Upu Tomua:
O le faaauauina lenei o su’esu’ega faale-Tusi Paia i le Fono Tele III EFKAS lona tolu, Iuni 12, 1982 i le laumua o le ekalesia i Kanana Fou. Ma, o lona fa lenei o aso, o le susuga i le faifeau o To’olefua Pagofie, F.S. na saunia lenei Pepa, ua faaulutala, o le “Valaauina le Ekalesia e le Alii mo le Faaolataga.”
E toe fia faatulaga tonu le faasologa o mata’upu o Pepa na saunia mo lenei Fono Tele III, e faapea: Aso muamua, o le Auauna i le Isaia 42:1-4; 49:1-6 (Masalosalo & Polua); Aso Lua, Isaia 50:4-9; 52:13–53:12 (Emau); Aso tolu, “Ekalesia”: Amataga, O ai e aofia ai, O le a le sootaga ma le uluai nuu filifilia o le Atua (Vaafatu & Salatielu); ma le Aso fa: (Toolefua).
O LE PEPA FAALE-TUSI PAIA:
(1) O le valaauina e le Alii mo le Alii: “Le Alii e, e te tuuina atu nei lau auauna ia alu ma le manuia, pei o lau afioga; aua ua iloa e o’u mata le faaolataga mai ia te oe, ua e saunia i luma o nuu uma lava; o le malamalama e faamalamalama a’i nuu ese, ma le mamalu o lou nuu o Isaraelu.” (Luka 2:29-32). Ua taunuu le valoaga a le perofeta o Isaia (40:5), o le faaolataga mai le Atua e vaaia e tagata uma lava (Isaia 52:10); ua taua foi i le Luka 2:30-31 ma le Isaia 49:6. O Iesu ma ona So’o na latou tala’i le tala o le faaolataga i nuu uma lava. “Aua ua faapea ona poloa’i mai o le Alii ia te i matou, Ua ou tofia ‘oe e fai ma malamalama o nuu ‘ese, ina ia avea ‘oe ma faaolataga e o’o i tuluiga o le lalolagi.” (Galuega 13:47). O le faamoemoe ina ia lavea’iina tagata o nuu ‘ese, faatasi ma Isaraelu, o le ‘auala lea o le valaauina o le auauna a le Atua (Iesu) e faao’o atu le faaolataga.
E taua le galuega a le auauna, aua e o’o mai ai le folafolaina o le faaolataga. Ma, o lenei faaolataga e ‘auala mai i le suafa o Keriso. “…E leai sa’u ario po’o sa’u auro, a o le mea ua ia te a’u, ou te avatu lea ia te ‘oe, o le suafa o Iesu le Nasareta….” (Galuega 3:6). O le tofi ua tuuina i le auauna, o le faailoa atu lea i le lalolagi, “E leai fo’i se tasi ua i ai le ola; e leai lava se isi igoa i lalo o le lagi ua foa’iina mai i tagata e mafaia ona faaolaina ai o i tatou.” (Galuega 4:12). O le “suafa” e faailoa mai ai le pule aoao a Iesu Keriso; o le pule lava lea na fa’aaogaina e So’o o Iesu, e fai ai vavega ma faamalolo ai e na mafatia ma puapuagaina i ma’i e tele.
O le galuega a le auauna, e mafai ai ona suia tulaga faigata e o’o i le tagata: e faapei o le faanoanoa ina ia liua i le fiafia; o le tagi i le mata’ata’ata; mai le pipili i le faamalosia e savali (Galuega 3:7-11). “Ona osooso ai lea o le pipili e pei o le aila, e pese foi le laulaufaiva o le gugu.” (Isaia 35:6). O le faaolataga ua iloa e tagata o le Alii, ona o le galuega a le auauna.
(2) O le valaauina o le Ekalesia mo le Faaolataga: E tatau ona iloa e le auauna, le mafua’aga ua mafai ai ona folafola atu le faaolataga. “Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foa’iina mai e le Agaga o le gagana ia te i latou.” (Galuega 2:4). “A e peitai, o le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te a’u i Ierusalema ma Iutaia uma lava, ma Samaria, e o’o lava i le tulu’iga o le lalolagi.” (Galuega 1:8). O le tulaga moni lea o le auauna, e le mafai e le auauna ona tala’i le faaolataga, vagana ua mafuta ma le Agaga o le Atua. “A maliu mai le Fesoasoani, o le ou te ‘auina mai ia te outou mai le Tama, o le Agaga lea e tupu mai ai le upu moni, o le maliu mai mai le Tama, o ia lava e molimau ia te a’u. Tou te molimau foi, aua ua outou faatasi ma a’u talu le amataga.” (Ioane 15:26-27). O le mea e tatau ona iloa e le auauna, aua na matua malosi le lauga atu o le ulua’i Ekalesia Kerisiano, faatasi ma lo latou iloa tautala i gagana eseese, ina ua mafuta ma le Agaga Paia (Galuega 2:2-4).
O le ata manino lenei o le afio ifo o le Agaga Paia i le auauna faatasi ma le Ekalesia, o le maopoopo, vivii faatasi, a e maise o le alofa o tagata ua molimauina (Galuega 2:47). “Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le loto tele. Ua tasi lava le loto ma le manatu o e faatuatua uma lava; ua le fai mai foi e se tasi i se isi ana mea, o lana lea; a ua tuutele a latou mea uma.” (Galuega 4::31-32). O le tulaga o le auauna i lona tala’i atu o le faaolataga, o se tulaga e paia, e mamalu foi, aua e tala’iina ai le alofa o le Atua i ona tagata, e auala mai lea i le soifua mai o Keriso: O lona maliu, ma lona toe-tu manumalo i le tuugamau, e o’o lava i lona afio a’e i le lagi. Ma, o la ta galuega faa’auauna lena ua valaauina ai ma ta’ua i tatou, o le Ekalesia Faapotopotoga Kerisiano i Amerika Samoa—o le valaauina lava lea o le Ekalesia mo le Faaolataga.
(3) O le valaauina o le Ekalesia e le Alii mo le Satauro: “Ona fetalai atu ai lea o Iesu i ona soo, Ai se tasi e fia mulimuli mai ia te a’u, ia faafiti o ia ia te ia, ma ‘ave lona satauro, i le mulimuli mai ia te a’u. Aua ai se fia faasaogaluemuina lona ola, e maumau ai ia te ia; a o le faamaumau lona ola ona o a’u, e maua ai e ia.” (Mataio 16:24-25). O le ola fia auauna po’o le ola auauna, e le o se mea e faia e aunoa ma ni puapuaga; o le soifua e tatau ona ui atu i faigata ma puapuaga. O ia faigata ma puapuaga, o le amoina lea o le satauro o tiga ma faigata, ona faatoa o’o atu lea i le avea ma auauna a Keriso.
O le auauna a Keriso, o se tagata lea ua le usita’iina ona mana’oga. Ua le ioe foi o ia i faatonuga a ona lava mana’oga. Ua matua lafoai e ia mea uma sa manatu i ai. Ua fetalai Iesu, “…Ai se fia mulimuli mai ia te a’u, aua nei usiusitai o ia ia te ia, a ia ave e ia lona satauro, i le mulimuli mai ai ia te a’u.” (Mareko 8:34b). Ua ta’ua e Luka (14:25-35) le tulaga moni i so’o se tasi ua fia avea ma auauna i le Alii. So’o se tasi ua fiafia e avea ma auauna a Iesu, e ao ina ia iloa, e i ai le tau (cost) e totogiina. O le tau e totogi e le auauna, o lona lea matua lafoa’i o mea uma na tu’inanau i ai, ina ia avea ma auauna o Iesu—ua le faatinoina ona mana’oga, a e mulimuli atu i le Alii.
O le soifuaga faale-tagata i le lalolagi, e le feagai ona feosofa’i solo le taualumaga o le ola ma mea e tatau ona faatino, a e maise lava i se tagata ola-auauna. O se faataitaiga, o le faatulagaina o tofiga i totonu o faiga-malo, ua i ai le vaega amata, ua i ai le feololo ma faasolosolo agai pea i le tulaga maualuga.
A tuu ane foi i agaifanua ma tulaga masani o le soifuaga faa-Samoa, e tausisi lava upu faata’ita’i i le faapea ane: “O le ala i le pule, o le tautua.” O lona uiga, e tatau ona tautua le taule’ale’a po’o se tama’ita’i ua fia o’o atu i le pule-faamatai—e amata mai i le tautua, a e mulimuli i le pule. E tulaga tutusa lea faasologa ma le valaauina o se auauna e tala’i le finagalo o le Atua. Ia matua lafoa’i mea ua mavae, a e matua taga’i atu i le lumana’i i le savaliga fou. “Afai e sau se tasi ia te a’u, a e le inoino i lona tama, ma le tina, ma le ava, ma le fanau, ma uso, ma tuafafine e o’o lava i lona ola, e le mafai ona fai o ia mo’u so’o. O se le ‘ave lona satauro, ma ua le mulimuli mai ia te a’u, e le mafai ona fai o ia mo’u so’o.” (Luka 14:26-27). Ua le o le faatinoina o le mana’o, a o le faatusa o le faigata ma le loloto o puapuaga e tatau ona ui atu ai le ua avea ma auauna.
E tatau foi ona faapea, “O se le ‘ave lona satauro, ma ua le mulimuli mai ia te a’u, e le mafai ona fai o ia mo’u so’o.” (f.27). O le ulua’i faatinoga lenei e ao ina faia e i latou ua fia avea ma auauna a Iesu. Peiseai, e onomea ona ta’ua lenei fetalaiga a Iesu, o le “su’ega ulufale” i le tofi auauna. So’o se tasi e le mafaia ona amoina lona lava “satauro”, ma le mafaia ona faagalo mea e pele i lona lava loto, o ia lea e le mafai ona ulufale atu i le faatinoina o le faiva faa-auauna. “E faapea foi so outou e le lafoa’i ana mea uma, e le mafai ona fai o ia mo’u so’o.” (f.33). O le tulaga lenei e tatau ona iloa ma malamalama i ai le tagata e avea ma auauna a Iesu—ia mafai ona avea ma pologa. Ua mafatia ma tigaina, aua ua taumafai e tete’e atu i ona lava mana’oga. Aua ua faasatauroiina o ia e ia lava; ona mafai lea e ia ona pasia o le su’ega ma avea ai ma auauna a Iesu Keriso.
O le uiga lea o auauna a Keriso, ia ‘ino’ino i uiga ma amioga le tonu sa pele i o latou loto. Ma e tatau foi ona iloa, o le auauna e le o se mea e faia i se taimi pu’upu’u po’o se aso e tasi. O le auauna e galuega i le oso a’e o le la, e o’o atu i le goto ifo o le la; o le auauna e galue mai le Aso Gafua e o’o atu i le isi Aso Gafua.
O le valaauina o le Ekalesia po’o Ekalesia mo le Satauro i lona tulaga faa-auauna, e le mafai ona ta’ua o le auauna pe a le ui atu i le pologa. O lo tatou nofo i le pologa, e avea lea ma auala tatou te molimauina ai tiga ma puapuaga o lo tatou Alii o Iesu. “E tatau ona tiga le Atalii o le tagata i mea e tele, ma ia lafoa’iina e toeaina, ma ositaulaga sili, ma le ‘au tusiupu, ia fasiotia foi; e faatuina foi o ia i le aso tolu.” (Luka 9:22).
—————————————————————————————————————————————————-
FESILI FAATUPU MANATU:
(1) O le valaauina e le Alii mo le Alii.
(2) O le valaauina o le Ekalesia mo le Faaolataga.
(3) O le valaauina o le Ekalesia e le Alii mo le Satauro.
FESILI: E faapefea ona e faafeso’otai nei ulutala e tolu i lou olaga faakerisiano, pe a fai ua e manatu o ‘oe lava o le Kerisiano?
