L A U G A
Upu Tomua: Ua tatou i ai i le vaitau o le mapu ane teisi i fe’au ma galuega masani, a e se’i fai sina malologa (labor day). Ae le gata i lea, se’i toe tepa ane lava teisi, e manatunatu ma mafaufau i le Tala Lelei ia Iesu Keriso, lea ua faatalaleleiina ai Samoa i le tala o le Faaolataga, ua faasaoina ai le lalolagi mai le agasala. Ae se’i silasila ane loa:
O la’u Mata’upu: “O LE MALO O LE ATUA.” [The Kingdom of God.]
Tusi Faitau & Matua:
Luka 10:23b-24: …. “…Amuia mata ua iloa mea tou te iloa; aua ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le iloa lava; na latou fia faalogo foi i nei mea ua outou faalogo ai, a e lei faalogo ai lava.”
Luka 17:21 …. “E le fai ane foi tagata, Faauta, o iinei! pe faapea, O iila! aua faauta, ua i ai lava ia te outou le malo o le Atua.”
Mataio 12:28 …. “A e afai o le Agaga o le Atua ou te tulia ai e a’u o temoni, ua oo mai lava ia te outou le malo o le Atua.”
Mareko 13:32-33 …. “A o lea aso ma lea itu aso e le iloa e se tasi, e le iloa lava e agelu i le lagi, po o le Atalii; ua na o le Tama lava. Ia outou, ina
mataala ia, aua tou te le iloa pe oo mai afea ia so.”
Ua faamatalaina atili le Malo o le Atua i le tele o faata’oto a Iesu ua tusia e le ‘au faievagelia.
Faatomuaga:
O se faaupuga ua ta’atele i nei ona po, e faatatau i le Tala Lelei, po’o le talitonuga faale-Lotu Kerisiano, e faapea: “Ua ao Samoa i le tala lelei.” Peiseai e ta’u mai ai ua malamalama lelei tagata-lolotu i nei ona po i le talitonuga i le Atua. Ua lelei foi lea, a e se’i taga’i ane lava. E lua ni uiga vaivai e ono tupu mai i lea faaupuga:
(1) O se faaupuga e ‘alo ai le tagata mai le le-iloa ma le-malamalama lelei i le uiga moni o le “tala lelei”. I se isi foi faaupuga, o le matua le-malamalama lava.
(2) O le uiga o le upu “ao”, ua faatatau i itula o le aso ua mavae le po. O le malamalama e iloa atu ai foliga ma le tino mai o mea sa ufitia i le pogisa.
A e o le vaivaiga e ono tupu mai, o le so’ona filifili lea o le tagata le- malamalama i ona manatu, aua ua lautele le lalolagi e vaavaai i ai, ma o’o ai lava ina tosina i tu’inanau sese o le lalolagi.
O manatu amata ia e aga’i atu i ai le Mata’upu e fia talanoaina i le Lauga, ua faaulutalaina, “O LE MALO O LE ATUA.”
Ua le tutusa le faamatalaina o lenei Mataupu, o le pogai lea o le eseese o ekalesia Kerisiano ma tele ai ituaiga lotu, e pei ona tatou molimauina i nei ona po.
O faamatalaga nei ua ou faailoa atu, o le taofi faale-faatuatua lea ua fai ma Faavae o le talitonuga faale-ekalesia L.M.S., po’o le Ekalesia Faapotopotoga Kerisiano Samoa.
O le “Malo o le Atua” ua ‘auala mai ia Iesu Keriso: E le o fia maua se fesoasoani i le Atua mai le tagata; aua o le pule faa-Tupu lava lea a Keriso. O Iesu Keriso le Alii, e mo tagata uma—i latou ua talia, ma e foi e le’i talia lava. O e ua talia, e maua le fiafia ma le olioli aua ua latou ulufale atu i lea Malo; a o e le’i talia lava, e iloa le Malo i le faasala ma le to’asa o le Atua.
O le tiute tatau mo e ua talia, e galulue ia ‘aumai e ua le’i talia, se’i ulufale i totonu o le Malo, ina ia latou faia le finagalo o le Atua i nuu uma lava o le lalolagi. O lona uiga, ua uma ona o’o mai le “Malo o le Atua”, a e o lo’o faaauau pea le valaauina.
Ua fai ma uiga masani o le lalolagi, afai e fou se mea, e le tumau lena fou aua e o’o ina tuai. Sa fiafia lava i ai, peitai, e tauau ina mavae ma mou atu lea uiga. Afai foi sa taugata, e o’o lava ina pa’u ifo i lalo lona tau. A e ui i lea, e mafai lava ona tumau le uiga taua na mua’i iloa ai lea mea-taua.
E faapena le uiga o le olaga o le tagata Kerisiano, a e maise lava i lona tautalatala i le upu: “Malo o le Atua” e tautala i le avea ma uso—o le tasi i le isi; ma ia maua foi le agaga o le alofa. E faamata e faigofie lea faaupuga i le to’atele.
Peitai, afai e tatalo, “Ia oo mai lou Malo i le lalolagi e pei ona faia i le lagi,” ona ‘ese lea o le uiga o le upu “malo”. Ua sili atu lona malosi, e sili aua o le Malo o le Atua e sili atu ona tele lona uiga, i mea ia ua ta’ua.
O le fesili: O le a ‘ea le Malo o le Atua i le lalolagi?
O le uiga lenei: O le faapotopotoga o e ua talia le Alii e fai ma Tupu i le faatuatua. O le Tupu lea e puipui mai, na te ta’ita’i, o ia lava o le faipule o e ua faatuatua ia te IA. E tolu upu e faamatala a’i le uiga o le olaga e tatau mo e ua talitonu: Faatuatua, Usiusitai, ma le Faamaoni i le Tupu.
O ‘oe o le Kerisiano, e i ai ou tiue: E te galue e faalelei lou aiga, lou nu’u, lou atunuu ma lou malo, e o’o lava ia te ‘oe. Afai e te faia ia uiga uma, ona avea lea o Samoa ma atunuu e sili ona lelei.
Ae ia manatua, ia faamuamua le mea e tatau ona faamuamua: Ia muamua ona talia le Atua e fai ma Tupu, ona iloa lelei ai lea le mea tonu e ao ina e faia. O le “lalolagi” ua na o se nofoaga e le tumau, ua saunia tatou te galulue ma sauniuni ai. [silasila i Faataoto i le Mataio 21:33-46; Mareko 12:1-12; ma le Luka 20:9-19].
Ua manatu le to’atele, ua uma ona faakerisianoina i matou. Ae pe faapefea ona faamaonia? E mafai ona fai se iloiloga, pe moni lea taofi. Ia fesili ifo ‘oe ia te ‘oe, ma a’u ia te a’u, pe ua moni lou faamaoni i lou Tupu:
Na fetalai le Tupu, “Ia e faia lenei mea mo a’u.” Faamata ua e manatu ifo lava ‘oe ia te ‘oe—ua e iloa? ma e faalagolago foi i fautuaga mai i au uo! Afai o lea: o lona uiga, e le’i atoatoa lou faatuatua i lou Tupu.
E faapea foi ona e fesiligia le moni o lou “faatuatua”, a e maise lou “usiusita’i” i lou Atua.
E moni ua to’atele i latou ua ta’ua o Kerisiano, a e to’atele foi i latou ua le’i taitai ona iloa ma malamalama i le uiga moni o le Kerisiano.
O LE TAOFI O LE TUSI PAIA I LE “MALO O LE ATUA.” [Feagaiga Tuai]
Ua faaaogaina le upu “Malo o le Atua” i le uiga: O le faatinoga o le pule a le Atua, ma lona talia e tagata. (silasila i le Salamo 145: 10-13), O lo’o iloa ai iina le faaaogaina o le “Malo”; ma sa masani ai foi ona faaaoga e Iesu lea lava uiga o le “Malo”.
Salamo 145:10-13, “Le Alii e, e vivii atu ia te oe mea uma na e faia; e faafetai atu foi ia te oe ou tagata amio Atua. E tautalatala atu i latou i le mamalu o lou malo, ma ta’uta’u atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo. O lou malo o le malo lea e faavavau lava; ma lau pule e au tupulaga lava lea.”
O le upu “Malo o le Atua”, ua tutusa lava ma le “Malo o le Lagi”, e pei ona faaaogaina i le tusi a Mataio.
O le manatu o tagata Iutaia, ia aua lava nei ta’ua le suafa o le Atua, aua e soli ai le Tulafono e Tolu, aua o le Atua o lo latou Tupu lava lea.
Ua leva lenei talitonuga i tagata Iutaia, o le Atua o le Tupu. O le pogai lea na faaalia ai le le fiafia o Samuelu ina ua fesili le nuu mo so latou tupu; ona faamanatu lea i ai e Samuelu: (ref. 1 Samuelu 12:12). “ … a o le Alii lo outou Atua, o lo outou tupu lava lea.” Ua latou iloa lava, sa i ai o latou pule faale-lalolagi, e pei o Solomona ma Aapo, peitai, o ia tupu sa i ai na o ni nai tausaga. A o le Atua, o le Tupu moni ma lona Malo e faavavau ….. “O lou malo o le malo lea e faavavau lava; ma lau pule e au tupulaga lava lea.” [Salamo 145:13].
O le mea lea sa latou faatalitali ai ma le faamoemoe i se taimi o le a faaalia ai ma le manino e le Atua, o ia lava o le Tupu, ma o lona agalelei o le i’uga manumalo lea. Sa latou naunau mo lea aso—ua faaalia i upu o i le Salamo 22. [1-31, esp.6-8, 16-18, 29-31]. Ua manino i fuaiupu 29-31 e i ai le manumalo o le pule faa-Tupu a le Atua.
Peitai, o le ala ua faaalia manino ai le faamoemoe o tagata Iutaia, o molimau ia mai le ‘au Perofeta, o e sa faatalitali ma le faamoemoe i se feagaiga fou i le va o le Atua ma ona tagata.
Molimau:
(Ieremia 31:31-ff): “O loo fetalai mai le Alii, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta.”
(Tanielu 7:13): “Na ou iloa i faaaliga i le po, faauta foi, ua afio mai i ao o le lagi Le e pei o le Atalii o le tagata, ua oo foi ia i Le ua mai anamua ona aso, ua latou momoli ia te ia i ona luma.”
(Isaia 53) – o le Auauna puapuagatia.
(Sakaria 9) – o le Tupu Faamaulalo.
Ua tatou iloa nei, sa faaalia le faamoemoega o tagata Iutaia i ‘auala eseese e tele. A e ui lava i lea iloa, sa faigata ona talitonu Iutaia i nisi aso, o le Atua o le Tupu moni lea. Aua sa fetaia’i soo i latou ma le manumalo o le leaga i le lelei; a e le gata i lea, e mafatia foi ma puapuagaina i latou ua talitonu.
A’oa’oga:
E faapea foi lo tatou olaga masani, ua leva lava ona tatou iloa le “tala lelei” ia Iesu Keriso ma lona finagalo: E pei ona faaolaina le tagata agasala, e ala i le loto ua salamo ma faatuatua i lona maliu; na toe soifua mai o ia nai le oti ma le tuugamau; ua afio a’e i le lagi e mafuta ma le Tama. Ua fai foi o ia ma Puluvaga i le va o le Atua ma le tagata-agasala. Peitai, e ui lava ina a’oa’oina so’o i tatou i faasinoga lelei ma le taua mai le Tusi Paia, o lo’o faailoga fesili pea lo tatou: ……faamaoni, faatuatua, ma le usiusita’i.
Ae se’i fesili ifo ‘oe ia te ‘oe, o a’u foi ia te a’u: O le a ‘ea lo’u tofiga ma o’u tiute i totonu o lenei Ekalesia?
O tumau ‘ea lou loto talitonu ma ou faatuatua pea i la’u ta’utinoga ou te auauna ma tapua’i i lenei Ekalesia?
O o’u usiusita’i ‘ea i le finagalo o le Iesu Keriso ma le tala lelei, e tusa ma le ta’ita’iga a le Leoleo Mamoe?
Ia galue pea le Agaga o le “tala lelei” i o tatou loto ta’itoatasi, ina ia tatou savavali i le Upu Moni o le “Malo o le Atua.”
I le suafa o le Keriso Iesu lo tatou Alii. ………….. Amene.
——————————————————————————————————————————————
Ina ia Silafia: O le mata’upu e uiga i le, “Malo o le Atua”:
“O le tali: O Iesu o le Tupu lea.”
O LE TALI: O IESU O LE TUPU LEA.
Ua folafola mai e Iesu, o IA lava o le Tali i le faamoemoe o ona tagata, e pei ona ia fetalai ai i ona so’o: [Luka 10:23b, 24]
“…Amuia mata ua iloa mea tou te iloa; aua ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le tiloa lava; na latou fia faalogo foi i nei mea ua outou faalogo ai, a e lei faalogo ai lava.”
======================================================
Saunia:
Rev. Emau S. Petaia, F.S.
09/02/09 – Leone
