusa o ia upu e lua (Iona ma Amitai), ona faitau lea faapea le fuaiupu muamua (f.1) “Ua o’o mai le afioga a le Atua ia Isaraelu le atalii o le Atua.” O lenei ua sunu’i tonu le finagalo o le Atua ia Isaraelu ina ia fai ma tagata tala’i o le faaolataga a le Atua. Ona faapea lea o se manatu, o Isaraelu o le Misionare, o le Auauna, o le Faifeau o le Tala Lelei.
O le valaauina la o Iona e le Atua e alu i Nineva, o se tasi o ulua’i laasaga e faamanino mai ai le galuega faa-Misionare i nuu ese. Ua o’o mai lava i le Feagaiga Fou, ua ta’u manino mai ai lenei lava finagalo o le Atua, o le faaolaina lea o le lalolagi atoa. Na fetalai Iesu i lona ‘au soo: Ina o atu ia e fai le galuega faatala’i i nuu uma, ina ia faatalaleleiina i latou. Ua tuuina mai ia te a’u le pule uma lava i le lagi ma le lalolagi. O lenei, ia outou o atu e fai nuu uma ma soo ma papatiso atu ia te i latou i le suafa o le Tama, ma le Atalii, ma le Agaga Paia. (Mataio 28:18-19).
Ua tuu ma’oti mai e le Alii lenei galuega i lona ‘au soo ona o i latou lava na sa vaavaai i galuega ma faailoga na faia e Iesu a o latou mafuta ma ia. Ua le o se poloaiga ua faia na o upu, a e peitai, o lo’o i ai ma upu faamalosi (encouragement) a le Alii e ona lenei poloaiga. Fai mai o ia: “Ou te ia te outou i aso uma lava.” Ia outou o e momoli atu le tala lelei i faitotoa uma o le lalolagi. Ia faapei o le aeto ona faaoso i ana tama, e faapepepepe i luga o lana tama; e faaloaloa ona apaau; e saposapo ia te i latou; na te ave foi i latou i luga i ona apa’au. Ua faapea foi ona faalototetele e le Alii lona au soo, ina ia o atu i le lalolagi uma; o atu aua o loo faaloaloa ona aao; na te ‘apo’apo outou ina nei pauu, o e tala’i le tala o le faaolataga a le Atua. Afai e ‘au ma i tatou le Alii, o ai se e faasagatau mai? (Roma 8:31).
O nisi ia o fatua’iga a le Ekalesia na filifilia ai i tatou e le Ao o le Ekalesia ina ia tatou faia. Ia manatua, o le faamoemoe o le Ekalesia a Iesu Keriso, ia papatisoina tagata uma ina ia fai ma so’o. E le o le to’atele o tagata (number) i se aulotu, ma le tele o mea fai (activities) ona faapea ifo ai lea ua olaola le galuega faale-agaga. E leai, o le ola o se galuega faa-faifeau, o le olaga faatuatua lea ina ia ola ai tagata uma ma tutumau ai. Afai e toatele tagata o se Ekalesia e ola i le amiotonu ma le faatuatua, o se galuega olaola lena.
O le mea lea le Ekalesia e, ua valaauina oe ina ia fai ma ta’ita’i e taulamua i le faia o le amiotonu; ia maua le alofa; ma ia galue ma le faamaoni i ou tiute ua filifilia ai oe e te galue ai. Ia faaopoopo i lena, ia faaauau pea tiute faa-Misionare o le tala’i atu i soo se tagata, soo se aiga, soo se nuu, soo se malo se’ia soo le lalolagi uma. Aua nei galo ia te oe le Ekalesia, o oe o le MISIONARE. O le tulaga faa-Misionare, o le faataunuuina lea o le poloaiga ia faasalalau le Tala Lelei i nuu uma lava o le lalolagi.
IA SOIFUA MA IA MANUIA LE FONO TELE III 1982!
