L A U G A — LEONE/ 07/05/09 — Proper 9 (14):
Tusi Faitau: OT — Esoto 14:21-25
NT — Galuega 2:1-13
Matua – Galuega 2:2 — “Ona faafuasei mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai.”
Manatu Autu: “O le mana o le Atua faapei o se matagi malosi.”
Tomua: O le tasi lenei o mea pito sili ona le malamalama ai le to’atele o tagata: “Po’o fea e sau ai le matagi?” E faigata aua e leai se tino o le matagi e mafai ona tago atu i ai le tagata, peitai, e i ai lona malosi tele e lagona ai i le tino o le tagata, e ui ina le va’ai i ai o tatou mata.
Ou te le tau faamalamalamaina le mata’utia o le matagi pe a o’o ina agi malosi mai. E tutupu so’o afa ma matagi malolosi i Samoa, a e faafetai i le poto ma le malamalama faasaienisi, ua mafai ai ona faailoa mai le pogai ma le mafua’aga o matagi malolosi, e ui lava ina faigata ona tatou iloa atoatoa nisi o uiga ma mafua’aga o le tutupu o afa mata’utia.
Ae ou te faapea atu: O le Atua lea o lo’o tatou tapua’i i ai, o le Atua e ofoofogia mea na te faia; o le Atua e mata’utia mea ua na faia mo le tagata soifua i le lalolagi. E faapei ona tatou le malamalama atoatoa i le mea e sau ai le matagi mata’utia, e faapena foi ona tatou le iloa atoatoa le o’o mai o le malosi ma le mana o le Atua, ua na faia ai mea ofoofogia mo le tagata i le lalolagi.
Fai mai le Matua: “Ona faafuasei mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai.” E ui lava o se mea ua leva ona tupu, a e a tatou faitau ma faalogo i nei upu, e peiseai e meia ma gatete o tatou tino i le mata’utia o mea sa tutupu, ona o le mana malosi o le Atua.
Ou te talitonu, ana fai a e leai ni mea ofoofogaia na faia e le Alii mo le tau faaolaolaina o le Ekalesia Kerisiano mai i le amataga lava, semanu ailoga e olaola ma tupu tele le tala lelei ia Iesu Keriso e o’o mai lava i nei ona po? Semanu ai lava tatou te tapua’i ini atua faapaupau, ni atua e fau ini fasila’au! Semanu, ai o tatou pologa e tau faaiila ma faalamolemole ni ma’a po’o ni papa tatou te tapua’i i ai! A le o lena foi, ai lava e tumu o tatou loto i le mata’u ma le popole, i le tau sailia ma sauniuni ni taulaga-tagata, e pei o tala ua tatou faalogo i ai mai anamua.
Peitai, i lenei taeao matagofie ma le filemu: Se Atua ina a ofoofogia mea ua na faia mo lo outou soifua ma si o tatou ola! O le ofoofogia o mea ua faia, lea ua tatou “‘oa’oa ai nei i faleseu”. Ua mavae le pouliuli, ua tuana’i foi le po, ua malama a’e le taeao o le tala lelei ia Iesu Keriso. Ua agi mai, ua taalili le agi o le Mana o le Atua fai mea ofoofogia.
Ua tatou faitau i le tala, i le ofoofogia o mea na faia i le Mana malosi o le Atua mo lona Nuu, fai mai o le “matagi tele mai le itu i sasa’e”, ua na taofi le suasami pei o se pa sima, a e savali ai le fanauga a Isaraelu i luga o le alititai, e pei ona tusia i le Esoto.
Ae le tasi se mea ofoofogia na faia e le Atua mo lona nuu o Isaraelu. E le’i faapitoa le Mana lea o le Atua na o le Feagaiga Tuai, a e na faateteleina i le Feagaiga Fou, e o’o mai lava i ona ponei. O ia mea ofoofogia, e le faatauina ini tupe, pe maua foi i se poto faale-lalolagi, e le maua lava i se malosi faale-tagata.
E faapei la ona le mafaia i mata o le tagata ona vaavaai atu i le mea e agi mai ai le matagi, e faapena foi ona tatou le iloa le taimi ma le ituaso e pa’i mai ai le malosi o le Mana o le Atua, e ala i mea ofoofogia ua na faia mo le tagata talitonu ma faatuatua i le Keriso toe-tu; le Keriso na saunia le togiola mo le faamagaloina o a tatou agasala. Sa inaina tagata Iutaia e saili ni ‘auala ma ni faiga e pupuni ai ma taofi le salalau atu o le Tala i le Faaolataga na saunia e le Keriso, le tala i le afio mai o Iesu Keriso i le lalolagi; na soifua ma inosia i le lalolagi; na faatigaina ma puapuagaina le Keriso e le lalolagi le malamalama; na o’o ina faasatauroina lo tatou Alii ma maliu ai. Sa tanumia i le tuugamau na foa i le papa, a e na toe soifua mai ina ua mavae aso e tolu. Ua afio Iesu i le lagi, e faatasi ma Tama. Ua avea o IA e fai ma Fautua, ina ia faamagaloina agasala a le lalolagi.
O le mea lea, ia outou talitonu mai, e mafaia i le Mana o le Atua ona galueaiina, faatinoina, ma faataunuuina mea faigata uma e le o’o i ai le poto, le malosi ma le tamaoaiga faale-lalolagi nei.
Le nuu o le Atua i lenei taeao o le Talisuaga a le Alii: O le upu moni, tatou te matua mana’omia le Mana o Keriso ia pa’i mai i o tatou loto ma agaga. Aua foi, o a lava mea faigata ma puapuaga o le olaga lenei e fetaia’i ma i tatou ona o le tala lelei ia Keriso—aua lava ne’i o tatou faavaivai, aua e faia pea mea ofoofogia i le Mana o Keriso Iesu lo tatou Alii, e faapei ona molimau afioga paia a le Alii le Atua.
Ua tatou molimauina le faigata o le lalolagi—ona o loo agasala pea le tagata. Afai e ‘ave ese le agasala, ona maua lea o le sa’olotoga; a maua le sa’olotoga, ona filemu ai lea ma faamamaina le loto. Ae fai mai le Lauga a Iesu i le mauga: “Amuia e loto mama, aua latou te iloa ai le Atua.”
IOE, ‘Amuia ‘oe! Ou te matua faafetai atu ia te ‘oe! Pe afai ua mama lou loto, e te iloa lelei ai lava lou Atua, le Atua na te aumai le ola ma le manuia i le tagata talitonu ma faatuatua.
Ma, a o’o ia te ‘oe le Mana e te “iloa ai le Atua”, o le taimi lea, o le aso foi lena e faia ai e le Atua mea ofoofogia i lou soifua ma o tatou ola: Ua tatala ma avanoa le ala, e te sao atu ai i le manuia ma le fiafia, e faavavau faavavau lava—ona o Keriso Iesu.
Amene.
Rev. Emau S. Petaia, F.S.
Leone – Aso Sa – 07/05/09
