Faifeau.com

SAUNIGA – ASO GAFUA – Oketopa 05, 2009 – Itula 6:00pm.
Malumalu Koluse Paia – Katoliko Roma Leone

LAUGA
 Tusi Faitau:    OT – Salamo 93
NT – Roma 10:1-4; 11:33-36

    Matua:    Roma 11: 33 & 36 — “Aue! le loloto o le tamaoaiga o le poto atoa  ma le silafaga a le Atua.  E le masu’esu’eina ana faamasinoga; e le  mafai foi ona iloa ona ala.  (36) Aua ua fua mai ia te ia, ma ua faia e             ia, e i’u atu foi ia te ia mea uma; ia ia te ia le viiga e faavavau lava. Amene.”

Manatu Autu:    O le Atua o le Pule aoao.

Intro:    E faasaga a’e o’u mata i mauga, e oo mai ai lo’u fesoasoani.  O lo’u fesoasoani mai le Alii lea, o le na faia le lagi atoa ma lalolagi. [Psa.121:1-2]

        Ae ‘ou te le’i tautala faapito i afioga a le Atua, ou te muamua talanoa atu faatagata-a-lautele, e uiga i le soifuaga ua i ai nei Samoa, talu ona tupu le “tsunami” lea ua afaina tele ai lo tatou atunuu.

 O le lagona o le fefe, ma le mata’u o le loto, o le amataga lea o se isi ituaiga olaga, ina ua aafia le mafaufau; e ono tupu ni uiga fou ma ta’ita’i sese le mafaufau i mea e vaavaai i ai mata.  O lona uiga, ua i ai ni amioga fou e ‘ese mai le tulaga sa masani ai—aua ua afaina le mafaufau mo aso o totoe o le ola.

       Tala:  I le motu o Salafai i Samoa Tu-to’atasi, sa i ai se faamata’u tele lava, ua fai ma tupua e tau’ave i mafaufauga o tagata o le nuu.  Fai mai le tala, o gauta ane i le ala-galue o le nuu, pe a o’o i le mea e i ai le vaivao pogisa, e putuputu ai la’au e igoa o le ‘paogo’, fai mai le tala:  O aso e atoa ai le masina, pe a o’o ina pogisa le afiafi, e vaaia ai lava e tagata o le nuu, se iila e matua uiga ‘ese lava, e sosolo a’e i le tino o se laau.  Ma, ua fai lenei vaaiga ma mea ua matua fefefe ai lava tagata e ui ane ai.

      O se tasi o taule’ale’a sogasoga i le nuu, na teuloto ia te ia lenei faamata’u matuia.  I le tasi aso, ina ua foufou le atoaga o le masina, ua manatu ai loa lenei taule’ale’a, o le a ou matua faaali nei lo’u loto-toa, e fia tago lava o’u lima e taofi mau i lenei pupula uiga ‘ese.

     Na matua saili se lafiga e pito sili ona lilo i lona manatu.  Ua amata nei ona pogisa le afiafi, a e faalogo atu loa le taule’ale’a, ua pa’o’o mai lalo o laau.  A ua atili ai ona toto’a lana vaai.  Ae ina ua amata ona pupula mai ‘ave malamalama o le masina, ma ua suluia lalo o pogati o laau, ae faate’ia loa le vaai a le taule’alea, ua amata ona totolo a’e vae lapopo’a lava o le “u’u”.  Ua ofo lona loto, a e ua tupu foi lona fiafia—aua, ua maua le tali o le “tupua”, ua leva ona a’afia ai tagata o le nuu:  O le fefefe ma matata’u, i le iila ma le pupula uiga ‘ese; a e o mata o le u’u ua suluia i ‘ave malamalama o le masina, a o totolo a’e le u’u i luga o laau.

        Manatu: Afai e malamalama le loto, ma iloa tonu le mafua’aga, ona ave’eseina ai lea o le fefe ma le mata’u.  Pe a soifua foi le tagata, ma ola i mea lelei ma fai le amiotonu, o le a fiafia le loto i aso o totoe o lona ola.

~~~~~~~~~~~~~~~~~~~~~~~~~~~~~~~~~~~~~~~~~~~~~~

 

    O le LAUGA i le suafa o le Atua-Tolu-Tasi:  Le Tama, le Atalii, ma le Agaga Paia.  Amene.

        Matua:       Aue! le loloto o le tamaoaiga o le poto atoa ma le silafaga a le                 Atua.  E le masu’esu’eina ana faamasinoga; e le mafai foi ona iloa ona ala.                  (36) Aua ua fua mai ia te ia, ma ua faia e ia, e i’u atu foi ia te ia mea uma;                 ia ia te ia le viiga e faavavau lava.  Amene.  [Roma 11:33, 36]

        Manatu Autu o le Lauga:  O le Atua o le Pule aoao.

        O le pese a le fai-Salamo:  Le Alii e, ua taalili mai vaitafe, o vaitafe ua taalili a’e o latou leo; o vaitafe ua taalili a’e o latou gogolo.  O le Alii o i le mea maualuga, e sili ona malosi o ia i le taalili o vai e tele, o peau malolosi o le sami.  O au mau e matua faamaoni ia; e onomea lava ona paia o lou fale, le Alii e, e faavavau lava.  [Psa.93-3-5]

      Ua uma ona tatou molimau i le taalili ma le gogolo o vai, ua tatou vaavaai foi i le mata’utia ma le malolosi o gaoioiga faa-natura; e le taitai ona faatusatusaina e le tagata ia mea uma i sona poto ma sona malosi.  A e fai mai le fai Salamo, e sili atu i lena, le mata’utia o le afioaga o le Tupu o tupu, ma le Alii o alii.

     A o le fesili:  Pe ai se a ua tuuina mai ai e le Atua, nei mea faigata faa-natura, ua aafia ai o tatou tagata? e faapei o mafui’e, o afa, ma tsunami?…..etc.

        Ua molimau le Tusi Paia (Kolose 1:16-17), o Iesu Keriso e pulea mea uma. Aisea ua o’o mai ai nei ituaiga faalavelave?  Ia outou manatua, e pule aoao le Atua; e pule i tau (weathers) o le lalolagi (Teutero. 11:17). “Ona tupu ai lea o le to’asa o le Alii ia te outou, ona pupuni ai lea e ia o le lagi, ina ia leai ni ua, ia le fua mai foi le laueleele ni ona fua; ona outou vave fao ai lea…”  (Iakopo 5:1) “O Elia o le tagata ia e tusa ma i tatou, ua matua tatalo o ia ina ia le ua; ona le uaina ai lea o le fanua i tausaga e tolu ma masina e ono.”

       E i ai foi le pule faale-Atua i isi faigata faa-natura—ua tutupu ia mea e fai ma faamasino mo e ua agasala. (Numera 16:30-34).  A silasila i le tusi o Faaaliga (6, 8, 16), o loo tusia ai nisi o faigata faa-natura, e fai ma faasalaga i le lalolagi agasala.  O le fesili:  Po’o mafatiaga uma ‘ea faa-natura, o faasalaga mai le Atua?  O le tali:  E leai lava.

       Ua tusia i le Roma (8:19-21), “o loo faatalitali mea uma na faia ma le naunau i le faaali mai o atalii o le Atua;” ina ia tusa ma fuafuaga na faia ai mea uma mai le amataga o le foafoaga.  Ou te fia faamatalaina e faapea:  Afai e faaopoopo le 2 + 2 = 4, o le tali e 4, o lena lava e le suia.  A o se isi foi faaupuga:   Afai o le lalolagi ua aga’i atu i lona i’uga, e faapea lava ona o’o mai, e le toe suia lava.

       Pe ai se a ua faapea ai?  IOE, e te manatua foi le tala i galuega foafoa a le Atua, lea na faia ai le lagi ma le lalolagi i le amata!  Na faia ai ma le Ulua’i Tagata, e fai ma “leoleo” i le faatoaga.  Ae paga lea, ua agasala.  Ona saunia foi lea o le totogi o le “agasala”, o le faasalaga e amata i le fanau mai, se ia o’o lava ina tuuina ifo i le lefulefu ma le efuefu na faia ai le tagata.  O le pogai malamalama lena, e uiga i le amata o faigata ma puapuaga.  Ae manatua pea, e le’i tuulafoa’iina le tagata e le Atua le Pule aoao.

       O le a se fesootaiga o ia fuafuaga ofoofogia a le Atua ma le “tsunami”?  Taga’i pea, ia Leone:  A o o’u alu ane ma faasolo la’u vaai, i ou laufanua ma ou muafale, ona ou manatunatu lava lea i upu o le Tusi Pese a le LMS #225-4, o le pese o loo tatou pepeseina i taimi o mafatiaga, fai mai: “O lenei ia onosa’i i puapuaga, E le tupu fua mea faapena….., (repeat) E le tupu fua mea faapea.”

        LEONE, o fea o i ai sou finagalo?  Ou te le tau su’esu’eina, aua ua lia’ina i malae ma ala, fai mai: Ua fai le Aso o le Alii (Aso Sa), ma Aso tou te faatafuna i ai.  E le o le faatoa tupu foi lea o sea mea faapea ia Samoa; a e mulimuli ane, o le faatinoina lava lea o le to’asa o le Alii i e faifai mea leaga.  Ou te talitonu, e le o le LOTU, a e pogai mai lava i uiga, ma amioga le taupulea a le tagata e le faatuatuaina.

        TALOFA!  O i tatou uma nei, o “totino” lava o lenei nuu o Leone—o aano ma toto outou, a o i matou o e folafola atu, o totino Leone, ona o le finagalo o le Atua silisili ese, ia faaali atu lona finagalo ma lana amiotonu.

        TALOSIA!  Ia fai se aoga o lenei aso mo i tatou uma, Leone.  Ae aua ne’i galo ia te outou, ua a’oa’o mai afioga a le Alii:  E oti le amiotonu, ina ia ola le amioletonu.  Na maliu Iesu Keriso i luga o le satauro, ina ia ola le lalolagi agasala—o ‘oe ma a’u, ma tagata uma o lenei nuu o Leone.  Ona o Keriso Iesu.

        AMENE.