O le a le toe agai se manatu i se faamatalaga (definition) o le mea ua taua o le “aganuu”.  A o le a taotao pea le i’umaea o lenei palupaluga i le faamatalaga o le upu lea o loo i le tusi “Faavae o le Ekalesia EFKS” i le itulau e 18, ma o lea ua siitia atu i inei i le faa-Samoa ma le faa-Peretania:

“Soo se mafaufauga fou, poo se lagona, poo se uiga fou foi e talia ma faaulufaleina mai e se vaega toatele o tagata, e ta’ua lea o le aganuu.  E tatau lava ona i ai se faavae e mafua ai ona faapea, i le faafeagai ai ma lo latou olaga i aso taitasi.  A e gasolo mai aso e le taumate o le a tau atu i latou i le faale-feagai lelei o nisi o ia uiga, poo le avea foi ma faalavelave ia i latou.  O le a toe teuteuina atili e i latou ia uluai faiga, i ni laasaga fou ua manaomia e tusa ai ma le malamalama latou te oo atu i ai.”
(All new ways of thinking and all new ideas which are received and adopted by a large group of people, may be described as their way of life or culture.  It is right that there should be such a basis for their lives so that they may meet the needs that each day brings.  As times go by, no doubt they find that some of these ideas are no longer relevant and may even become a hindrance.  They revise their former ideas in accordance with the new light received.)

O le mea lava ua tatou iloa i le oo mai o misionare, ma le atia’e o le Ekalesia mai le amataga, sa iloa lelei e misionare e tele mea taua o loo i ai i le aganuu a Samoa, e mafua ai ona lelei lo latou ola pulea po o le ola pulepulea lelei faa-faapotopotoga (well organized communal life); ona o le taua o le aiga i totonu o le nuu, ma le nuu i totonu o le itu-malo, etc.  O le faiga faavae atamai lea a le Sosaiete LMS, latou te le fia avatu se faiga tausisia e atia’e ai se Ekalesia i se atunuu fou.  A e vaai lelei po o le a le faiga faa-faapotopotoga o loo soifua ai tagata o le atunuu.  Ona tuu lea i ai o le avanoa e atia’e ai la latou Ekalesia, e fuafua i le faavaa po o le mamanu lea ua masani ai lo latou olaga, ma ua talafeagai lelei lava la ma le faiga lea na sau ai le Ekalesia Samoa.

A tatou vaai i le olaga lautele o tagata o le Ekalesia i Samoa i aso nei, e tele lava ina vaavaalua le Tala Lelei ma le aganuu i le tele o mea.  O nisi taimi ua aliali mai e pei ua aafia tele le Tala Lelei i le aganuu.  A o nisi foi taimi, e pei ua aafia tele le aganuu i le Tala Lelei.  Afai loa tatou te vaavaai i aafiaga o le Tala Lelei ona o le aganuu, ona tatou iloa ai lea e le na o ni itu leaga ua aafia ai le Tala Lelei, a o loo i ai foi itu lelei.  O le aganuu a Samoa, e faailo ana mea taua pe a faaaoga aloa’ia.  E pei la o mea ia:
(1)  O le ‘Ava:    O le fatu lea o le aganuu a Samoa i le va fealoaloa’i e masani ai, a e maise le va faatamalii o aiga ma faleupolu.  A feiloai aiga ma paolo ma gafa, etc., e tomua lava i le ‘ava (e folafola).  A fai foi lauga o le taeao, e tomua lava i le ‘ava.  O se faataitaiga:  O le mea lava la ua iloa, pe ‘ava usu, pe ‘ava faatali, pe ‘ava feiloa’i, pe ‘ava tapua’i, e tumau pea le aga lea a le aganuu o le “faailo”.
(2)  O Taumafa:    O nisi nei o ta’umafa talimalo ma faiga’ai e masani ai le atunuu:  (i)  Taalolo;  (ii) Sii laulau;  (iii) Laulautasi;  (iv) ‘Aiava;  (v) Talo pa’ia;  (vi)  Galue faafafa;  (vii) Amo’ulu;  (viii) ‘Ava taeao;  (ix) Umufono;  (x) Paega;  (11) Tau tauga, etc.  O le uluai fa i le lisi (1-4), o loo faaaoga lava i aso nei.  A o le isi vaega, peiseai ua le talafeagai ma le mea ua soifua ai le atunuu i aso nei.  A e mafai ona faaopoopo i ai le lunch, po o le dinner i se faleaiga, po o le barbecue i lalo o se fa’i po o se mago; po o lalo foi o se laau talie i le mea e i ai Beach Fales, pe a uma ona taeleele i le sami.  O faiga na ua aga’i i ai aso nei.  Afai foi o le a oo i le taimi e fai ai le fetuunaiga o toga, etc., ma tupe, etc., o le aga masani lava—e “faailo” mea taitasi uma.

O le faa-Kerisiano:  Ina ua amata mai le Ekalesia i Samoa, ma ua fai lana tautua foa’i mo le Atua e ala i taulaga ma le alofa i le Faifeau, o le faiga foi lea sa sau ai lava e oo mai i nei aso—o le faailo.  E i ai pea lava le lagona, e le o leaga le aumaia e le Ekalesia o lea foi faiga sa masani mai ai le atunuu, ma faaaoga i lana foa’i mo le Ekalesia.  E tusi lelei lou suafa ma le mea ua foai.  O lo’u taofi, e le o se aafia leaga lea o le Tala Lelei i le aganuu, a o se aafia lelei.

O le vaivaiga o le aga:  O le vaivaiga matauliagofie lava, o le avea o le faiga lea ma avanoa e ulufale mai ai se faiga faa-tauvaga, ma faia ai loa i le fia maumea o le tagata ma faalialia, a ua mou ai le agaga foa’i faale-Tala Lelei (Mataio 6:1-4); ii Korinito 9:6-15).  O le alii epikopo o le Ekalesia Agelikana o Initia e suafa ia Asaria (Bishop A.S. Azariah), na lomia lana tusi e uiga i le foa’i faa-Kerisiano (Christian Giving) i le tausaga e 1954, ma o loo faapea mai ai:  o Samoa o se tasi o atu motu na faatoa faa-Kerisianoina i le amataga o le seneturi e sefuluiva, a ua leva ona tutoatasi i le itu tau tupe.  E le o se mitamitaga lea mea, a o se faalototele mo tatou uma mo le ola foa’i, ina ia faamaoni pea la tatou tautua i le Atua, a e tusa lava po o le a le auala tatou te faia ai.

Mafaufauga faatupu manatu:  O nisi o mea maitauina na tutupu i le 40 tausaga ua mavae atu nei, o le vavae ese atu lea o Tutuila ma Manu’a e atia’e la latou lava Ekalesia ia Aokuso 1980; a e maise o le tutupu malosi a’e o lotu laiti (po o lotu Patipati) i totonu o le atunuu.
O le mana’o o Tutuila ma Manu’a, ua leva lava ona tuputupu mai, e aofia tele ai le itu tau tupe a le Ekalesia; ona o lo latou manatu ua fia atia’e tele le itu i le tino o le Ekalesia i Amerika Samoa, a ua loa ona noatia pea ma noatia pea mai i Samoa i Sisifo.  A tatou vaavaai lelei lava i le mana’o o Amerika Samoa, e le o se mea leaga lea.  E taua tele lava mo i latou ma a latou fanau.  Ona pau le itu leaga i le matau atu, ona ua fai ma se loto tiga.  E tele lava mea sa le femalamalamaa’i ai le vaega tele o itu e lua.  O le ala lea ua sipa mamao ese ai mai le saunoaga a Malietoa i lena foi va i taimi.  Ui lava i lea, tatou faafetai i le Atua, ua toe sau malama i lona agalelei ma lona faapalepale mai, pe a oo ina leaga la tatou faafoega o lana Ekalesia.

O le tutupu saosaoa ma telelise o lotu laiti i lenei foi senetusi, ou te taofi, o se lu’i lelei lava lea mo tatou uma.  Tatou tatalo pea ma faatuatua i le Atua, ina ia foai mai le tamaoaiga faaleagaga, tatou te mafaia ai ona faafailele lana lafu mamoe, e aunoa ma le loto tiga ma le loto faamaualuga.
O le aganuu sili lava mo tatou i lenei vaitau, o le faamamafaina lea o le uiga faa-tama ma le faa-tina, e taofiofi mai ai a tatou fanau i le mea sa faafailelei ai tatou e o tatou matua.  E mana’omia moni lava (badly needed) e nai a tatou fanau le uiga lena.  Pei o le upu a le tama mafatia i le tala a Iesu i le Uii ma le Ulumatua, “O a’u mea uma foi, o au ia.”
Ia manuia le Mafutaga, ona o Iesu.
[Saunia:  Rev. Oka Fauolo, F.S.
Apia, Iulai 18, 2002.]

“Tapua’i i le Malamalama o le Eseta”
[Easter Sunrise Service]

FAASOLOGA
[Ta’ita’i:  Rev. Emau S. Petaia, F.S.]
LOGO MUAMUA: 4:45 am. …….[Pogisa le Malumalu]……..Ulufale i le Malumalu SIONA
[Faamumu moliga’o]
LOGO AMATA – 5:00 am. ………..[Logo (3) Amata] ………………………………….. AMATA.
VALAAU E TAPUA’I I LE ATUA …………………………………………TA’ITA’I:
[Call To Worship]                                     Rev. Emau Petaia, F.S.
“I le suafa o le Atua le Tama, le Atua le Atalii, ma le Atua le Agaga Sa”
[Faapotopotoga] ……………………………………..AMENE.
Tina/TAMA’ITA’I:
Tula’i ia, ina malamalama ia, aua ua oo mai lou malamalama; ua alu a’e foi le
pupula o le Alii i ou luga.
Tane/o ALII:
Aua faauta mai, e ufitia le lalolagi i le pouliuli, e ufitia foi nuu i le pogisa; a e afio
a’e le Alii i ou luga, ma le pupula o le Alii e aliali mai lea i ou luga.
FAATASI:
E o mai nuu ese i lou malamalama, o tupu foi e o mai i latou i le pupula o lou alu a’e.
[Ta’ita’i] — Tatalo Amata ………………………………………………………………..Amene.
[Titina Moliga’o]
FAAMATALAGA: [1]  (Nareta – TAEAOAFUA.
Ua tatou potopoto ma ‘auai faatasi i lenei Sauniga paia, ma le loto talitonu e miliona ma miliona le faitau a’ofai o Kerisiano i le lalolagi, o loo latou maua foi lenei agaga e tasi, e pei ona tatou faamanatuina ai i lea tausaga ma lea tausaga, le maliu ma le toe-tu mai o Iesu Keriso mai le oti ma le tuugamau.
A e tatou te le’i o’o atu i se mafaufauga faasino tonu i le Toe-Tu, e ao ina toe faatepa o tatou mata faale-mafaufau, i taimi pito sili ona faigata o le Alii o IESU, i le faasi’usi’uga o lona soifua faale-tagata i le lalolagi.
E tolu aso e fia ta’ua o le “Vaiaso Paia” ua mavae:
(1)  Muamua: o le Aso Tofi, ua ta’ua o le “Aso Tofi Faatonuina.”  (MaundyThursday)
(2) Lua: o le Aso Faraile, ua ta’ua o le “Aso Faraile Matagofie.”   (Good Friday).
(3) Tolu, o le Aso Toonai, ua ta’ua o le “Aso Toona’i Lelei”. (Good Saturday)     [pause]….
Na pogisa uma le lalolagi, aua……. ua maliu IESU!   Ua tuumalo le Tupu o tupu, ma le Alii o alii!
[dim light - throughout the worship until the end when “light” is called.]

TA’ITA’I/Faifeau: [PESE---1]      “Tala’i le Tala Moni”
Le tala ia Iesu.
Ta’la’i ia lona alofa, Tala’i le filemu….”

FAAMATALAGA: [2] (Nareta.)  TAEAOAFUA.

(1) O le ulua’i Aso Tofi, sa IA faatonuina mai:
“O le poloaiga fou ou te tuuina atu ai ia te outou, ia outou fealofani; faapei ona ou alofa atu ia te outou, ia fealoafani foi outou. O le mea lea e iloa ai e tagata uma lava o o’u soo outou, pe a fai ua outou fealofani.”
(Ioane 13:34-35)
Ua o’o ina mavae le Paseka, o le sauniga e taua ma e faamanatuina pea e tagata Iutaia.

TUSI PAIA [1]:  (Reader) – SI’ALEI PETAIA
“Ona o ai lea o Iesu faatasi ma i latou i le fanua ua igoa ia Ketesemne; ua faapea atu foi o ia i le au soo, “Ia outou nonofo i inei, se ia ou alu atu iila ou te tatalo.” Ua o ane o ia ma Peteru ma atalii o Sepetaio e toa lua, ona tiga lea o ia ma atuatuvale.  Ona fetalai atu ai lea o ia ia te i latou, “Ua matua tiga lo’u loto e oo i le oti; ia outou nonofo pea iinei, ma ia tatou mataala faatasi ma a’u.” Ua maliu faaitiiti atu i luma, ona faapa’u fao ai lea o ia ma tatalo, ua faapea atu, “Lo’u Tama e, afai e mafai, ia ave ese lenei ipu ia te a’u; a e aua le faia lo’u loto, a o lou finagalo.”

Ona maliu ane lea o ia i ona soo, ua maua i latou o momoe, ona fetalai atu ai lea o ia ia Peteru, “Pe faapena ‘ea ona outou le lava ona tatou mataala faatasi ma a’u i le itu po e tasi?  Ia outou mataala ma tatalo, ina nei oo mai le faaosoosoga ia te outou; [ua manao i ai le loto, a o le tino ua vaivai.]”  Ua toe maliu ane ia o le atu lua lea, ua tatalo, ua faapea atu, “Lo’u Tama e, a le mafai ona ave ese o lenei ipu ia te a’u seia ou inu ai, ia faia lou finagalo.”  Ona maliu ane ai lea o ia ua maua i latou ua toe momoe; aua ua maaa o latou laumata.

Ona tuua lea o i latou e ia, ua toe maliu ane, ua tatalo o le atu tolu lea, ua fetalai atu i le upu lava e tasi.  [Ona maliu ane ai lea o ia i ona soo,]  ua faapea atu ia te i latou, “Ina momoe pea ia, ma malolo; faauta, ua latalata le itu po e faalataina ai le Atalii o le tagata i lima o tagata agasala. Ina tutu ia, tatou o; faauta, ua latalata mai o ia na te faalataina a’u.”       (Mataio 26:36-46)

FAAMATALAGA [3]: (Nareta.) – TAEAOAFUA.
(2) O le Ulua’i Aso Faraile (Good Friday), o le aso e sauniuni ai tagata Iutaia i le oo mai o le aso Sapati—ua silia nei i le lua afe tausaga ua mavae.
E ui i le tele o tausaga ua mavae, a ua tatou faamanatuina pea, e le gata i tausaga ta’itasi, a e sili ona latalata mai i o tatou loto, i le soifuaga masani o aso ta’itasi—e pei o lenei:
>teuteu le loto-i-fale, pupuni ‘ie faamalama;
>faamama ane le potu nofonofo;
>solo le laulau ‘ai sa ta’umamafa ai;
>manatua, o le laulau o le faatusa o le lao’ai;
>avane le pale-tuitui e fai ma totonugalemu o lau vaai i puapuaga ma faigata;
>o loo i ai laau-toto e tutupu lauolaola, o latou lau e fetiitii, o le faatusa o le toto sa faamaligiina………….

I le ulua’i Aso Faraile (Good Friday), sa pogisa le lalolagi i aso e tolu!

TUSI PAIA [2]  (Reader.) – CATHY SAELUA.
“Mulimuli ane ua silafia e Iesu ua uma ona taunuu o mea uma, ua ia fetalai ane (ina ia taunuu ai le Tusi), “Ou te fia inu.”
(Ioane 19:28).
O le faailoga lena o lona soifuaga faaletagata ua atoatoa, e i ai ona tiga e pei foi o i tatou uma.  [pause]
Ae maofa lava o tatou loto, ina ua ia fetalai mai:
“Lo’u Tama e, ia e faamagaloina atu ia te i latou; aua ua latou le iloa le mea ua latou faia.”
(Luka 23:34)
“Lo’u Atua e, lo’u Atua e, se a le mea ua e tuulafoai mai ai a’u?”
(Mataio 27:46)

E atu fitu si’ufofoga o IESU i luga o le Satauro.  O lana toe saunoaga lava, e fitu a’i—ua faaalia ai lona faalagolago atoa, faapea ma lona talitonu faamaoni i lona Tama, ua IA fetalai:
“Lo’u Tama e, ou te tuuina atu lo’u nei agaga i ou aao!”
(Luka 23:46b).  [Pause for a second]
“Ua na fetalai ia upu, ona to ai lea o lana manava……”
(Luka 23:46c).

(pause – darker light)

FAAMATALAGA [4]:  (Nareta.) – TAEAOAFUA.
TALOFA e! .………. Oi Talofa e! …..
Pe ana fai o o’u lotolotoi i lenei vaaiga faamomoi loto!  O le a sa’u mea o le a fai!
[Pause for a second . . . . . . . . slowly and wonder!]

Ua maliu IESU!  O lona tino ua momoli atu i lona tuugamau na foa i le papa.
A o le tuugamau foi, na matua tapuni mau lava le gutu i le maa tele.
O fitafita-tau, mai le malo o Roma, na ‘auina faapitoa mai lava e leoleo, ma vaavaai ina ne’i gaoia faanana le tino-maliu o IESU i le po, e nisi o ana faauo.
THE HOLY SATURDAY  (Aso Toonai Paia).

TA’ITA’I/Faifeau: [PESE---2] – “O ai ‘ea lea tupu mamalu,
E leai sona malo i le lalolagi nei…”
TUSI PAIA [3]  (Reader) – MELISA COULTER
(1)  “… O le tupulaga leaga ma le mulilulua ua latou sailia mai se faailoga; a e leai se faailoga e avatua i ai, ua na o le faailoga o Iona le perofeta.  Aua e pei o Iona sa i le manava o le i’a tele i aso e tolu ma po e tolu, e faapea foi ona i ai o le Atalii o le tagata i lalo i le eleele i ao e tolu ma po e tolu. …”
[Matthew 12:39-41]
(2)  “O le taeao, o le aso lea e tua’oi ma le aso o le sauniga, ua faapotopoto atu ai ia Pilato le ‘au ositaulaga sili ma le au faresaio, ua faapea atu, “Le alii e, ua matou manatua, na fai mai lena tagata pepelo, ina o ola mai o ia, A mavae aso e tolu ou te toe tu mai ai.  O lenei, ia e fetalai ane, ia faamauina le tuugamau seia oo i le aso tolu, ina ne’i o atu ona soo i le po, ma gaoi ia te ia, ma latou fai atu i le nuu, Ua toe tu mai ia nai e ua oti; ona sili ai lea o le pepelo e mulimuli i le na muamua……..”
[Matthew 27:62-66]
(3)  “Aua o ona po ia e lei iloa ai e i latou le Tusi, e ao ina toe tu o ia nai e ua  oti.”
[John 20:9]

[Sauniuni mo le o’o mai o le Toe-Tu---Sound System.]
TA’ITA’I/Faifeau: ……………………………………………………………ASO O LE TOE-TU
(Easter Sunday).

Usu po ai o Maria,
Ua maofa ina ua le iai o IA.”

TA’ITA’I/Faifeau: [PESE---3]    “I le Taeao Sesegi”,
Usu po ai o Maria, Ua maofa ina ua le i ai o IA….”

FAAMATALAGA [5]: (Nareta.) – TAEAOAFUA.
E lima ni vaaiga matou te faaaogaina e faamaonia ai, ua Toe-Tu IESU.
Ina ua mavae le Ulua’i Aso Toonai paia, ma ua foufou mai le amataga o le vaiaso fou; a o tagata Iutaia, o loo talatalanoa ma le fiafia aua ua faatoilaloina lo latou fili.

TUSI PAIA [4] (Reader) – TAEAOAFUA
(1)  Vaaiga Muamua – Fitafita sa leoleo ua momoe i luma o le tuugamau.
“Ona fai atu lea o Pilato ia te i latou, Ua ia te outou leoleo, ina o ia, faitalia lava outou ona faamau ai.”  Ona latou o ai lea, ua faamauina le tuugamau, ua faamaufaailoga i le maa, ma tuu ai tagata e leoleo ai.”
(Mataio 27:65-66).

TUSI PAIA [5] (Reader) – MASELA MELEISEA
(2)  Vaaiga Lua – O fafine na asiasi ma teu fugalaau i le tuugamau.
“O le ulua’i aso o le vaisapati, ua latou o atu ai i le tuugamau i le tafa o ata, ua ave mea manogi na latou saunia.  Ua iloa e i latou ua fuli’eseina le ma’a nai le tuugamau; ona latou ulu atu lea i totonu, a e le’i iloa le tino.  Ua fememea’i i latou i lenei mea, faauta foi, ua tutu mai ia te i latou tagata e to’alua ua o’ofu i ofu pupula.  Ua matata’u i latou, ua punou foi o latou mata i le eleele, ona la fai mai lea ia te i latou, “Se a le mea tou te saili ai le ua soifua i e ua oti?
(Luka 24:1-6a).

TUSI PAIA [6] (Reader) – LITA LANG
(3)  Vaaiga Tolu – O upu a le Agelu i fafine: “Ua toe tu IESU.”
“O le taeao lava, o le aso muamua o le vaisapati, ua latou o atu ai i le tuugamau i le alu a’e o le la.  Na fetautalatala’i foi i latou, ua faapea ane, “O ai ea se na e fuli’eseina le maa mo i tatou i le gutu o le tuugamau?”  Ua latou vaavaai atu, ona iloa lea, ua uma ona fuli’eseina o le maa; aua ua matua tele ia. Ua ulu atu i latou i le tuugamau, ona latou iloa lea o le taule’ale’a o nofo i le itu taumatau, ua ofu o ia i le ofu pa’epa’e tatapuvae; ona latou matata’u ai lea.  A ua fai atu o ia ia te i latou, “Aua tou te matata’u; o loo outou saili ia Iesu le Nasareta o le na faasatauroina; ua tu o ia; e le o iinei; ina matamata ia i le mea na latou tuuina ai o ia.”
(Mareko 16:2-7).

TA’ITA’I/Faifeau: [PESE---4]    – “Le Tala i Lona Toe-Tu”
Le tala lelei, le tala ia Iesu…”

TUSI PAIA [7] (Reader) – TAIFITA TOOMATA
(4)  Vaaiga Fa – O talanoaga a Iesu ma so’o e to’alua i le ala i Emau.
“Faauta foi, ua o le to’alua o i latou i lea aso i le aai, o Emau le igoa, o lo la va ma Ierusalema pe fitu maila.  Sa fetautalatala’i i laua i ia mea uma na faia.  Ua la fetautalatala’i, ma fesu’ea’i, ona faalatalata mai ai lea o Iesu, ua o faatasi ma i laua.  A ua punitia o laua mata, o lea ua le iloa ai o ia e i laua.  Ua fetalai atu o ia ia te i laua, “O a ea ia upu ua oulua felafolafoa’i ai, o oulua o savavali?”  Ua tutu i laua ma mata faanoanoa……”
(Luka 24:13-23).

TUSI PAIA [8] (Reader) – TAEAOAFUA
(5)  Vaaiga Lima – Ua faatasi Iesu ma ona so’o i le fale.
“Ua oo i le afiafi o lena aso, o le uluai aso lea o le vaisapati, ua punitia faitotoa o le mea na potopoto ai le ‘au soo, ona o le fefe ia Iutaia; ua maliu atu Iesu, ua tu i totonu; ona fetalai atu lea o ia ia te i latou, “Ia outou manuia.”  Ua ia fetalai atu lea mea, ona faaali atu lea ia te i latou o ona lima ma lona itu.  Ona olioli ai lea o le ‘au soo ina ua latou vaai atu i le Alii.  Ona toe fetalai atu lea o Iesu ia te i latou, “Ia outou manuia.  Faapei ona auina mai o a’u e le Tama, e faapea foi ona ou aauina atu outou.”  Ua ia fetalai atu lea mea, ona manava atu lea o ia ia te i latou ma faapea atu, “Ia outou talia le Agaga Paia….”
(Ioane 20;19-23).

TA’ITA’I/Faifeau: [PESE---5] – 360:  “IESU e, o lou Toto…”
Ia ou magalo ai,
Ai a’u nei agasala,
Ia faamamaina ai….”
APOAPOAIGA ……………………………………………………………………………… TA’ITA’I:
Mataupu Autu:  “UA toe tu IESU.”

TA’ITA’I/Faifeau: [PESE---6] – 158:   “IESU e, ou te fia fai,
O la’u taulaga ia te oe;
O la’u taulaga faafetai,
I lou alofa fua mai….”
SOLO ULUFAFO (Recession) — (Luma o le Malumalu)
[Tula’i le Aofia] —— (order) Au Faipese Siona; Faapotopotoga.

UPU FAAI’U [i lumafale o le Malumalu]………………………………………………………………….. TA’ITA’I
Ua tatou vaaia nei le Malamalama o le Taeao o le Eseta, aua ua oso a’e le Malamalama o le Eseta,
e faapei ona faasuafaina ai lenei sauniga faapitoa.  O le mea lea, ia tatou pepese faatasi…………
PESE & VIIGA — PESE 51:  “Sauni ia le pese fou,
Ua toe tu mai Iesu,
Ua malo i le tuugamau,
E le toe maliu Ia….”

TATALO FAAMANUIA E TUUA AI ………………………………………………….. TA’ITA’I:
Faai’u Lotu ……………………………………………………. Amene.

Congregational Christian Church of American Samoa in Leone,
[Ekalesia Faapotopotoga Kerisiano o Amerika Samoa i Leone.]
Malumalu o Siona le Mauga Paia;
“Tapua’i i le Malamalama o le Eseta 2010.” (Easter Sunrise Worship);
Aso Sa o le Eseta, Aperila 04, 2010; Itula 5:00-6:15 am.
Tala:  “UA TOETU IESU.”
Featuring (pesepesega):  “Siona Church Choir - Easter Music.”
ALL ARE INVITED.

Tusi Faitau:    OT -  Ioelu 2:21-27
NT -  Mataio 6:25-33
Matua – Mataio 6:31b, 32b:  “O lenei, aua nei outou popole, ma faapea ane: Ni a mea tatou te             aai ai, ni a foi mea tatou te inu ai, ni a foi mea tatou te oofu ai?  Aua o mea uma ia             ua sailia e nuu ese.  Aua ua silafia e lo outou Tama o i le lagi e aoga ia mea uma             ia te outou.”
Manatu Autu:    “’Aua le mafaufau i lo outou.”

Intro:    Ou te talitonu, e to’atele isi tagata e pei o i tatou, ua ulufale atu i maota tapua’i i le Atua, se’i faatino ma faataunuu le faamoemoe taua, na pogai ai ona faatulafonoina lenei Aso malolo e le malo o le USA ma ona teritori.
Ae ou te le’i tautala la faapitoa i le Lauga, se’i o’u fai sina faamatalaga itiiti, e faatatau i le Ulua’i Aso Faafetai i Amerika, e pei ona tatou faamanatuina pea i lea tausaga ma lea tausaga.

I le tausaga 1621 (388 tausaga taluai), i le vaitau o le tau-malulu, i le itu i Sasa’e o Amerika (east coast), o iina na amata ai ona tupu le lagona tuufaatasi o tagata Amerika ina ona po, ina ia faailoga se aso, e faatino ai le agaga faafetai i le Atua, ona o le manuia ua maua, e ala i fua o faato’aga ma le laueleele.
Sa leai ni Setete i na ona po, ua na o “kolone” (pulega faale-malo) e galulue faatatau i le pule faale-malo mai Peretania.  O William Bradford, o le kovana o le kolone o Plymouth, o ia lea sa na muamua faatonu le malo, ia faia ni sauniga e momoli ai le agaga faafetai i le Atua, ona ua manuia ma sologa lelei fua o faatoaga ma le laueleele.
O le 1623, na toe poloaiina ai kolone, ia faia ni talosaga faafetai i le Atua, ina ua faatoa maua se timuga i le lamala tele na feagai ma kolone i lea tausaga.  E oo mai i le 1630, ua amata ona masani kolone i le saunia o lotu faafetai i le Atua, e faailoga ai le manuia o seleselega i fua o faatoaga ma le laueleele; a e sa gata lava lea masaniga i le itu i Sasa’e o Amerika.
O le tausaga 1855 na amata ai i Amerika ona faamanatu o le Aso Faafetai i le Atua, i le itu i Sasa’e o le atunuu.  A o le tausaga 1863, na poloaiina ai e le peresetene o Abraham Lincoln, ia faatulafonoina le Aso Faafetai i le Atua, e faapei ona faia nei e le USA ma ona teritori.
I nei la tausaga, ua le na o le USA e gata ai lenei lagona, a ua faapea foi ona faia i le tele o malo Kerisiano i le lalolagi.

O le matua o le lauga: “…aua nei outou popole…ni a mea tatou te aai ai, ni a foi mea tatou te inu ai, ni a foi mea tatou te oofu ai?…Aua ua silafia e lo outou Tama o i le lagi e aoga ia mea uma ia te outou.”
Fai mai le manatu autu: “Aua le mafaufau i lo outou ola.”  Ua a’oa’o atu Iesu i ona so’o, “Aua nei outou popole i mea tou te ola ai…aua ua silafia e lo outou Tama o i le lagi.”
E atagia lea lava poloaiga, pe a tatou mafaufau i upu o le Tatalo a le Alii, e pei ona tusia e le ‘au faievagelia, “Lo matou Tama e, o i le lagi, Ia paia lou suafa. Ia o’o mai lou malo, Ia faia lou finagalo…” (Mataio 6:9f).  O lona uiga, ia tatou faamuamua le finagalo o le Atua i mea uma tatou te mafaufau i ai, ma manatunatu i ai i o tatou loto.  Ia tatou manatua, o le finagalo o le Atua e faamamafa i o tatou loto; a e le o mea tatou manana’o i ai i o tatou lava loto.

Ua faailoa mai i a’oa’oga a Iesu, o le pogai lea ua mafua ai ona tupu le loto popole i o tatou tagata talitonu ia Iesu, ona e foliga mai, o loo tatou faamuamua pea mea tatou te loto i ai, a e le o le finagalo o le Atua.  O le pogai o lenei poloaiga a Iesu, “aua nei outou popole,” i mea tou te manana’o i ai—aua e tatau ona faamuamua le finagalo o le Atua.  Afai e faapea ona tatou faia, ona pule lava lea  o le Atua i lona finagalo, i mea tatou te lelei ma manuia ai.

O se tasi o itu taua e ao ina tatou iloa, o le a’afia o le tagata i le “popole,” i lenei a’oa’oga a Iesu: O se tasi lea o agasala taatele i ona so’o; e le gata i ona ulua’i so’o, a e faapea lava ia i latou uma ua avea ma so’o o le Alii e ala i lana Ekalesia.  O le “popole” o se tasi lea o a’upega a Satani, na te faato’ilaloina ai le tagata talitonu ia Iesu.  Aua a o’o ina saisaitia le loto ma le mafaufau i le “popole”, ona faigofie lava lea ona ta’ita’i seseina le tagata i le tu’inanau ma faaosoosoga e tele.

O le uiga o le upu IOELU i le Feagaiga Tuai, o “Ieova o le Atua.”  O le autu o le fe’au ua ‘aumaia e lenei Perofeta, fai mai le valaau o le folafolaga mai le Atua (ff.21-23), “Le fanua e, …manu vaefa o le vao e, …o outou foi o le fanau a Siona e, ia outou fiafia ma olioli i le Alii lo outou Atua; aua ua ia foa’iina faatatau mai ia te outou le uaga muamua, na te faatotoina ifo foi le ua mo outou, o le uaga muamua, atoa ma le uaga mulimuli i le masina o muamua.”

O le finagalo o le Atua, ia aua lava ne’i popole le tagata talitonu i le Alii, a ia olioli ma fiafia.  Ia tuuina atu atoa le pule ma le faasinoga i le Alii.  O le Atua na te silafia ona faasoa ma faatatau mea tonu e ao ona mulimuli ai le tagata talitonu.  Afai e aunoa le tagata ma le faamuamua o le finagalo o le Atua, ona faigofie lea ia Satani ona tofotofo ma faaosooso le tagata talitonu i le loto tu’inanau ma le lagona faamaualuga.

A o’o ina filemu ma to’alelei le loto o le tagata talitonu ia Iesu, a o’o foi ina faamalieina ma faafiafiaina le lagona o le tagata talitonu i le Alii, i mea lelei ma le manuia e tele ua na maua, e ala i le foa’i alofa mai o le Atua:  O iina lava e tupu a’e i le loto, le “agaga o le faafetai” ona o le alofa ma le agalelei o le Atua ua maua i aso fai pea.
A e o loo atagia foi i le fe’au ua ‘aumaia e le perofeta o Ioelu, e i ai ona aso ma tausaga, e o’o mai ai le Mesia, na te ‘aumai le faaolataga i le Nuu o le Atua; o le faaolataga lea e maua ai le olioli ma le fiafia.
O le loloto ma le taua o lenei a’oa’oga a Iesu—aua nei outou popole, aua ua silafia e lo outou Tama o i le lagi e aoga ia mea uma ia te outou.  Afai o lea, ona moni ai lea o le Manatu Autu: “Aua le mafaufau i lo outou ola.”  O lo tatou soona mafaufau ma manatunatu i mea o le olaga nei, o le faitotoa lava lea e tasi: i le so’ona mana’o tele ma le ola tu’inanau e agasala ai.
Le aofia e, ia avea lenei Aso Faafetai ua tatou faailogaina, ma aso tatou te mafaufau ai pea i le alofa ma le agalelei o lo tatou Atua, ua na lavea’i mai ia i tatou i faigata ma puapuaga o le olaga nei.  Ua ia foai mai foi mea uma tatou te ola ma soifua ai i lenei lalolagi, o ta’umafa, o vai inu, o ofu ma lavalava, ma mea uma lava e aoga mo lo tatou lelei ma le manuia.
A e silisili ona taua, le foa’i sili, e ala i lona Alo Pele e to’atasi:  Na afio mai Iesu i le lalolagi e soifua faatasi ma le lalolagi; na inosia ma tuulafoaiina e tagata o le lalolagi; na o’o lava ina fasiotia e tagata o le lalolagi.  A e na toe soifua mai Iesu Keriso, ina ua mavae aso e tolu.  Ua afio i le lagi, e fai ma Fautua i le Tama, ina ia magalo agasala a le lalolagi.
O le mea lea, e ao ai ona tatou faafetai pea e le aunoa, e le gata i lenei Aso Faafetai, a e o ao uma o lo outou soifua ma lo tatou ola.  Ona o Keriso Iesu lo tatou Faaola.
AMENE.

LAUGA
 Tusi Faitau:    OT – Salamo 93
NT – Roma 10:1-4; 11:33-36

    Matua:    Roma 11: 33 & 36 — “Aue! le loloto o le tamaoaiga o le poto atoa  ma le silafaga a le Atua.  E le masu’esu’eina ana faamasinoga; e le  mafai foi ona iloa ona ala.  (36) Aua ua fua mai ia te ia, ma ua faia e             ia, e i’u atu foi ia te ia mea uma; ia ia te ia le viiga e faavavau lava. Amene.”

Manatu Autu:    O le Atua o le Pule aoao.

Intro:    E faasaga a’e o’u mata i mauga, e oo mai ai lo’u fesoasoani.  O lo’u fesoasoani mai le Alii lea, o le na faia le lagi atoa ma lalolagi. [Psa.121:1-2]

        Ae ‘ou te le’i tautala faapito i afioga a le Atua, ou te muamua talanoa atu faatagata-a-lautele, e uiga i le soifuaga ua i ai nei Samoa, talu ona tupu le “tsunami” lea ua afaina tele ai lo tatou atunuu.

 O le lagona o le fefe, ma le mata’u o le loto, o le amataga lea o se isi ituaiga olaga, ina ua aafia le mafaufau; e ono tupu ni uiga fou ma ta’ita’i sese le mafaufau i mea e vaavaai i ai mata.  O lona uiga, ua i ai ni amioga fou e ‘ese mai le tulaga sa masani ai—aua ua afaina le mafaufau mo aso o totoe o le ola.

       Tala:  I le motu o Salafai i Samoa Tu-to’atasi, sa i ai se faamata’u tele lava, ua fai ma tupua e tau’ave i mafaufauga o tagata o le nuu.  Fai mai le tala, o gauta ane i le ala-galue o le nuu, pe a o’o i le mea e i ai le vaivao pogisa, e putuputu ai la’au e igoa o le ‘paogo’, fai mai le tala:  O aso e atoa ai le masina, pe a o’o ina pogisa le afiafi, e vaaia ai lava e tagata o le nuu, se iila e matua uiga ‘ese lava, e sosolo a’e i le tino o se laau.  Ma, ua fai lenei vaaiga ma mea ua matua fefefe ai lava tagata e ui ane ai.

      O se tasi o taule’ale’a sogasoga i le nuu, na teuloto ia te ia lenei faamata’u matuia.  I le tasi aso, ina ua foufou le atoaga o le masina, ua manatu ai loa lenei taule’ale’a, o le a ou matua faaali nei lo’u loto-toa, e fia tago lava o’u lima e taofi mau i lenei pupula uiga ‘ese.

     Na matua saili se lafiga e pito sili ona lilo i lona manatu.  Ua amata nei ona pogisa le afiafi, a e faalogo atu loa le taule’ale’a, ua pa’o’o mai lalo o laau.  A ua atili ai ona toto’a lana vaai.  Ae ina ua amata ona pupula mai ‘ave malamalama o le masina, ma ua suluia lalo o pogati o laau, ae faate’ia loa le vaai a le taule’alea, ua amata ona totolo a’e vae lapopo’a lava o le “u’u”.  Ua ofo lona loto, a e ua tupu foi lona fiafia—aua, ua maua le tali o le “tupua”, ua leva ona a’afia ai tagata o le nuu:  O le fefefe ma matata’u, i le iila ma le pupula uiga ‘ese; a e o mata o le u’u ua suluia i ‘ave malamalama o le masina, a o totolo a’e le u’u i luga o laau.

        Manatu: Afai e malamalama le loto, ma iloa tonu le mafua’aga, ona ave’eseina ai lea o le fefe ma le mata’u.  Pe a soifua foi le tagata, ma ola i mea lelei ma fai le amiotonu, o le a fiafia le loto i aso o totoe o lona ola.

~~~~~~~~~~~~~~~~~~~~~~~~~~~~~~~~~~~~~~~~~~~~~~

    O le LAUGA i le suafa o le Atua-Tolu-Tasi:  Le Tama, le Atalii, ma le Agaga Paia.  Amene.

        Matua:       Aue! le loloto o le tamaoaiga o le poto atoa ma le silafaga a le                 Atua.  E le masu’esu’eina ana faamasinoga; e le mafai foi ona iloa ona ala.                  (36) Aua ua fua mai ia te ia, ma ua faia e ia, e i’u atu foi ia te ia mea uma;                 ia ia te ia le viiga e faavavau lava.  Amene.  [Roma 11:33, 36]

        Manatu Autu o le Lauga:  O le Atua o le Pule aoao.

        O le pese a le fai-Salamo:  Le Alii e, ua taalili mai vaitafe, o vaitafe ua taalili a’e o latou leo; o vaitafe ua taalili a’e o latou gogolo.  O le Alii o i le mea maualuga, e sili ona malosi o ia i le taalili o vai e tele, o peau malolosi o le sami.  O au mau e matua faamaoni ia; e onomea lava ona paia o lou fale, le Alii e, e faavavau lava.  [Psa.93-3-5]

      Ua uma ona tatou molimau i le taalili ma le gogolo o vai, ua tatou vaavaai foi i le mata’utia ma le malolosi o gaoioiga faa-natura; e le taitai ona faatusatusaina e le tagata ia mea uma i sona poto ma sona malosi.  A e fai mai le fai Salamo, e sili atu i lena, le mata’utia o le afioaga o le Tupu o tupu, ma le Alii o alii.

     A o le fesili:  Pe ai se a ua tuuina mai ai e le Atua, nei mea faigata faa-natura, ua aafia ai o tatou tagata? e faapei o mafui’e, o afa, ma tsunami?…..etc.

        Ua molimau le Tusi Paia (Kolose 1:16-17), o Iesu Keriso e pulea mea uma. Aisea ua o’o mai ai nei ituaiga faalavelave?  Ia outou manatua, e pule aoao le Atua; e pule i tau (weathers) o le lalolagi (Teutero. 11:17). “Ona tupu ai lea o le to’asa o le Alii ia te outou, ona pupuni ai lea e ia o le lagi, ina ia leai ni ua, ia le fua mai foi le laueleele ni ona fua; ona outou vave fao ai lea…”  (Iakopo 5:1) “O Elia o le tagata ia e tusa ma i tatou, ua matua tatalo o ia ina ia le ua; ona le uaina ai lea o le fanua i tausaga e tolu ma masina e ono.”

       E i ai foi le pule faale-Atua i isi faigata faa-natura—ua tutupu ia mea e fai ma faamasino mo e ua agasala. (Numera 16:30-34).  A silasila i le tusi o Faaaliga (6, 8, 16), o loo tusia ai nisi o faigata faa-natura, e fai ma faasalaga i le lalolagi agasala.  O le fesili:  Po’o mafatiaga uma ‘ea faa-natura, o faasalaga mai le Atua?  O le tali:  E leai lava.

       Ua tusia i le Roma (8:19-21), “o loo faatalitali mea uma na faia ma le naunau i le faaali mai o atalii o le Atua;” ina ia tusa ma fuafuaga na faia ai mea uma mai le amataga o le foafoaga.  Ou te fia faamatalaina e faapea:  Afai e faaopoopo le 2 + 2 = 4, o le tali e 4, o lena lava e le suia.  A o se isi foi faaupuga:   Afai o le lalolagi ua aga’i atu i lona i’uga, e faapea lava ona o’o mai, e le toe suia lava.

       Pe ai se a ua faapea ai?  IOE, e te manatua foi le tala i galuega foafoa a le Atua, lea na faia ai le lagi ma le lalolagi i le amata!  Na faia ai ma le Ulua’i Tagata, e fai ma “leoleo” i le faatoaga.  Ae paga lea, ua agasala.  Ona saunia foi lea o le totogi o le “agasala”, o le faasalaga e amata i le fanau mai, se ia o’o lava ina tuuina ifo i le lefulefu ma le efuefu na faia ai le tagata.  O le pogai malamalama lena, e uiga i le amata o faigata ma puapuaga.  Ae manatua pea, e le’i tuulafoa’iina le tagata e le Atua le Pule aoao.

       O le a se fesootaiga o ia fuafuaga ofoofogia a le Atua ma le “tsunami”?  Taga’i pea, ia Leone:  A o o’u alu ane ma faasolo la’u vaai, i ou laufanua ma ou muafale, ona ou manatunatu lava lea i upu o le Tusi Pese a le LMS #225-4, o le pese o loo tatou pepeseina i taimi o mafatiaga, fai mai: “O lenei ia onosa’i i puapuaga, E le tupu fua mea faapena….., (repeat) E le tupu fua mea faapea.”

        LEONE, o fea o i ai sou finagalo?  Ou te le tau su’esu’eina, aua ua lia’ina i malae ma ala, fai mai: Ua fai le Aso o le Alii (Aso Sa), ma Aso tou te faatafuna i ai.  E le o le faatoa tupu foi lea o sea mea faapea ia Samoa; a e mulimuli ane, o le faatinoina lava lea o le to’asa o le Alii i e faifai mea leaga.  Ou te talitonu, e le o le LOTU, a e pogai mai lava i uiga, ma amioga le taupulea a le tagata e le faatuatuaina.

        TALOFA!  O i tatou uma nei, o “totino” lava o lenei nuu o Leone—o aano ma toto outou, a o i matou o e folafola atu, o totino Leone, ona o le finagalo o le Atua silisili ese, ia faaali atu lona finagalo ma lana amiotonu.

        TALOSIA!  Ia fai se aoga o lenei aso mo i tatou uma, Leone.  Ae aua ne’i galo ia te outou, ua a’oa’o mai afioga a le Alii:  E oti le amiotonu, ina ia ola le amioletonu.  Na maliu Iesu Keriso i luga o le satauro, ina ia ola le lalolagi agasala—o ‘oe ma a’u, ma tagata uma o lenei nuu o Leone.  Ona o Keriso Iesu.

        AMENE.

Matua – f.35:  “Tou te le fai ane ea, E toe fa masina, i le oo ai i le seleselegasaito; faauta, ou te fai atu ia te outou, ina tepa a’e ia o outou mata, ma                 vaavaai i le fanua ua sinasina mai nei i le seleselegasaito.”

Manatu Autu:  “Galue nei ua i ou lima le malosi.”

Intro:    “Galue!”  O le tasi lenei o upu pito taua i le soifuaga o le tagata.  E pei lava ona molimau le tusi o Kenese: Na faatinoina le lagi ma le lalolagi ma mea uma o iai—ona o galuega a le Silisili’ese.  A e mulimuli ane, ua na fausia foi le tagata i Lona faatusa paia, ia foliga ia te IA.

  Fai mai, na saunia le Faatoaga ma mea matagofie uma, e galue ai le Ulua’i tagata, o Atamu ma Eva.  O le faamoemoe, e tatau ona vivii ma faaneenee le suaga o le Alii le Atua i a la galuega.  Ae peitai, ua fia viia le tagata, a e le o le Atua;  ma, o  le i’uga, o le mala ma le masiasi.

Tala:  I se tasi aso, na valaau faaaloaloina e se tasi alii Sikotilani, sana uo mamae ina ia la faiaiga faatasi i lona fale.  Na talia ma le fiafia le valaau.

    A e pei lava o faiga masani, na faasaga lenei alii Sikotilani, ua muamua ona gasese le suati ta’umafa mo le mafutaga.  O le lauti-vevela na saunia, o le tu lea ma aga-i-fanua e muamua ona talialo ai se malo faimalaga mai i lea atunuu.  Na savali ane le alii Sikotilani ma le ipu-ti, ua tuu atu i lima o lana uo.  A o taofi pea e lenei alii faimalaga le ipu-ti, na ia faapea atu i le alii Sikotilani— “Se’i aumai lava le suka?”  A e faapea mai le Sikotilani— “alii e, o lena ua i ai i totonu, na ona e tago lava e sa’eu, ina ia matala.”  [faai’u].

  IOE, o le totonugalemu o mafaufauga: “Galue nei, ua i ou lima le malosi.”  O fetalaiga a Iesu, e pei ona molimauina e le fai-evagelia o Ioane, o a’oa’oga e faatatau i le soifuaga galue o le tagata i le ekalesia.  Ia galue ma faatino i lou malosi, o mea e manuia ma lelei ai le soifuaga i le lumana’i.  Faauta i mea alofa e tele ua uma ona tuuina mai i ou aao ma o’u lima?  Le tamaoaiga e maua pea i lea aso ma lea aso, i lea vaiaso ma lea vaiaso, i lea masina ma lea foi masina.  A e po’o galo ‘ea ia te ‘oe le ola ma le soifua malosi, lea tatou te maua i aso e tele!  Tatou te le o faalogo so’o, i se tasi o i tatou o aafia ini faalavelave, ma ni tulaga e faanoanoa ai, ona oni mea e tutupu faafuase’i.  Ona pau le mea o loo faalogoina so’o:  “Le Atua e, ia e foai mai le manuia i o matou aiga ma la matou ‘aulotu.”

  IOE, vaavaai ma taga’i ane, o lena ua uma ona tuuina mai le “suka”.  Fai i ai sau galuega—ia sa’eu ma faatino i lou malosi!  ‘Aua e te toe faatalitali se’i atoa se fa ni masina, mo le faatinoina o le tino o au galuega mo le Atua.  “Vaavaai i le fanua ua sinasina mai nei i le seleselegasaito.”  O lena ua i ai mea e tatau ona e galue ai—tuu mai lou loto, tuu mai lou malosi— “Tatou galulue nei, aua ua i ou lima le malosi.”

     O Iesu lava o le puna o le malosi, a o lala i tatou.  O le lala e le fua mai, o ia lea e tatau ona lafoa’i ma tuu’ese, o le a le faaaogaina, o le a tipi ‘ese; e leai se malosi e tuuina i ai, na ona lafoaiina ma susunuina i le afi.

    Uso e i la le tala lelei a Keriso, o le finagalo o lo tatou Alii le Atua:  Ia tatou galulue ma faatino lona finagalo.  O mea lelei uma e te mafaia i lou malosi, ia tatou faia mo le viiga o le Atua—a e aua lava mo so tatou lava viiga—aua o le mala lea ma le masiasi.  Sa le’i faatinoina e Iesu le faaolataga mo sona lava viiga, a e o le faataunuuina o le finagalo o lona Tama na auina mai ai o Ia i le lalolagi—ina ia togiolaina le tagata agasala, ma ia maua le ola faavavau.

       O le maliu o Iesu i luga o le satauro, na tanumia i le tuugamau na foa i le papa, o molimau iloga ia o le “galuega” na faatinoina e Iesu Keriso mo le lalolagi agasala.  A e na toe-tu mai mai le oti ina ua mavae aso e tolu.  Na si’itia a’e o ia i le lagi, e mafuta faatasi ma le Atua le Tama.  Ua avea o ia e fai ma Puluvaga e fautua ai i le Tama, ina ia faamagaloina i tatou mai le leaga o le agasala.

    Uso e, galue nei!  Ia tautua ma auauna i lou Alii, aua e alofa le Keriso manumalo i e ua salamo ma faatuatua i le Togiola ua uma ona ia saunia.

    Ona o Keriso Iesu lo tatou Alii.

    AMENE.

     “ … E toe fa masina, i le oo ai i le seleselegasaito; … ina tepa a’e ia o outou mata, ma vaavaai i le fanua ua sinasina mai nei i le seleselegasaito.”

===========================================================================================================

MO MAFAUFAUGA LOLOTO:

1.  O le a sau faatusa e ona talafeagai ma le upu, “e toe fa masina, i le oo ai i le seleselegasaito”?

2.  O le a le uiga o nei upu, “fanua ua sinasina mai”?

3.  “O la’u mea e ‘ai, ia ou faia le finagalo o le na auina mai a’u, ma faaiu lana galuega.”  (Ioane 4:34b).

    O le a sau faamatalaga e uiga i lenei fetalaiga a Iesu?

—————————————————————————–

Rev. Emau S. Petaia, F.S.

Autu: “E tele pea mafui’e o le a o’o mai.”

Ioe, e o’o mai lava mafui’e i Samoa ma le lalolagi atoa—e maua tala ma ata i mafui’e mata’utia i le lalolagi, e o’o mai i le aso nei. A o taaalo ‘au i le su’ega o le siamupeni [world series] i San Francisco ia Oketopa 17, 1989, na faafuase’i lava ona lulu le mafui’e tele. O le toatele o le ‘au maimoa, sa fiafia lava i latou i le vaavaai ma faatalitali i mea ua manana’o i ai o latou loto, e le o mafaufau lava i se mea mata’utia o le a tupu. Ae o le toatele o e sa fiafia, na afaina o latou tino atoa ma o latou loto, ina ua faafuase’i ona lulu malosi totonu o le malae ma nofoa o loo nonofo ai. IOE—e le uma mea tutupu i le olaga o le tagata e le o sauniuni.

Fai mai le ‘au saienisi, e tusa o le va o le 2,500 i le 10,000 mafui’e e luluina ai le paneta o loo tatou o nonofo ai nei. O le tele o ia luluga e leai se malosi o i ai, ae e i ai lava luluga e malolosi e aafia ai le lalolagi. O le tausaga e 1812 na lulu ai se mafui’e tele i le setete o Missouri, e 8.8 le malosi i lona fuaina—e matua malosi lava. O le mafui’e lea na suia ai le alavai e tafe atu ai le vaitafe o Mississippi River. O le mafui’e o le 1976 i Saina na maliliu ai le aofai e 400,000. Sa ou nofo i Los Angeles ina ua lulu le mafui’e i le tausaga 1970, e tusa o le 7.0 le fuaina o lona malosi, e matua mata’utia lea malosi.

O le mafui’e o loo taua i le tusi o Faaaliga, e oo ina lulu i se taimi ma aafia ai le lalolagi atoa i le faitau afe ma afe, pe miliona foi ma miliona. O i latou e faasaoina mai, latou te vivii atu i le mamalu o le Atua i le lagi [f.17].

Ia e taumafai ‘oe e ‘oe lava e pulea lou soifua i soo se taimi ma soo se aso. Aua nei mafaufau tau o mea e te lelei ai, ae ia manatu foi i mea mata’utia e tutupu faafuasei e aafia ai lou soifua ma o tatou ola i soo se taimi ma soo se itula. Ia manatua: “Ua oti foi i le mafui’e tagata e toafitugaafe; ua matatau foi e na totoe, ona latou vivii atu lea i le Atua o le lagi.” ……. Amene.

saunia:
Rev. Emau S. Petaia, F.S.
09/02/09 – Leone, AS.

O la’u Mata’upu: “O LE MALO O LE ATUA.” [The Kingdom of God.]
Tusi Faitau & Matua:
Luka 10:23b-24: …. “…Amuia mata ua iloa mea tou te iloa; aua ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le iloa lava; na latou fia faalogo foi i nei mea ua outou faalogo ai, a e lei faalogo ai lava.”
Luka 17:21 …. “E le fai ane foi tagata, Faauta, o iinei! pe faapea, O iila! aua faauta, ua i ai lava ia te outou le malo o le Atua.”
Mataio 12:28 …. “A e afai o le Agaga o le Atua ou te tulia ai e a’u o temoni, ua oo mai lava ia te outou le malo o le Atua.”
Mareko 13:32-33 …. “A o lea aso ma lea itu aso e le iloa e se tasi, e le iloa lava e agelu i le lagi, po o le Atalii; ua na o le Tama lava. Ia outou, ina
mataala ia, aua tou te le iloa pe oo mai afea ia so.”
Ua faamatalaina atili le Malo o le Atua i le tele o faata’oto a Iesu ua tusia e le ‘au faievagelia.

Faatomuaga:
O se faaupuga ua ta’atele i nei ona po, e faatatau i le Tala Lelei, po’o le talitonuga faale-Lotu Kerisiano, e faapea: “Ua ao Samoa i le tala lelei.” Peiseai e ta’u mai ai ua malamalama lelei tagata-lolotu i nei ona po i le talitonuga i le Atua. Ua lelei foi lea, a e se’i taga’i ane lava. E lua ni uiga vaivai e ono tupu mai i lea faaupuga:
(1) O se faaupuga e ‘alo ai le tagata mai le le-iloa ma le-malamalama lelei i le uiga moni o le “tala lelei”. I se isi foi faaupuga, o le matua le-malamalama lava.
(2) O le uiga o le upu “ao”, ua faatatau i itula o le aso ua mavae le po. O le malamalama e iloa atu ai foliga ma le tino mai o mea sa ufitia i le pogisa.

A e o le vaivaiga e ono tupu mai, o le so’ona filifili lea o le tagata le- malamalama i ona manatu, aua ua lautele le lalolagi e vaavaai i ai, ma o’o ai lava ina tosina i tu’inanau sese o le lalolagi.
O manatu amata ia e aga’i atu i ai le Mata’upu e fia talanoaina i le Lauga, ua faaulutalaina, “O LE MALO O LE ATUA.”
Ua le tutusa le faamatalaina o lenei Mataupu, o le pogai lea o le eseese o ekalesia Kerisiano ma tele ai ituaiga lotu, e pei ona tatou molimauina i nei ona po.
O faamatalaga nei ua ou faailoa atu, o le taofi faale-faatuatua lea ua fai ma Faavae o le talitonuga faale-ekalesia L.M.S., po’o le Ekalesia Faapotopotoga Kerisiano Samoa.

O le “Malo o le Atua” ua ‘auala mai ia Iesu Keriso: E le o fia maua se fesoasoani i le Atua mai le tagata; aua o le pule faa-Tupu lava lea a Keriso. O Iesu Keriso le Alii, e mo tagata uma—i latou ua talia, ma e foi e le’i talia lava. O e ua talia, e maua le fiafia ma le olioli aua ua latou ulufale atu i lea Malo; a o e le’i talia lava, e iloa le Malo i le faasala ma le to’asa o le Atua.
O le tiute tatau mo e ua talia, e galulue ia ‘aumai e ua le’i talia, se’i ulufale i totonu o le Malo, ina ia latou faia le finagalo o le Atua i nuu uma lava o le lalolagi. O lona uiga, ua uma ona o’o mai le “Malo o le Atua”, a e o lo’o faaauau pea le valaauina.
Ua fai ma uiga masani o le lalolagi, afai e fou se mea, e le tumau lena fou aua e o’o ina tuai. Sa fiafia lava i ai, peitai, e tauau ina mavae ma mou atu lea uiga. Afai foi sa taugata, e o’o lava ina pa’u ifo i lalo lona tau. A e ui i lea, e mafai lava ona tumau le uiga taua na mua’i iloa ai lea mea-taua.
E faapena le uiga o le olaga o le tagata Kerisiano, a e maise lava i lona tautalatala i le upu: “Malo o le Atua” e tautala i le avea ma uso—o le tasi i le isi; ma ia maua foi le agaga o le alofa. E faamata e faigofie lea faaupuga i le to’atele.
Peitai, afai e tatalo, “Ia oo mai lou Malo i le lalolagi e pei ona faia i le lagi,” ona ‘ese lea o le uiga o le upu “malo”. Ua sili atu lona malosi, e sili aua o le Malo o le Atua e sili atu ona tele lona uiga, i mea ia ua ta’ua.

O le fesili: O le a ‘ea le Malo o le Atua i le lalolagi?
O le uiga lenei: O le faapotopotoga o e ua talia le Alii e fai ma Tupu i le faatuatua. O le Tupu lea e puipui mai, na te ta’ita’i, o ia lava o le faipule o e ua faatuatua ia te IA. E tolu upu e faamatala a’i le uiga o le olaga e tatau mo e ua talitonu: Faatuatua, Usiusitai, ma le Faamaoni i le Tupu.

O ‘oe o le Kerisiano, e i ai ou tiue: E te galue e faalelei lou aiga, lou nu’u, lou atunuu ma lou malo, e o’o lava ia te ‘oe. Afai e te faia ia uiga uma, ona avea lea o Samoa ma atunuu e sili ona lelei.
Ae ia manatua, ia faamuamua le mea e tatau ona faamuamua: Ia muamua ona talia le Atua e fai ma Tupu, ona iloa lelei ai lea le mea tonu e ao ina e faia. O le “lalolagi” ua na o se nofoaga e le tumau, ua saunia tatou te galulue ma sauniuni ai. [silasila i Faataoto i le Mataio 21:33-46; Mareko 12:1-12; ma le Luka 20:9-19].
Ua manatu le to’atele, ua uma ona faakerisianoina i matou. Ae pe faapefea ona faamaonia? E mafai ona fai se iloiloga, pe moni lea taofi. Ia fesili ifo ‘oe ia te ‘oe, ma a’u ia te a’u, pe ua moni lou faamaoni i lou Tupu:

Na fetalai le Tupu, “Ia e faia lenei mea mo a’u.” Faamata ua e manatu ifo lava ‘oe ia te ‘oe—ua e iloa? ma e faalagolago foi i fautuaga mai i au uo! Afai o lea: o lona uiga, e le’i atoatoa lou faatuatua i lou Tupu.
E faapea foi ona e fesiligia le moni o lou “faatuatua”, a e maise lou “usiusita’i” i lou Atua.
E moni ua to’atele i latou ua ta’ua o Kerisiano, a e to’atele foi i latou ua le’i taitai ona iloa ma malamalama i le uiga moni o le Kerisiano.

O LE TAOFI O LE TUSI PAIA I LE “MALO O LE ATUA.” [Feagaiga Tuai]
Ua faaaogaina le upu “Malo o le Atua” i le uiga: O le faatinoga o le pule a le Atua, ma lona talia e tagata. (silasila i le Salamo 145: 10-13), O lo’o iloa ai iina le faaaogaina o le “Malo”; ma sa masani ai foi ona faaaoga e Iesu lea lava uiga o le “Malo”.

Salamo 145:10-13, “Le Alii e, e vivii atu ia te oe mea uma na e faia; e faafetai atu foi ia te oe ou tagata amio Atua. E tautalatala atu i latou i le mamalu o lou malo, ma ta’uta’u atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo. O lou malo o le malo lea e faavavau lava; ma lau pule e au tupulaga lava lea.”
O le upu “Malo o le Atua”, ua tutusa lava ma le “Malo o le Lagi”, e pei ona faaaogaina i le tusi a Mataio.
O le manatu o tagata Iutaia, ia aua lava nei ta’ua le suafa o le Atua, aua e soli ai le Tulafono e Tolu, aua o le Atua o lo latou Tupu lava lea.
Ua leva lenei talitonuga i tagata Iutaia, o le Atua o le Tupu. O le pogai lea na faaalia ai le le fiafia o Samuelu ina ua fesili le nuu mo so latou tupu; ona faamanatu lea i ai e Samuelu: (ref. 1 Samuelu 12:12). “ … a o le Alii lo outou Atua, o lo outou tupu lava lea.” Ua latou iloa lava, sa i ai o latou pule faale-lalolagi, e pei o Solomona ma Aapo, peitai, o ia tupu sa i ai na o ni nai tausaga. A o le Atua, o le Tupu moni ma lona Malo e faavavau ….. “O lou malo o le malo lea e faavavau lava; ma lau pule e au tupulaga lava lea.” [Salamo 145:13].

O le mea lea sa latou faatalitali ai ma le faamoemoe i se taimi o le a faaalia ai ma le manino e le Atua, o ia lava o le Tupu, ma o lona agalelei o le i’uga manumalo lea. Sa latou naunau mo lea aso—ua faaalia i upu o i le Salamo 22. [1-31, esp.6-8, 16-18, 29-31]. Ua manino i fuaiupu 29-31 e i ai le manumalo o le pule faa-Tupu a le Atua.

Peitai, o le ala ua faaalia manino ai le faamoemoe o tagata Iutaia, o molimau ia mai le ‘au Perofeta, o e sa faatalitali ma le faamoemoe i se feagaiga fou i le va o le Atua ma ona tagata.
Molimau:
(Ieremia 31:31-ff): “O loo fetalai mai le Alii, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta.”
(Tanielu 7:13): “Na ou iloa i faaaliga i le po, faauta foi, ua afio mai i ao o le lagi Le e pei o le Atalii o le tagata, ua oo foi ia i Le ua mai anamua ona aso, ua latou momoli ia te ia i ona luma.”
(Isaia 53) – o le Auauna puapuagatia.
(Sakaria 9) – o le Tupu Faamaulalo.
Ua tatou iloa nei, sa faaalia le faamoemoega o tagata Iutaia i ‘auala eseese e tele. A e ui lava i lea iloa, sa faigata ona talitonu Iutaia i nisi aso, o le Atua o le Tupu moni lea. Aua sa fetaia’i soo i latou ma le manumalo o le leaga i le lelei; a e le gata i lea, e mafatia foi ma puapuagaina i latou ua talitonu.

A’oa’oga:
E faapea foi lo tatou olaga masani, ua leva lava ona tatou iloa le “tala lelei” ia Iesu Keriso ma lona finagalo: E pei ona faaolaina le tagata agasala, e ala i le loto ua salamo ma faatuatua i lona maliu; na toe soifua mai o ia nai le oti ma le tuugamau; ua afio a’e i le lagi e mafuta ma le Tama. Ua fai foi o ia ma Puluvaga i le va o le Atua ma le tagata-agasala. Peitai, e ui lava ina a’oa’oina so’o i tatou i faasinoga lelei ma le taua mai le Tusi Paia, o lo’o faailoga fesili pea lo tatou: ……faamaoni, faatuatua, ma le usiusita’i.

Ae se’i fesili ifo ‘oe ia te ‘oe, o a’u foi ia te a’u: O le a ‘ea lo’u tofiga ma o’u tiute i totonu o lenei Ekalesia?
O tumau ‘ea lou loto talitonu ma ou faatuatua pea i la’u ta’utinoga ou te auauna ma tapua’i i lenei Ekalesia?
O o’u usiusita’i ‘ea i le finagalo o le Iesu Keriso ma le tala lelei, e tusa ma le ta’ita’iga a le Leoleo Mamoe?
Ia galue pea le Agaga o le “tala lelei” i o tatou loto ta’itoatasi, ina ia tatou savavali i le Upu Moni o le “Malo o le Atua.”
I le suafa o le Keriso Iesu lo tatou Alii. ………….. Amene.
——————————————————————————————————————————————

Ina ia Silafia: O le mata’upu e uiga i le, “Malo o le Atua”:
“O le tali: O Iesu o le Tupu lea.”

O LE TALI: O IESU O LE TUPU LEA.
Ua folafola mai e Iesu, o IA lava o le Tali i le faamoemoe o ona tagata, e pei ona ia fetalai ai i ona so’o: [Luka 10:23b, 24]
“…Amuia mata ua iloa mea tou te iloa; aua ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le tiloa lava; na latou fia faalogo foi i nei mea ua outou faalogo ai, a e lei faalogo ai lava.”

======================================================
Saunia:
Rev. Emau S. Petaia, F.S.
09/02/09 – Leone

O LE PEPA FAALE-TUSI PAIA:
Ua tatou o’o mai nei i le toe aso o la tatou su’esu’ega faale-Tusi Paia, ma ua ou talitonu, ua i ai se aoga ma se malamalamaga o lenei Fono Tele a le Ekalesia EFKAS ma lana galuega totino, e pei ona taumafai atu ai lenei vaega i lenei vaiaso.  O la tatou toe mata’upu mo lenei aso, o “A’oa’oga a Keriso mo le taimi nei.”  Ua vaevaeina lenei mataupu i ni vaega se lua:
(1)  O fatuaiga moni a le Ekalesia e faatusatusa i fuafuaga o lo’o faia.
(2)  O le Galuega faa-Misionare.

1.  Fatuaiga moni a le Ekalesia (Mataio 23:23), Oi talofa ia te outou tusiupu ma faresaio, tagata faafiaamiotonu!  Ua outou avatu mea e sefulu a’i o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni; e tatau pe ana faia nei mea, a e aua foi le tuu na mea.  (6:33), A ia outou muai saili lona malo ma lana amiotonu; ona faaopoopoina atu lea o ia mea uma ia te outou.
Ua aliali mai i nei ona po se tulaga faale-manuia i le va o ni tagata se toalua po’o le toatele (pule ma tagata faigaluega) i Ofisa ma Kamupani, o nuu ma le malo.  O le faamalamalamaga, e tusa lava poo le a se tulaga matuia poo se sese ua faia e se tagata faigaluega i totonu o se Ofisa, poo le tuai soo i galuega, e leai se mea e afaina ai o ia i lana galuega, pe afai ua uma ona ia tafaleina le alii pule i nisi auala sese e i ai le foai atu ia te oe ni tupe, mea’ai, ma nisi mea taua a le atunuu e i ai siapo ma toga.  Po’o le a lava la le tele o le sese ma le matuia, o se mea ua fai e ono faamuta ai lana galuega i lea ofisa, e le mafai ona faate’aina ona ua lelei ona ia afifiina le pule i mea faamalie-loto.
Ua le gata foi i ofisa ma le malo, ae ua faapea foi i nuu ma alaalafaga.  Po’o ai lava se taulealea po’o se isi foi o matai ua solia se tulafono po’o se finagalo o alii ma faipule o le alaalafaga, e le faasalaina lava pe afai ua uma ona ia faamalieina i latou o loo uuina le pulega o le nuu, e ala i mea ua foai atu i ai, e faapei o tupe, mea’ai ma nisi lava mea aoga.
O le mea e ofo ai le loto, ua oo lava i le galuega a le Atua, ua faaaoga ai lava ala eseese faapena i le va o le Faifeau ma le Ekalesia.  Po’o le a lava le mea sese o le uso Ekalesia, ua le mafai lava ona faia i ai o se i’uga, e faapei o le aveese o lona tofi, ona o lea uso e lima malosi i le galuega e ala i lana foa’i, ma le tulaga faale-atunuu ma isi ituaiga fesoasoani; ua fai lena ma ala ua faigata ai i le Faifeau ma le Ekalesia ona aveese lona tofi.
O se ata faapea o lo’o faamalamalamaina e Iesu i ana a’oa’oga, e pei ona maua i la tatou tusi faitau (Mataio 23:23).  Ua fai ma masani a le ‘au tusiupu ma faresaio, i lo latou va tu’utu’u- nonofo ma le Atua, le faia ma le ofoina atu o mea e fai ai la latou sefulua’i.  ua latou faamamafaina ole ofoina atu o mea sili ma mea manogi i le Atua, ae ua latou le savavali ma faia le finagalo o le Atua.  O lo latou manatu, o le ofoina atu o mea manogi ma mea sili mo le Atua, o le faia lea e i latou o le finagalo o le Atua, e le gata i lea, ae o le ta’uamiotonuina ai foi lea o i latou i luma o le Atua.  Ae peitai, o le mea e silisili ona taua, lea ua latou le faia.
E le o mea e sefulua’i e ta’uamiotonuina ai oe i luma o le Atua, ae o le faia o le finagalo o le Atua ma lana amiotonu, Faauta, o le faalogo e sili lea i le taulaga, ma le usiusitai e sili lea i le ga’o o le mamoe po’a.  (cf. 1 Samuelu 15:22).
I le ma lenei, ua poloa’iina i tatou ina ia tatou mua’i saili le malo o le Atua ma lana amiotonu (Mataio 6:33).  O le manatu o loo faamamafaina i lenei tusi si’i, o lo tatou taumafai lea e fai le finagalo o le Atua, aua o le finagalo o le Atua e moni ma tonu.  afai tatou te usiusitai i le finagalo o le Atua, ua tatou maua lona malo ma lana amiotonu.

2.  Galuega faa-Misionare:         .
Ua oo mai le afioga a le Alii ia Iona le atalii o Amitai, ua faapea mai, Ina tulai ia, ina alu i Nineva le aai tele, ma alaga atu i ai; aua ua o’o mai a latou agasala i o’u luma. (Iona 1:1-2);  cf. Mataio 28:16-20).  O lo’o manino mai i le Feagaiga Tuai le valaauina faapitoa a le Atua o Aperaamo, o le tupuga lea o Isaraelu (Kenese 12:1-3).  Ua fetalai atu le Atua, Ona o oe Aperaamo o le a manuia ai aiga uma o le lalolagi.  O lea foi le faamoemoe na filifilia ai e le Atua Isaraelu, ina ia fai ma lamepa e susulu atu i le lalolagi atoa, e fai ma vaa o le Tala Lelei e folau atu ma momoli atu le Upu Moni i so’o se tulimanu o le lalolagi (cf. Isaia 49:6).
Sa valaau faapitoa e le Atua o Iona, le atalii o Amitai, ona o lenei lava faamoemoe ina ia faaolaina tagata o le aai o Nineva.  O le uiga o le igoa Iona, o le “lupe”, a o le igoa Amitai, o le “Upu Moni”.  O le ‘lupe’ e faatatau ia Isaraelu, a o le ‘Upu Moni’, e faatatau lea i le Atua.  Afai la o le a faaaogaina le faatusa o ia upu e lua (Iona ma Amitai), ona faitau lea faapea le fuaiupu muamua (f.1) “Ua o’o mai le afioga a le Atua ia Isaraelu le atalii o le Atua.”  O lenei ua sunu’i tonu le finagalo o le Atua ia Isaraelu ina ia fai ma tagata tala’i o le faaolataga a le Atua.  Ona faapea lea o se manatu, o Isaraelu o le Misionare, o le Auauna, o le Faifeau o le Tala Lelei.
O le valaauina la o Iona e le Atua e alu i Nineva, o se tasi o ulua’i laasaga e faamanino mai ai le galuega faa-Misionare i nuu ese.  Ua o’o mai lava i le Feagaiga Fou, ua ta’u manino mai ai lenei lava finagalo o le Atua, o le faaolaina lea o le lalolagi atoa.  Na fetalai Iesu i lona ‘au soo:  Ina o atu ia e fai le galuega faatala’i i nuu uma, ina ia faatalaleleiina i latou. Ua tuuina mai ia te a’u le pule uma lava i le lagi ma le lalolagi.  O lenei, ia outou o atu e fai nuu uma ma soo ma papatiso atu ia te i latou i le suafa o le Tama, ma le Atalii, ma le Agaga Paia. (Mataio 28:18-19).
Ua tuu ma’oti mai e le Alii lenei galuega i lona ‘au soo ona o i latou lava na sa vaavaai i galuega ma faailoga na faia e Iesu a o latou mafuta ma ia.  Ua le o se poloaiga ua faia na o upu, a e peitai, o lo’o i ai ma upu faamalosi (encouragement) a le Alii e ona lenei poloaiga.  Fai mai o ia:  “Ou te ia te outou i aso uma lava.”  Ia outou o e momoli atu le tala lelei i faitotoa uma o le lalolagi.  Ia faapei o le aeto ona faaoso i ana tama, e faapepepepe i luga o lana tama; e faaloaloa ona apaau; e saposapo ia te i latou; na te ave foi i latou i luga i ona apa’au.  Ua faapea foi ona faalototetele e le Alii lona au soo, ina ia o atu i le lalolagi uma; o atu aua o loo faaloaloa ona aao; na te ‘apo’apo outou ina nei pauu, o e tala’i le tala o le faaolataga a le Atua.  Afai e ‘au ma i tatou le Alii, o ai se e faasagatau mai?  (Roma 8:31).
O nisi ia o fatua’iga a le Ekalesia na filifilia ai i tatou e le Ao o le Ekalesia ina ia tatou faia.  Ia manatua, o le faamoemoe o le Ekalesia a Iesu Keriso, ia papatisoina tagata uma ina ia fai ma so’o.  E le o le to’atele o tagata (number) i se aulotu, ma le tele o mea fai (activities) ona faapea ifo ai lea ua olaola le galuega faale-agaga.  E leai, o le ola o se galuega faa-faifeau, o le olaga faatuatua lea ina ia ola ai tagata uma ma tutumau ai.  Afai e toatele tagata o se Ekalesia e ola i le amiotonu ma le faatuatua, o se galuega olaola lena.
O le mea lea le Ekalesia e, ua valaauina oe ina ia fai ma ta’ita’i e taulamua i le faia o le amiotonu; ia maua le alofa; ma ia galue ma le faamaoni i ou tiute ua filifilia ai oe e te galue ai.  Ia faaopoopo i lena, ia faaauau pea tiute faa-Misionare o le tala’i atu i soo se tagata, soo se aiga, soo se nuu, soo se malo se’ia soo le lalolagi uma.  Aua nei galo ia te oe le Ekalesia, o oe o le MISIONARE.  O le tulaga faa-Misionare, o le faataunuuina lea o le poloaiga ia faasalalau le Tala Lelei i nuu uma lava o le lalolagi.
IA SOIFUA MA IA MANUIA LE FONO TELE III 1982!