L A U G A
Tusi Faitau: Luka 10:38-42
Matua – ff.41-42 – “A ua tali atu le Alii ia te ia, ’Mareta e, Mareta e, ua e popole, ma ua pupu lou loto i mea e tele; (42) a o le mea lava e tasi e ao ina ia maua; ua filifilia foi e Maria lea mea lelei, e le ave’eseina ia te ia.’”
Manatu Autu: “Vaavaai mea aopito sili.”
Faatomuaga: Ua le o toe pumo’omo’o le lalolagi i nei-ona-po. Ua le o toe tumau Samoa e pei ona i ai i tausaga e tele ua mavae. Sa gata mai le vaavaai na o nai motu laiti. O le sami e si’osi’omia ai, ma le vao i uta e galulue ai, mo le tausiga o le soifua malosi faale-tagata.
O nei aso, ua tele ina galulue i ofisa ma kamupani ia maua ai le tamaoaiga tupe, ma le faaputuga o le ‘oa faale-lalolagi. Ona ua faapitotasi le malosi o mea faale-tino, ua avea lea ma mea ua manatu ai le toatele: “E sa’o lava a’u, o lea ua ou manuia; ua lava lea lelei mo lo’u lumana’i.” Peitai, o lau lava lea vaai; a e mo le toatele, e le o le tulaga lea e tatau ona i ai.
Ona o lena olaga fesesea’i solo o le tagata—i ona manatu ma ona mafaufauga e tele, o lena na fetalai ai Iesu i upu ua fai ma Matua: “Mareta e, Mareta e, ua e popole, ma ua pupu lou loto i mea e tele; a o le mea lava e tasi e ao ina ia maua; ua filifilia foi e Maria lea mea lelei, e le ave’eseina ia te ia.”
Tatou te faalogo soo i lenei tala i le ‘au uso o Maria ma Mareta; ua na o le tusitala o Luka na tusia, ae leai ni faamatalaga a Mataio, Mareko ma Ioane—e le o mautinoa foi se mafua’aga. Peitai, ua i ai ni mafaufauga ma manatu o e su’esu’e i le Tusi Paia, e faapea: Ai ua lava ma totoe upu ua saunoa i ai le Alii, e ‘aumaia ai le feau o loo finagalo le Alii e a’oa’o mai mo le soifuaga manuia o le tagata. Ae se’i o tatou manatunatu atili mo lenei mataupu:
MANATU #1: E i ai le mea e tasi e moomia e le tagata.
Aisea e maumau ai le ola i le mana’o tele ma le loto tu’inanau? I le faaputuina o le ‘oa faale-lalolagi? Aisea lava e faia ai, pe afai e maumau ai le ola o le tagata?
(a) E peiseai ua loto tiga Iesu i ana fetalaiga ia Mareta? E foliga ua sili ia Maria le nofonofo ma faalogologo i a’oa’oga a Iesu; a e o loo tigaina Mareta i gasese ma tapenapena feau o le aiga! E le tioa a muimui Mareta. O le tali a Iesu, e le o sapasapaia ai le tautiga lea o Mareta: “Mareta…ua pupu lou loto i mea e tele; a o le mea lava e tasi e ao ina ia maua …” E i ai le mea e tasi e moomia! “Ua filifilia foi e Maria lea mea lelei…” O le fesili: O le a lenei mea sili o loo moomia? Ae o le a foi lea mea ua filifilia e Maria?
(b) O le mea pito sili mo le soifuaga lumanai o le tagata, o le mea tonu lea na filifilia e Maria i lona loto. Tagai foi, e maua soo taimi tatou te aai ai ma feinu faale-aiga. Ae matua itiiti lava taimi tatou te faalogologo ai i Afioga a le Atua, pei ona a’oa’o mai Iesu. E moni e taua le taumafa i se falaoa; ae le na o le falaoa e ola ai le tagata. Faafofoga foi i a’oa’oga a Iesu: “O ia te a’u mea e ‘ai tou te le iloa … O la’u mea e ‘ai, ia ou faia le finagalo o le na auina mai a’u…” (Ioane 4:32,34).
MANATU #2: Ua pupu o tatou loto i mea e tele.
O le mea e tasi o loo moomia nei, o Afioga ia a le Atua. E tele manatunatuga ma mafaufauga i o tatou loto; e uma lenei aso, uma lenei tausaga, ae le mafai ona uma mea e loto i ai le tagata. Ae afai tatou te le lagona le musumusuga a le Agaga o le Atua i o tatou loto taitoatasi: e le mafai, le mafai lava ona faamalieina o tatou loto i tu’inanau o le lalolagi.
(a) O le mea e tasi o loo moomia, o le Areto (falaoa) o le ola. O Iesu, o ia lava o le areto a le Atua mo le ola faavavau; na auina mai e le Atua le Tama mo le lalolagi atoa. O ia o le Upu o le alofa, ina ia tatou alolofa ai i le Atua i o tatou loto, i o tatou manatu ma lo tatou malosi atoa. O le faatinoga o lea alofa, ua fai ai ma tulafono: “Ia e alofa atu i le lua te tua’oi, e pei o oe lava ia te oe.”
(b) O le Afioga a le Atua—o le ‘Upu e fesootai ai tagata uma. Ua fetalai le Alii: “Ia outou muai saili le Atua ma lana amiotonu…” O le amiotonu a le Atua, o le fesootaiga moni lea faale-fanau a le Atua. E le mafai ona solosolo lelei le tagata pe a aunoa ma lenei fesootaiga. A maua le ola fesoota’i, ona faatino lea o le ola fetausia’i, le ola fegalegalea’i, atoa ma le ola e alofa ai le tasi i le isi—o iina e maua ai le ola fiafia ma le ola faafetai.
[c] O le Afioga a le Atua—o Keriso lea ma lona alofa tunoa: le ola ia faamagalo atu, ae le o le fia taui ma sui; o le ola e alofa atu ina ia faalelei le fe’ese’esea’iga, ma mafuta pea faatasi. O le soifua i Afioga a le Atua, ua le na o upu ma faamatalaga, a e o le faatinoga o le mafuta faatasi.
Uso e i la Keriso, o le pogai o le Ekalesia a Iesu Keriso i le lalolagi: Ia tatou mafuta ai ma ola ai faatasi. E le gata i a i tatou nei, a e aofia ai ma isi uso-a-tagata. Ua tatou faifai mea faatasi i le li’o o le Ekalesia Kerisiano—o le sui lava lea o Keriso i le lalolagi. Ia tatou alolofa le tasi i le isi, aua o le faatinoga lea o le poloaiga mulimuli a le Alii: “Ia outou fealofani.”
Ae aua nei galo, o loo i ai pea mea pito sili ona taua mo le soifua auauna faamaoni i le Atua: Ia e iloa Afioga a le Alii. O Afioga o loo tusia ai ma faamatala le tala i le Faaolataga na saunia e Iesu Keriso: Na maliu ma tanumia i le tuugafau foa i le papa, a e na toe soifua mai ina ua mavae aso e tolu. Ua afio o ia i le lagi, e fai ma Fautua i le Atua le Tama, ina ia ola ma manuia le tagata agasala. I nei ona po, e oo lava i le faavavau.
Tupulaga o tama ma teine, ua mae’a le taumafai o nisi; a e o loo faaauau pea le toatele. Ia outou manatua lenei mea, o le poto o le mea alofa mai le Atua, aua nei faasili mea i o tatou lava loto, a ia faasili pea le Atua. Afai e te aoga mo le Alii, o le mea sili lea ona taua, aua o le aano moni lea o a’oa’oga a le Alii o Iesu: “Ua filifilia foi e Maria lea mea lelei, e le ave’eseina ia te ia.”
Uso e i la Keriso, ia to’a pea lau taga’i i mea pito sili ona taua, aua so ta manuia mo le lumanai. Ia faaaogaina lou soifua ma o tatou ola, tatou te auauna ai ia Iesu ma lona finagalo.
I le suafa o Iesu Keriso lo tatou Alii.
AMENE.
———————————————————————————————————————
Rev. Emau S. Petaia, F.S.
Leone: 06/01/08
Graduation Week.
———————————————————————————————————————
1. 06/01/08: Leone/taeao (3rd. Sunday after Pentecost) [Laugatogi Aoga Faifeau i le afiafi.]
2. 06/11/95: Fort Lewis;
3. 06/12/88: Seattle-II.
Revized for Website: 11/23/10
