Tusi Faitau: OT - Ioelu 2:21-27
NT - Mataio 6:25-33
Matua – Mataio 6:31b, 32b: “O lenei, aua nei outou popole, ma faapea ane: Ni a mea tatou te aai ai, ni a foi mea tatou te inu ai, ni a foi mea tatou te oofu ai? Aua o mea uma ia ua sailia e nuu ese. Aua ua silafia e lo outou Tama o i le lagi e aoga ia mea uma ia te outou.”
Manatu Autu: “’Aua le mafaufau i lo outou.”
Intro: Ou te talitonu, e to’atele isi tagata e pei o i tatou, ua ulufale atu i maota tapua’i i le Atua, se’i faatino ma faataunuu le faamoemoe taua, na pogai ai ona faatulafonoina lenei Aso malolo e le malo o le USA ma ona teritori.
Ae ou te le’i tautala la faapitoa i le Lauga, se’i o’u fai sina faamatalaga itiiti, e faatatau i le Ulua’i Aso Faafetai i Amerika, e pei ona tatou faamanatuina pea i lea tausaga ma lea tausaga.
I le tausaga 1621 (388 tausaga taluai), i le vaitau o le tau-malulu, i le itu i Sasa’e o Amerika (east coast), o iina na amata ai ona tupu le lagona tuufaatasi o tagata Amerika ina ona po, ina ia faailoga se aso, e faatino ai le agaga faafetai i le Atua, ona o le manuia ua maua, e ala i fua o faato’aga ma le laueleele.
Sa leai ni Setete i na ona po, ua na o “kolone” (pulega faale-malo) e galulue faatatau i le pule faale-malo mai Peretania. O William Bradford, o le kovana o le kolone o Plymouth, o ia lea sa na muamua faatonu le malo, ia faia ni sauniga e momoli ai le agaga faafetai i le Atua, ona ua manuia ma sologa lelei fua o faatoaga ma le laueleele.
O le 1623, na toe poloaiina ai kolone, ia faia ni talosaga faafetai i le Atua, ina ua faatoa maua se timuga i le lamala tele na feagai ma kolone i lea tausaga. E oo mai i le 1630, ua amata ona masani kolone i le saunia o lotu faafetai i le Atua, e faailoga ai le manuia o seleselega i fua o faatoaga ma le laueleele; a e sa gata lava lea masaniga i le itu i Sasa’e o Amerika.
O le tausaga 1855 na amata ai i Amerika ona faamanatu o le Aso Faafetai i le Atua, i le itu i Sasa’e o le atunuu. A o le tausaga 1863, na poloaiina ai e le peresetene o Abraham Lincoln, ia faatulafonoina le Aso Faafetai i le Atua, e faapei ona faia nei e le USA ma ona teritori.
I nei la tausaga, ua le na o le USA e gata ai lenei lagona, a ua faapea foi ona faia i le tele o malo Kerisiano i le lalolagi.
O le matua o le lauga: “…aua nei outou popole…ni a mea tatou te aai ai, ni a foi mea tatou te inu ai, ni a foi mea tatou te oofu ai?…Aua ua silafia e lo outou Tama o i le lagi e aoga ia mea uma ia te outou.”
Fai mai le manatu autu: “Aua le mafaufau i lo outou ola.” Ua a’oa’o atu Iesu i ona so’o, “Aua nei outou popole i mea tou te ola ai…aua ua silafia e lo outou Tama o i le lagi.”
E atagia lea lava poloaiga, pe a tatou mafaufau i upu o le Tatalo a le Alii, e pei ona tusia e le ‘au faievagelia, “Lo matou Tama e, o i le lagi, Ia paia lou suafa. Ia o’o mai lou malo, Ia faia lou finagalo…” (Mataio 6:9f). O lona uiga, ia tatou faamuamua le finagalo o le Atua i mea uma tatou te mafaufau i ai, ma manatunatu i ai i o tatou loto. Ia tatou manatua, o le finagalo o le Atua e faamamafa i o tatou loto; a e le o mea tatou manana’o i ai i o tatou lava loto.
Ua faailoa mai i a’oa’oga a Iesu, o le pogai lea ua mafua ai ona tupu le loto popole i o tatou tagata talitonu ia Iesu, ona e foliga mai, o loo tatou faamuamua pea mea tatou te loto i ai, a e le o le finagalo o le Atua. O le pogai o lenei poloaiga a Iesu, “aua nei outou popole,” i mea tou te manana’o i ai—aua e tatau ona faamuamua le finagalo o le Atua. Afai e faapea ona tatou faia, ona pule lava lea o le Atua i lona finagalo, i mea tatou te lelei ma manuia ai.
O se tasi o itu taua e ao ina tatou iloa, o le a’afia o le tagata i le “popole,” i lenei a’oa’oga a Iesu: O se tasi lea o agasala taatele i ona so’o; e le gata i ona ulua’i so’o, a e faapea lava ia i latou uma ua avea ma so’o o le Alii e ala i lana Ekalesia. O le “popole” o se tasi lea o a’upega a Satani, na te faato’ilaloina ai le tagata talitonu ia Iesu. Aua a o’o ina saisaitia le loto ma le mafaufau i le “popole”, ona faigofie lava lea ona ta’ita’i seseina le tagata i le tu’inanau ma faaosoosoga e tele.
O le uiga o le upu IOELU i le Feagaiga Tuai, o “Ieova o le Atua.” O le autu o le fe’au ua ‘aumaia e lenei Perofeta, fai mai le valaau o le folafolaga mai le Atua (ff.21-23), “Le fanua e, …manu vaefa o le vao e, …o outou foi o le fanau a Siona e, ia outou fiafia ma olioli i le Alii lo outou Atua; aua ua ia foa’iina faatatau mai ia te outou le uaga muamua, na te faatotoina ifo foi le ua mo outou, o le uaga muamua, atoa ma le uaga mulimuli i le masina o muamua.”
O le finagalo o le Atua, ia aua lava ne’i popole le tagata talitonu i le Alii, a ia olioli ma fiafia. Ia tuuina atu atoa le pule ma le faasinoga i le Alii. O le Atua na te silafia ona faasoa ma faatatau mea tonu e ao ona mulimuli ai le tagata talitonu. Afai e aunoa le tagata ma le faamuamua o le finagalo o le Atua, ona faigofie lea ia Satani ona tofotofo ma faaosooso le tagata talitonu i le loto tu’inanau ma le lagona faamaualuga.
A o’o ina filemu ma to’alelei le loto o le tagata talitonu ia Iesu, a o’o foi ina faamalieina ma faafiafiaina le lagona o le tagata talitonu i le Alii, i mea lelei ma le manuia e tele ua na maua, e ala i le foa’i alofa mai o le Atua: O iina lava e tupu a’e i le loto, le “agaga o le faafetai” ona o le alofa ma le agalelei o le Atua ua maua i aso fai pea.
A e o loo atagia foi i le fe’au ua ‘aumaia e le perofeta o Ioelu, e i ai ona aso ma tausaga, e o’o mai ai le Mesia, na te ‘aumai le faaolataga i le Nuu o le Atua; o le faaolataga lea e maua ai le olioli ma le fiafia.
O le loloto ma le taua o lenei a’oa’oga a Iesu—aua nei outou popole, aua ua silafia e lo outou Tama o i le lagi e aoga ia mea uma ia te outou. Afai o lea, ona moni ai lea o le Manatu Autu: “Aua le mafaufau i lo outou ola.” O lo tatou soona mafaufau ma manatunatu i mea o le olaga nei, o le faitotoa lava lea e tasi: i le so’ona mana’o tele ma le ola tu’inanau e agasala ai.
Le aofia e, ia avea lenei Aso Faafetai ua tatou faailogaina, ma aso tatou te mafaufau ai pea i le alofa ma le agalelei o lo tatou Atua, ua na lavea’i mai ia i tatou i faigata ma puapuaga o le olaga nei. Ua ia foai mai foi mea uma tatou te ola ma soifua ai i lenei lalolagi, o ta’umafa, o vai inu, o ofu ma lavalava, ma mea uma lava e aoga mo lo tatou lelei ma le manuia.
A e silisili ona taua, le foa’i sili, e ala i lona Alo Pele e to’atasi: Na afio mai Iesu i le lalolagi e soifua faatasi ma le lalolagi; na inosia ma tuulafoaiina e tagata o le lalolagi; na o’o lava ina fasiotia e tagata o le lalolagi. A e na toe soifua mai Iesu Keriso, ina ua mavae aso e tolu. Ua afio i le lagi, e fai ma Fautua i le Tama, ina ia magalo agasala a le lalolagi.
O le mea lea, e ao ai ona tatou faafetai pea e le aunoa, e le gata i lenei Aso Faafetai, a e o ao uma o lo outou soifua ma lo tatou ola. Ona o Keriso Iesu lo tatou Faaola.
AMENE.
